ماجىلىستەگى بىرلەسكەن وتىرىس

«نۇر وتان» پارتياسىنىڭ پارلامەنت ماجىلىسىندەگى فراكتسياسى جانىنداعى الەۋمەتتىك كەڭەس پەن پارلامەنت ءماجىلىسىنىڭ الەۋمەتتىك-مادەني دامۋ كوميتەتى بىرلەسىپ, «حالىققا ارنايى الەۋمەتتىك قىزمەت كورسەتۋ جانە الەۋمەتتىك سالا قىزمەتكەرلەرىنىڭ مارتەبەسى تۋرالى» دەگەن تاقىرىپتا وتىرىس وتكىزدى, دەپ حابارلادى ءماجىلىستىڭ ءباسپاسوز قىزمەتى. «ارنايى الەۋمەتتىك قىزمەتتەر – قيىن تۇرمىستىق جاعدايعا تاپ بولعان­دارعا قاتىستى مەملەكەت تاراپىنان جاسالاتىن ەرەكشە ميسسيا. وسى ورايدا ءتيىمدى ارنايى الەۋمەتتىك قىزمەت ومىرلىك پروبلەمالارعا تاپ بولعان ادام­دارعا بارلىق الەۋمەتتىك جۇمىستى ايقىن­دايتىن ىقپال دەپ بىلۋگە بولادى. ءبىزدىڭ ەلىمىزدەگى بۇل جۇمىستىڭ جاعدايى قالاي؟ ءيا, بىزدە «ارنايى الەۋ­مەتتىك قىزمەتتەر تۋرالى» زاڭ قابىل­داندى. ولاردى جۇزەگە اسىرۋعا بايلانىستى بىرنەشە ستاندارت بەكىتىلدى. مەملەكەتتىك بيۋدجەتتەن جىل سايىن قوماقتى قارجى ءبولىنىپ وتىر. 800-دەن استام مەملەكەتتىك جانە مەملەكەتتىك ەمەس ۇيىمدار, سونىڭ ىشىندە 103 ۇكىمەتتىك ەمەس ۇيىم ارنايى الەۋمەتتىك قىزمەت كورسەتەدى. اتالعان جۇيەدە رەسپۋبليكا بويىنشا 30 مىڭعا جۋىق ادام جۇمىس اتقارادى», – دەدى وتىرىستا «نۇر وتان» پارتياسىنىڭ پارلامەنت ماجىلىسىندەگى فراكتسياسى جانىنداعى الەۋمەتتىك كەڭەستىڭ توراعاسى شاۆحات وتەمىسوۆ. الەۋمەتتىك كەڭەستە كورسەتىلەتىن قىز­مەتتىڭ ساپاسى قانداي؟ الەۋمەتتىك قىزمەت جۇمىسىنىڭ جۇيەسى قانشالىقتى ءتيىمدى ۇيىمداستىرىلعان؟ مۇقتاج ادامدار ءۇشىن ولار قولجەتىمدى مە؟ الەۋمەتتىك قىزمەتكەرلەردىڭ بىلىكتىلىگى حالىقارالىق ستاندارتتارعا سايكەس پە؟ ولاردى دايىنداۋ قالاي جۇرگىزىلىپ جاتىر؟ ۇكىمەتتىك ەمەس سەكتور قىزمەتىنىڭ اتالعان سالاداعى ناتيجەسى قانداي؟ جانە ەڭ ماڭىزدىسى, قيىن جاعدايعا تاپ بولعاندارعا كومەك كورسەتۋ ءۇشىن بولىنەتىن ميللياردتاعان بيۋدجەتتىك قاراجات قانشالىقتى ءتيىمدى جۇمسالۋدا؟ –  دەگەن سۇراقتارعا جاۋاپ ىزدەلدى. تاقىرىپقا نەگىزگى باياندامانى دەن­ساۋ­­لىق ساقتاۋ جانە الەۋمەتتىك دامۋ مي­نيسترى­نىڭ ورىنباسارى سۆەتلانا جاقىپوۆا جاسادى. ول 10 ايدىڭ قورىتىن­دىسى بو­يىنشا ەلىمىزدە ارناۋلى الەۋمەت­تىك قىز­مەتتەردى 800-دەن استام ۇيىمنىڭ كور­­سەت­كەنىن ايتتى. جىل وتكەن سايىن قىز­مەت الۋ­­شىلاردىڭ سانى دا ارتا ءتۇسىپ كەلەدى ەكەن. ءماجىلىس دەپۋتاتى جانات وماربەكوۆا اتالعان تاقىرىپ بويىنشا قوسىمشا بايان­داما جاسادى. ونىڭ مالىمدەۋىنشە, 2015 جىلى اتالعان باعىتقا مەملەكەت قازىناسىنان 32 ملرد تەڭگە بولىنگەن. وتىرىس بارىسىندا دەنساۋلىق ساقتاۋ جانە الەۋمەتتىك دامۋ, ءبىلىم جانە عىلىم مينيسترلىكتەرى وكىلدەرىنىڭ بايانداماسى, دەپۋتاتتار مەن قوعامدىق ۇيىمدار وكىلدەرىنىڭ سوزدەرى تىڭدالدى. ءىس-شاراعا پارلامەنت ءماجىلىسىنىڭ دەپۋتاتتارى, دەنساۋلىق ساقتاۋ جانە الەۋمەتتىك دامۋ, ءبىلىم جانە عىلىم, ۇلتتىق ەكونوميكا مينيسترلىكتەرىنىڭ باسشىلارى, الەۋمەتتىك سالاداعى قاۋىمداستىقتاردىڭ, ورتالىقتاردىڭ, قورلاردىڭ جانە باسقا دا قوعامدىق  ۇيىمداردىڭ, بۇقارالىق اقپارات قۇرالدارىنىڭ وكىلدەرى قاتىستى. الەۋمەتتىك كەڭەس وتىرىسىنىڭ قورى­­­تىن­­دىسى بويىنشا ۇسىنىمدار ازىرلەنەدى.