پاۆلودار وبلىسى اۋىلدى سۋمەن قامتۋعا 7,4 ملرد تەڭگە بولەدى

پاۆلودار وبلىسىندا اۋىل تۇرعىندارىن اۋىز سۋمەن قامتاماسىز ەتۋ ماقساتىندا 7,4 ملرد تەڭگەگە 25 جوبا قارجىلاندىرىلادى, دەپ حابارلايدى pavlodarnews.kz. بۇل تۋرالى وبلىس اكىمى بولات باقاۋوۆ جىلدىڭ قورىتىندى جينالىسى بارىسىندا ءمالىم ەتتى. «جەلەزين اۋدانىنا قاراستى اققايىڭ جانە كرۋپسكوە اۋىلدارىندا سۋ قۇبىرىنىڭ قۇرىلىسىن جۇرگىزۋ ماقساتىندا قۇجاتتارى ازىرلەندى. ەگەر اۋلدىڭ تۇرعىندارى 200-دەن از بولسا, وندا ىزدەستىرۋ بارلاۋ جۇمىستارى جۇرگىزىلمەيدى. جالپى, وبلىستاعى 31 تىرەك اۋىلدىڭ 10-ى عانا ورتالىقتاندىرىلعان اۋىز سۋمەن جابدىقتالعان. مىسالى, ەرتىس اۋدانى بەلوۆود توپتىق سۋ قۇبىرىنىڭ قۇجاتتارى ءوز ۋاقىتىندا دايىندالماعاندىقتان قۇرىلىس جۇمىستارى كەش جۇرگىزىلدى. وزدەرىڭىز بىلەتىندەي, وتكەن اپتادا عانا سۋ قۇبىرلارىنىڭ العاشقى كەزەگى اۋلاعا دەيىن ەنگىزىلدى», - دەيدى بولات باقاۋوۆ. ايماق باسشىسىنىڭ ايتۋىنشا, اۋدان اكىمدىگى 2014 جىلدان بەرى 14 اۋىلدىڭ اۋىلىشىلىك جەلىلەرىنىڭ جوبالىق سمەتالىق قۇجاتتارىن ءالى اياقتاماي وتىر. قازىرگى ۋاقىتقا دەيىن ەرتىس اۋدانىندا اقبەت جانە قوستومار اۋىلدارىنا عانا ەكى شاقىرىمدىق ماگيسترال تارتىلعان. ەلىمىزدە اۋىلداردىڭ 51.5 پايىزى ورتالىق سۋمەن قامتاماسىز ەتۋ جۇيەسىنە قوسىلعان بولسا, پاۆلودار وبلىسىندا بۇل كورسەتكىش 19.2 پايىزدى قۇرايدى. اۋىلدىق ەلدى مەكەندەردى سۋمەن قامتاماسىز ەتۋ تاقىرىبىندا وتكەن جيىن بارىسىندا پاۆلودار وبلىسىندا اۋىلدىق ايماقتاردىڭ 78 پايىزى عانا اۋىز سۋمەن قامتىلعانى انىقتالعان. وبلىس اكىمى پرەمەر-مينيستردەن ءۇش جىلعا رەسپۋبليكالىق بيۋدجەتتەن 15,1 ميلليارد تەڭگە ءبولىنۋى ءۇشىن ءوتىنىشتى تولىق قولداۋدى سۇرادى. ايماق باسشىسىنىڭ بولجامى بويىنشا بۇل سۋمەن قامتاماسىز ەتۋ بويىنشا كورسەتكىشتى 29 پايىزعا دەيىن ارتتىرىپ, 47 مىڭ ادامدى ساپالى سۋمەن قاتماماسىز ەتۋگە مۇمكىندىك بەرەدى.