يندۋستريالاندىرۋ اكەلگەن يگىلىكتەر

2016 جىلدىڭ قورىتىندىسىندا ەلىمىزدىڭ ىشكى جالپى ءونىم ءوسىمى 1 پايىزعا جۋىقتاعالى وتىر. قازىرگىدەي الەمدىك نارىقتا كەن قازۋ, مۇناي شيكىزاتى سياقتى ونىمدەردىڭ باعاسى قۇلدىراپ تۇرعان شاقتا بۇل ­­كوڭىل قۋانتارلىق جاعداي. سەبەبى, ءبىزدىڭ ەلدىڭ بۇرىن ىشكى جالپى ءونىم كولەمىنىڭ نەگىزگى بولىگى وسى شيكىزات ونىمدەرىنەن تۇسەتىن. بىراق قازىر وزگەردى. وتاندىق ءوندىرىستىڭ وركەندەۋى سىرتقى نارىقتاعى شيكىزات باعاسىنا تاۋەلدىلىكتى ازايتتى. ەكونوميكا وسىمىندە وتاندىق ونەركاسىپتىڭ ۇلەسى ارتتى. ەلىمىز ۇدەمەلى يندۋستريالىق-يننو­ۆاتسيا­لىق دامۋدىڭ مەملەكەتتىك باعدار­لاماسىنىڭ ەكىنشى كەزەڭىنىڭ ەكىنشى جىلىن اياقتادى. ياعني, العاشقى بەس جىلدىق­تى ارتتا قالدىرعان باعدارلاما قازىر ەكىنشى بەسجىلدىعىن جۇزەگە اسىرۋدا. سوعان بايلانىستى بيىلدىڭ وزىندە بۇل باع­دارلاماعا قاتىستى كورسەتكىشتەر ەكى رەت قورىتىندىلانىپ, يندۋستريالاندىرۋ تاقىرىبىندا ەكى مارتە ارنايى تەلەكوپىر ءوتتى. ارينە, مۇنىڭ ءوزى ونىڭ ەل ەكونوميكاسى ءۇشىن ايرىقشا ماڭىزدىلىعىنىڭ ءبىر دالەلى. 2016 جىلى يندۋستريالاندىرۋ اياسىندا وتكەن العاشقى تەلەكوپىردە 8 ءىرى جوبا ەلباسىنىڭ رۇقساتىمەن ىسكە قوسىلدى. ال جاقىنداعى جالپىۇلتتىق تەلەكوپىردە 23 كاسىپورىن جۇمىسىنا كىرىستى. ارينە, ونىڭ اراسىندا تەمىر جول, تاس جولدارعا قاتىستى, سۋ ەلەكتر ستانساسى سياقتى جوبالار دا بار. ال ناقتى ءونىم وڭدەيتىن كاسىپورىندار اراسىندا «ارسەلور ميتتال تەمىرتاۋ» اق ىسكە قوسقان 4 دومنا پەشىن ايتۋعا بولادى. ول 4 ملن توننا بولات وندىرۋگە مۇمكىندىك بەرگەن. بۇل وتكەن جىلعى دەڭگەيدەن 15 پايىزعا جوعارى. استاناداعى «Selena Insulations» جشس قۇرىلىس ماتەريالدارىن شىعاراتىن زاۋىتتىڭ ىسكە قوسىلۋى ەلوردا ەكونوميكاسى عانا ەمەس, تۇتاس ەلدىڭ قۇرىلىس يندۋسترياسىنا قوسىلعان قارىمدى قادام بولدى. سونداي-اق, اقتوبە وبلىسىنداعى تۇرعىن ءۇي قۇرىلىسىن دامىتۋعا باعىتتالعان كاسىپ­ورىننىڭ اشىلۋى دا بۇل سالانىڭ تىنىسىن كەڭەيتتى. بۇل كومبيناتتا گەرمانيالىق «Wekcenmann» كومپانياسىنىڭ ۇزدىك جابدىقتارى ورناتىلعان ەكەن. كاسىپورىن ءونىمى ءبىرىنشى كەزەڭدە جىلىنا 50 مىڭ شارشى مەتر باسپانا تۇرعىزۋعا مۇمكىندىك بەرمەك. جىلدىڭ ونەركاسىپ سالاسىنداعى تاعى ءبىر جاڭالىعى اياق كيىم وندىرىسىمەن اينالىساتىن «كازلەگپروم الماتى» فابريكاسىنىڭ ىسكە قوسىلۋى. كاسىپورىن اياق كيىمدى يتاليالىق تەحنولوگيا بويىنشا شىعارادى. «بايان سۇلۋ» فابريكاسىنىڭ پەچەنە شىعاراتىن ءوندىرىسى دە پرەزيدەنتتىڭ رۇقساتىمەن ىسكە قوسىلدى. ونىمدىلىگى وتە جوعارى زاماناۋي قۇرال-جابدىق جىلىنا 5 مىڭ توننادان استام ءونىم شىعارۋعا مۇمكىندىك بەرەدى ەكەن. جاڭا جەلى ىسكە قو­سىلعاننان كەيىن ەكسپورتقا ءونىم شى­عارۋ 40 پايىزعا ارتپاق. جىلدىق قۋاتى 25 ملن توننا كەن وندىرەتىن اقتوعاي كومبيناتى دا كوپشىلىكتىڭ كوزايىمىنا اينالدى. سالىن­عان ينۆەستيتسيا­لار كولەمى 2 ملرد دول­لار­دان اساتىن اتالعان وندىرىستە 1500 ادام جۇمىس ىستەمەك. الماتى وبلىسىنداعى شويىن وندىرەتىن زاۋىتتىڭ ىسكە قوسىلۋى دا ەل وندىرىسىنە جاڭا سەرپىن بولدى. جاڭا زاۋىت يننوۆاتسيالىق تاسىلمەن 400 مىڭ توننا ءونىم شىعارۋعا قاۋقارلى. وندىرىستە قازاقستاندىق شيكىزات قولدانىلادى. 2016 جىلدىڭ تاعى ءبىر يندۋستريالىق جەمىسى ەلباسىنىڭ جاپونياعا ساپارى اياسىندا ىسكە قوسىلعان قازاقستانداعى بولات بۇيىمدار شىعاراتىن «توكيو روۋپ الماتى» زاۋىتى دەر ەدىك. جالپى, يندۋستريا­لاندىرۋ باعدارلاماسىن جۇزەگە اسىرۋ جىلدارىندا 4,6 ترلن تەڭگەنىڭ 961 جوباسى جۇزەگە اسىرىلسا, 2016 جىلدا 179,2 ملرد تەڭگەنىڭ 63 جوباسى ىسكە قوسىلعان. بۇل – 4,8 مىڭنان استام تۇراقتى جۇمىس ورنى. قولعا الىنعان جوبالار ارقىلى 7,5 ترلن تەڭگەنىڭ شاماسىندا ءونىم وندىرىلسە, ونىڭ 1,8 ترلن تەڭگەسى سوڭعى ون ايعا تيەسىلى. دينارا بىتىكوۆا, «ەگەمەن قازاقستان»