ساعىنتاەۆ مەملەكەتتىك ءتىل ساياساتىن جەتىلدىرۋ كوميسسياسىنىڭ وتىرىسىن وتكىزدى

ۇكىمەت ۇيىندە قر پرەمەر-ءمينيسترى باقىتجان ساعىنتاەۆ مەملەكەتتىك ءتىل ساياساتىن ودان ءارى جەتىلدىرۋ جونىندەگى كوميسسيانىڭ كەزەكتى وتىرىسىن وتكىزدى, دەپ جازادى primeminister.kz. وندا «قازاقستان رەسپۋبليكاسىنداعى تىلدەر تۋرالى» قر زاڭىن جانە 2011-2020 جىلدارعا ارنالعان قازاقستان رەسپۋبليكاسىنداعى تىلدەردى دامىتۋ مەن قولدانۋدىڭ مەملەكەتتىك باعدارلاماسىن ىسكە اسىرۋ ماسەلەلەرى تالقىلاندى. پرەمەر-مينيستر 25 جىل ىشىندە مەملەكەتتىك ءتىل ساياساتىن دامىتۋ سالاسىندا اۋقىمدى جۇمىس اتقارىلعانىن ايتتى. «بۇل - ءسوز جوق, تاۋەلسىزدىكتىڭ جەمىسى, ءتىل ماسەلەسىندەگى ەلباسىنىڭ ساليقالى ساياساتىنىڭ ناتيجەسى»,- دەدى ب.ساعىنتاەۆ. وتىرىستا مەملەكەتتىك ءتىلدى وقىتۋ ادىستەمەسىن جەتىلدىرۋ جانە باعالاۋ جۇيەسى بويىنشا بايانداما جاساعان قر ءبىلىم جانە عىلىم ءمينيسترى ە.ساعاديەۆ عىلىمي نەگىزدە جانە ۇزدىك حالىقارالىق تاجىريبە بويىنشا جاسالعان مەملەكەتتىك ءتىلدى جەدەل ءارى ءتيىمدى ۇيرەتۋدىڭ جاڭا ادىستەمەسىن تانىستىردى. جاڭا ادىستەمەنىڭ بازاسىندا «قازاق ءتىلىنىڭ جيىلىك سوزدىگى» ازىرلەندى.  ول 2017 جىلدان باستاپ ورىس ءتىلدى مەكتەپتەردە پيلوتتى ۇلگىدە ەنگىزىلەتىن بولادى. سونداي-اق, اتالعان ماسەلە بويىنشا «نازارباەۆ زياتكەرلىك مەكتەپتەرى» ۇيىمى فيليالىنىڭ ءبولىم باسشىسى ج.ابۋوۆ, ۇلتتىق تەستىلەۋ ورتالى مەملەكەتتىك ءتىل باسقارماسىنىڭ جەتەكشىسى ا.ابدىحالىقوۆ بايانداما جاسادى. كوميسسيا مۇشەلەرى «قازاقستان رەسپۋبليكاسىنداعى ءتىل تۋرالى» زاڭىنىڭ ورىندالۋ بارىسى تۋرالى قر مادەنيەت جانە سپورت ءمينيسترى ا.مۇحامەدي ۇلىنىڭ, قر قارجى ءمينيسترى ب.سۇلتانوۆتىڭ جانە پاۆلودار وبلىسىنىڭ اكىمى ب.باقاۋوۆتىڭ ەسەپتەرىن تىڭدادى. وتىرىستى قورىتىندىلاي كەلە, ب.ساعىنتاەۆ وكىلەتتى ورگاندارعا بىرقاتار تاپسىرمالار بەردى.