ايكيدو ايكيكاي نە ەكەنىن بىلەسىز بە؟

سوڭعى ۋاقىتتا ورال وڭىرىندە ايكيدو ايكيكاي سپورت فەدەراتسياسىنىڭ قىزمەتى جاندانىپ كەلەدى. بۇل سپورتتىڭ ەرەكشەلىگى قانداي ەكەنىن ەكىنىڭ ءبىرى بىلە بەرمەۋى مۇمكىن. بۇل تۇرعىدا ايكيدو ايكيكاي جاۋىنگەرلىك قورعانىس ونەرىنىڭ ءبىر تارماعى بولىپ تابىلاتىنىن ايتا كەتكەن ءجون. ناقتىراق ايتقاندا, ورال­داعى ايكيدو ايكيكاي ءۇيىر­مەسىن وسىدان بىرنەشە جىل بۇرىن فەدەراتسيانىڭ باسشىسى, باس نۇسقاۋشى ا.ۆ.پاس­تۋ­حوۆ ۇيىمداستىردى. سو­­دان بەرى ول بالالار مەن ەرە­­سەك­تەر­گە جاپوننىڭ جاۋىن­گەر­لىك ونەرىن ءجىتى ءتۇسىندىرىپ, ءبىل­گەنىن ۇيرەتۋدە. اندرەي ۆلا­ديميرو­ۆيچ ايكيدونى رەسەيدەن ۇيرەنىپ, كەيىن سول جاق­تا ارنايى ەمتيحاندار مەن سى­ناق­تاردان وتكەن. رەسەيدىڭ ارنايى جوعارى وقۋ ورنىندا وقىپ, ايكيدو ماماندىعىن ال­عان. ورالدا ايكيدو ۇيىرمەسىن اشىپ, كەيىن وبلىستىق فەدەراتسيا­نى قۇردى. ءۇشىنشى دان يەگەرى بولىپ تابىلاتىن اندرەي پاستۋحوۆ ون جىل ىشىندە ءتورت قارا بەلبەۋ يەسىن, ءبىرىنشى, ەكىنشى جانە ءۇشىنشى كيۋ يەلەرىن جانە تاعى باسقا دا ءتۇرلى دارەجە يەلەرىن, حالىقارالىق ايكيدو فەدەرا­تسيا­سىنا مۇشە بىرنەشە شاكىرتتى دايىنداپ شىعاردى. 2008 جىلى العاش رەت كورشىلەس سامارا قالاسىندا وتكەن ايكيدو شەبەرى الەكساندر كاچاننىڭ سەمينارىنا وقۋشىلارىن باستاپ الىپ باردى. ولار سول جەردە تاجىريبە جيناقتاپ, ارنايى ەمتيحاننان ءوتتى. سودان بەرى ورالدىق ايكيدوشىلار قازاقستان قۇراماسى اتىنان رەسەيدىڭ سامارا, ۋليانوۆسك, يوشكار-ولا قالالارىندا جاپون شەبەرلەرىنىڭ قاتىسۋىمەن وتكەن سەمينارلارعا قاتىسىپ ءجۇر. نۇسقاۋشى اسان مول­دا­عا­لي­دىڭ باستاۋىمەن 2014 جىلدان بەرى ورالدىق ايكيدوشىلار سامارا قالاسىندا جىل سايىن وتكىزىلەتىن «ۆولجسكيە پەرەكاتي» اتتى اشىق ايماقتىق ايكيدو فەستيۆالىنە قاتىسىپ, بەلسەندىلىك تانىتىپ كەلەدى. جارىسقا ەلىمىز اتىنان قا­تى­ساتىن جالعىز كوماندا بول­عان­دىق­تان, تىڭعىلىقتى دايىندالادى. مۇنداي ۇلكەن شارالارعا قاتىسۋ شىعىندارىن نەگىزىنەن اتا-انالار كوتەرەدى. 2009 جىلى ەڭ ءبىرىنشى رەت ورالدا ايكيدودان ماسكەۋلىك شە­بەر, رەسەيدىڭ ايكيدو ايكيكاي فەدەراتسياسىنىڭ ۆي­تسە-پرەزيدەنتى, رەسەي فەدەرا­تسيا­سىنىڭ التىن بەلبەۋ سىي­لى­عىنىڭ يەگەرى الەكساندر كاچاننىڭ جەتەكشىلىگىمەن اي­ماقتىق سەمينار وتكىزىلدى. وسىنداي سەمينار كەيىن 2010 جانە 2011 جىلدارى جالعاسىن تاپ­تى. ال ودان كەيىنگى سەمينارلار رەسەيدىڭ مارى رەسپۋبليكاسى بويىنشا ايكيدو ءبولىمىنىڭ جەتەكشىسى, رەسەيدىڭ ۇلتتىق ايكيدو كەڭەسىنىڭ «تورنادو» سىي­لىعىن يەلەنگەن الەكساندر چۋفيستوۆ جەتەكشىلىگىمەن 2013 جانە 2015 جىلدارى ءوتتى. نەگىزى كۇنتىزبەلىك جوسپار بويىنشا جىلما-جىل ءوتۋى ءتيىس سەمينارلار قاراجات ماسەلەسىنە وراي ۋاقىتىندا وتپەي كەلەدى. ءتيىستى قۇزىرلى قۇرىلىمدار تاراپىنان الداعى ۋاقىتتا وسى ولقىلىقتىڭ ورنىن تولتىرۋ باعىتىندا ءتيىستى ءىس-شارالار قولعا الىنسا نۇر ۇستىنە نۇر بولماق. تەمىر قۇسايىن, «ەگەمەن قازاقستان» ورال