“قازاقستان تەمىر جولى” ستۋدەنتتەرگە گرانت تاعايىندادى

كولىك سالاسىنىڭ بولاشاق ماماندارى اعىمداعى جىلى «ماگيسترال» سالالىق باعدارلاماسى بويىنشا جيىرما گرانت پەن ون اتاۋلى ستيپەندياعا يە بولدى, دەپ حابارلادى «قازاقستان تەمىر جولى» ۇك» اق.  «قازاقستان تەمىر جولى» ۇك» اق پرەزيدەنتىنىڭ اتاۋلى ستيپەنديالارى جانە ەرەكشە گرانتتار جىل سايىن بولىنەدى, ولاردى سالاداعى تالاپ ەتىلەتىن ماماندىقتار بويىنشا ءبىلىم الاتىن كوللەدجدەر مەن جوو-نىڭ ۇزدىك ستۋدەنتتەرى الادى. گرانتتاردىڭ باسىم كوپشىلىگىن قازاق كولىك جانە كوممۋنيكاتسيالار اكادەمياسى مەن ونىڭ كوللەدجدەرىنىڭ ستۋدەنتتەرى يەلەندى», – دەلىنگەن حابارلامادا. كومپانيادا ءوندىرىستىڭ اعىمداعى جانە بولاشاق قاجەتتىلىكتەرىنە سايكەس مامانداردى دايارلاۋعا جوعارى كوڭىل بولىنەدى. اتاپ وتەيىك, اتالعان باعدارلاما گرانتتارى بويىنشا 130-دان استام جاس مامان ءبىلىم العان. وسى ۋاقىت ىشىندە, بۇدان بولەك, 60 اتاۋلى ستيپەنديا بەرىلگەن. وسى رەتتە كومپانيانىڭ شاعىن ستانتسيالارى مەن رازەزدەرىندە, ايداۋ پۋنكتتەرىندە جۇمىس ىستەيتىن قىزمەتكەرلەردىڭ بالالارى 40 گرانتتىڭ يەلەنۋشىسىنە اينالدى. گرانت يەلەنۋشىلەردىڭ قاتارىندا وندىرىستە مۇگەدەكتىك العان جۇمىسشىلاردىڭ دا بالالارى بار. بۇدان بولەك, ءبىلىم بەرۋ گرانتتارى ستۋدەنتتەرگە عانا ەمەس, سونىمەن قاتار, كومپانيا ءۇشىن باسىم ماماندىقتار بويىنشا كۇندىزگى جانە سىرتتاي بولىمدە ءبىلىم الاتىن كومپانيا قىزمەتكەرلەرىنە دە بەرىلەدى. مىسالى, بيىلعى جىلى قتج 18 قىزمەتكەرى «كولىك قۇرىلىسى», «اۆتوماتتاندىرۋ جانە باسقارۋ», «كولىكتەگى لوگيستيكا», MBA, DBA ماماندىقتارى بويىنشا ماگيستراتۋرا جانە دوكتورانتۋرا باعدارلامالارى بويىنشا ءبىلىم الۋ گرانتتارىن جەڭىپ الدى.