قايرات ءمامي: بيىلعى جۇمىسىمىز ناتيجەلى بولدى

بۇگىن جوعارعى سوت توراعاسى قايرات ءمامي سوت جۇيەسىنىڭ 2016 جىلعى جۇمىسىنىڭ قورىتىندىسىن شىعاردى, دەپ حابارلادى قازاقپارت. ق.ءمامي 2016 جىل سوت جۇيەسى ءۇشىن وتە تابىستى بولعانىن اتاپ ءوتتى. قازاقستان تاۋەلسىزدىگىنىڭ 25 جىلدىق مەرەيتويى شەڭبەرىندەگى سوتتاردىڭ جەتىستىكتەرى تۋرالى ايتا كەلە, ول ۇلت جوسپارىندا كوزدەلگەن بارلىق ۇيىمداستىرۋشىلىق جانە قۇقىقتىق ءىس-شارالاردىڭ ورىندالعاندىعىنا تاعى دا باسا نازار اۋداردى. وسىلايشا, زاڭ مەن قۇقىق ۇستەمدىگى قاعيداتىن ءىس جۇزىندە نەعۇرلىم جۇيەلى ورىنداۋ تۇرعىسىنان سوت جۇيەسى مەن زاڭنامانى رەفورمالاۋ مۇمكىن بولدى. وسى ورايدا ق.ءمامي: «بۇل جۇمىستار سوت تورەلىگىن جۇزەگە اسىرۋدىڭ ساندىق جانە ساپالىق كورسەتكىشتەرىنە, حالىقارالىق رەيتينگتەگى سوت جۇيەسىنىڭ ورنىنا جانە ەڭ باستىسى, ازاماتتار قۇقىقتارىنىڭ سوتتا قورعالۋىنىڭ جاي-كۇيى مەن دەڭگەيىنە جاعىمدى اسەر ەتتى», - دەدى. ول جوعارعى سوتتىڭ جالپى وتىرىسىنىڭ بيىلعى جىلعى جۇمىسى ناتيجەلى بولعانىنا توقتالدى. بيىل بارلىعى 15 وتىرىس ءوتتى. سوت جۇيەسى تۋرالى كونستيتۋتسيالىق زاڭدا كوزدەلگەن جالپى وتىرىستىڭ بارلىق قۇزىرەتى, سونىڭ ىشىندە تورالقانى, سوت ءجيۋريىنىڭ قۇرامىن, حالىقارالىق كەڭەستى, عىلىمي-كونسۋلتاتيۆتىك كەڭەستى قۇرۋ, ولاردىڭ قىزمەتىنىڭ قۇقىقتىق بازاسىن قابىلداۋ مەن جاڭارتۋ بويىنشا قىزمەتى ىسكە اسىرىلدى. وسى جىلى العاش رەت سۋديالار وبلىستىق سوتتىڭ سۋدياسى لاۋازىمىن يەلەنۋ تۇرعىسىنداعى ۇسىنىمدار ماسەلەسى بويىنشا وبلىستىق سوتتاردىڭ (پاۆلودار جانە قوستاناي) جالپى وتىرىستارىنىڭ قورىتىندىلارىنا شاعىم ءتۇسىردى.  سوت پراكتيكاسىن جەتىلدىرۋ جانە ونىڭ بىركەلكىلىگىن قامتاماسىز ەتۋ ماقساتىندا 2016 جىلى سوت پراكتيكاسىنىڭ كوپتەگەن وزەكتى ماسەلەلەرى بويىنشا 16 نورماتيۆتىك قاۋلى قابىلداندى (ماسەلەن, وتكەن جىلى 8 نورماتيۆتىك قاۋلى قابىلدانعان بولاتىن). جوعارعى سوت توراعاسى قايرات ءمامي: «بۇل جەتىستىكتىڭ بارلىعى جاقسى, بىراق ءبىز وسىمەن توقتاپ قالماۋىمىز كەرەك. ءبىزدى الدا كۇردەلى جۇمىستار مەن جاڭا مىندەتتەر كۇتىپ تۇر», - دەي كەلە, مۇمكىندىكتى پايدالانىپ, وتىرىسقا قاتىسۋشىلاردى الداعى جاڭا جىلمەن قۇتتىقتادى