انتاركتيدا مۇزدارىنان جاقىن ارادا عالامات ءىرى ايسبەرگ سىنىپ شىعادى دەيدى عالىمدار. بۇل تۋرالى ۆۆس حابارلايدى. عالىمداردىڭ سوزىنە قاراعاندا, بۇل مۇزتاۋ تاريحتاعى ەڭ ءىرى ون ايسبەرگتىڭ ءبىرى بولماق. ونىڭ كولەمى شامامەن 5 مىڭ شارشى كيلومەتر. بۇل الماتى اۋماعىنان جەتى ەسەدەن اسا ۇلكەن.
مۇزتاۋ «لارسەن س» دەپ اتالادى. ول مۇحيتقا سۇعىنا شىققان, بۇرىن ءۇش بولىكتەن تۇرعان لارسەن اتتى مۇزدىقتىڭ ءبىر بولىگى. 1995 جانە 2002 جىلدارى «لارسەن ا» مەن «لارسەن ۆ» سۋعا كەتتى. عالىمداردىڭ ايتۋىنشا, وعان سەبەپ – جاھاندىق جىلىنۋ. «لارسەن ۆ» ايسبەرگىنىڭ اۋماعى 3250 شارشى كيلومەتر بولاتىن, ول نەبارى 35 كۇن ىشىندە ەرىپ, جوق بولدى.
جەلتوقساندا مۇزدىقتاعى ەنى 100 مەتر, تەرەڭدىگى 500 مەتر بولاتىن جارىقتىڭ سۋرەتى جاريالاندى. قازىر جارىقتىڭ مۇحيتقا جەتۋىنە 20 كيلومەتردەي قالدى, ول مۇحيتقا جەتكەن كەزدە اۋماعى 5000 شارشى مەترلىك مۇزتاۋ ءبولىنىپ شىعادى. جەلتوقساندا مۇز 18 كيلومەترگە جارىلعان ەكەن.
2017 جىلدىڭ قاڭتارىنداعى مالىمەتتەر بويىنشا جارىقتىڭ مۇحيتقا جەتۋىنە 20 كيلومەتر قالدى. فوتو الان لاكمەن
پوليارلىق مۇزدىقتاردىڭ ەرۋىن زەرتتەيتىن ميداس جوباسىنىڭ جەتەكشىسى پروفەسسور الان لاكمەن الداعى بىرنەشە اي ىشىندە ايسبەرگ سىنىپ بولادى دەيدى. ونىڭ ويىنشا, مۇزدىقتىڭ بۇزىلۋى تىكەلەي جاھاندىق جىلىنۋعا بايلانىستى ەمەس. «لارسەن س» مۇزدىعىنىڭ جارىلىپ جاتقانىنا كوپتەگەن جىل بولدى, الايدا بۇل پروتسەسس سوڭعى جىلدارى تەزدەدى. كەي ەسەپتەر بويىنشا, «لارسەن س» تولىقتاي سۋ استىنا كەتكەندە تەڭىز دەڭگەيى 10 سانتيمەترگە كوتەرىلۋى مۇمكىن.
جارىقتىڭ ەنى 100 مەتر, تەرەڭدىگى 500 مەتر. فوتو ناسا
"لارسەن ۆ" مۇزدىعىنىڭ سىنۋى: تومەندە وڭ جاقتا - ءبۇتىن مۇزدىق, جوعارىدا سول جاقتا - ونىڭ ورنى. فوتو SPL
