«ۋنيۆەرسيادا ەلشىسى» ترامپليننەن سەكىرمەك

«ۋنيۆەرسيادا ەلشىسى» دەگەن كىم؟ بۇعان دەيىن دە 2016 جىلعى وليمپيادا چەمپيونى دميتري بالاندين, ۆولەيبولشى ءسابينا التىنبەكوۆا, انشىلەر ءالي وقاپوۆ پەن نۇرجان كەرمەنباەۆ ۋنيۆەرسيادا ەلشىلەرى بولىپ تاڭداپ الىنعان بولاتىن. «ۋنيۆەرسيادا ەلشىسى» دەگەن قۇرمەتتى اتاق ءوزىنىڭ  ىسىمەن ۇلگى بولا الاتىن, سالاماتتى ءومىر سالتىن, سپورتتى جانە ۋنيۆەرسيادا قۇندىلىقتارىن ناسيحاتتاۋعا جاردەمدەسە الاتىن قازاقستان رەسپۋبليكاسى ازامات­تارىنا بەرىلەتىنى ايان. سونىمەن, بوكستان ريو-دە-جانەيروداعى وليمپيادا ويىندارىنىڭ قولا جۇلدەگەرى اتانعان داريعا شاكىموۆاعا دا الماتىدا وتەتىن XXVIII قىسقى «ۋني­ۆەر­سيادا ەلشىسى» اتاعى بۇيىرعان ەدى. داريعانىڭ ايتۋىنشا, قىسقى سپورت تۇرلەرى ىشىندە وعان ترامپليننەن سەكىرۋ ۇنايدى. وسىنداي ۇلكەن مۇمكىندىك تۋىپ تۇرعاندا, ءبىر رەت بولسا دا تاۋەكەلگە بەل بۋىپ, سەكىرۋگە دايىن ەكەنىن ايتىپ وتىر. – ۋاقىت تىعىز بولعاندىقتان, ءاردايىم قىسقى سپورت تۇرلەرىن قاداعالاپ وتىرۋعا مۇمكىندىك بولا بەرمەيدى. ۋنيۆەرسيادا جارىستارىنا شىعۋعا تىرىسىپ كورەمىن. بىراق بىزدە ءدال سول ۋاقىتقا وقۋ-جاتتىعۋ جيىنى بەلگىلەنىپ وتىر. ماعان ترامپليننەن سەكىرۋ بويىنشا سايىستاردى تاماشالاعان ۇنايدى. سپورتشى سونداي بيىكتىكتەن ۇشىپ, تومەن ءتۇسىپ كەلە جاتقانىن كورگەندە, اسا ءتانتى بولامىن. مۇنداي سپورت تۇرىمەن شۇعىلدانۋ ءۇشىن باتىلدىق قاجەت. بەلگىلى ءبىر دايىندىقتان وتكەن سوڭ, مەن  ءوزىم سەكىرىپ كورگىم كەلەدى. ادامدار ترامپليننەن سەكىرۋ ءۇشىن جىلداپ جاتتىعادى, ويتكەنى, جەرگە دۇرىس قونا الماساڭ, ومىرىڭمەن قوشتاساسىڭ, – دەيدى بوكسشى. – بالالىق شاعىمدا مەن اكەممەن بىرگە شاڭعى تەبەتىنمىن. كەيىن «مەدەۋگە» ءجيى بارىپ تۇراتىنبىز, كونكيدى اجەپتاۋىر جاقسى تەۋىپ ۇيرەندىم. بىراق شاڭعى مەن كونكي كيمەگەنىمە ءبىراز ۋاقىت بولدى. ويتكەنى, ۇنەمى جيىندار مەن جارىستاردا جۇرەمىن, ونىڭ ۇستىنە جاراقات الىپ قالماۋ ءۇشىن قاجەتسىز تاۋەكەلگە بارعىڭ كەلمەيدى, – دەيدى داريعا شاكىموۆا. سونداي-اق, وليمپيادا جۇلدەگەرى ومىرىندە جاساعان ەڭ ەكسترەمالدىق وقيعالاردى ەسىنە ءتۇسىرىپ, ولاردىڭ ىشىندەگى ەڭ وتكىر شەشىمنىڭ ءبىرى بوكستى تاڭداۋ بولعانىن ايتادى.  بوكسشى قىز رينگتەگى الامان سايىستار مەن اۋىر جاتتىعۋلار وزىنە سپورتتىق شابىت سىيلايتىنىن ايتادى. ايناش ەسالي, «ەگەمەن قازاقستان»  الماتى