ءداستۇر مەن جاڭاشىلدىق جارشىسى

ءال-فارابي اتىنداعى قازاق ۇلتتىق ۋنيۆەرسيتەتىنىڭ  ۇيىمداستىرۋىمەن قازاق راديوسىنىڭ 95 جىلدىعى, «شالقار» راديوسىنىڭ 50 جىلدىعى جانە جۋرناليستيكا فاكۋلتەتىنىڭ ستۋدەنتتىك «سانا – ءال-فارابي» راديوسىنىڭ 20 جىلدىعىنا ارنالعان رەسپۋبليكالىق عىلىمي-تاجىريبەلىك كونفەرەنتسيا ءوتتى. مەملەكەتتىك مۇددە مەن ۇلت­­تىق مۇراتقا, جالپى ادام­زات­تىق قۇندىلىقتارعا باعات بەرۋدە ەلەكتروندى  باق ىشىندە راديو­نىڭ ورنى بولەك. ەڭ العاش­قى حابارىن قازاقستاننىڭ تۇڭعىش استاناسى ورىنبور (رە­سەي) قالاسىنان تاراتۋدان باس­تاعان قازاق راديوسى وسىناۋ وتكەن جىلدار ىشىندە دامۋ جولدارىنىڭ بارلىق ساتىسىنان ءوتتى. بۇگىنگى قازاق راديوسى 9 تىلدە, اپتاسىنا 148 حابار داي­ىندايدى. 2011 جىلدىڭ 18 ءشىل­دەسىنەن باستاپ توقتاۋسىز ون­لاين-ترانسلياتسيا جۇرگىزىپ كەلەدى. سول سەكىلدى 1966 جىلدىڭ 1 قاڭتارىنان ۇزبەي اۋە تولقىنىنا شىعىپ, حابار تاراتىپ, ۇلتتىق سازبەن تىڭدارمانىن تەربەتىپ كەلە جاتقان «شالقار» راديوسىنىڭ باعدارلاماسىن بۇگىندە  الەمنىڭ ءار تۇكپىرىنەن-اق تىڭداۋعا بولادى. ەكى راديو دا ۋنيۆەرسيتەت اۋديتورياسىندا بولاشاقتىڭ بىلىكتى ماماندارىن – راديوجۋرناليستەرىن دايىنداۋدا ەلەۋلى ۇلەس قوسىپ وتىر. اتاقتى وقۋ ورنىنداعى «سانا – ءال-فارابي» راديوسى وسىناۋ كاسىبي بايلانىستىڭ جارقىن كورىنىسى ىسپەتتى. تارتىمدى وتكەن باسقوسۋدان سوڭ «قازاقستان» رترك اق باس­­قارما توراعاسى كەمەلبەك ويشى­باەۆ قازاق راديوسىنىڭ ءبىر توپ ارداگەرىنە سىي-سياپات كورسەتتى. سونداي-اق, راديو قىز­مەتىندەگى جەڭىمپاز ستۋدەنتتەرگە ارناۋلى شاكىرتاقىلار تابىستادى. «ەڭ ۇزدىك ستۋدەنتتىك راديو­باع­دار­لاماسى» اتالىمى بويىنشا جەتى ستۋدەنت اقشالاي سىيلىق الدى. كونفەرەنتسياعا قازاق راديوسى مەن «شالقار» راديوسىنىڭ ارداگەرلەرى, بۇقارالىق كوممۋنيكاتسيا سالاسىن زەرتتەۋشى عالىم­دار, قازاقستاندىق ەلەكتروندى باق وكىلدەرى, جۋرناليستيكا فاكۋلتەتىنىڭ ستۋدەنتتەرى مەن ماگيسترانتتارى, دوكتورانتتارى قاتىستى. قىزىقتى وتكەن عىلىمي جيىندا اتالعان ماسەلەلەردىڭ اياسىندا ايتىلعان ۇسىنىستار مەن بارلىق كەپىلدەمەلەر جيناق تۇرىندە جارىق كورەدى. تالعات ءسۇيىنباي, «ەگەمەن قازاقستان» الماتى