بىشكەكتەگى مەرەكە

جاقىندا قىرعىزستان قازاقتارىنىڭ قاۋىمداستىعى قىرعىزستان حالىق اسسامبلەياسىندا قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان دوڭگەلەك ۇستەل وتكىزدى. مەرەكەلىك ءىس-شاراعا مەملەكەتتىك ورگاندارىنىڭ وكىلدەرى, قوعام قايراتكەرلەرى, اسسامبلەيانىڭ قۇرامىنداعى ۇلتتىق مادەني ورتالىقتاردىڭ جەتەكشىلەرى قاتىسىپ, وزدەرىنىڭ قۇتتىقتاۋلارىن, قازاقستاننىڭ جەتىستىكتەرى تۋرالى پىكىرلەرىن ءبىلدىردى. دوڭگەلەك ۇستەلدىڭ اشىلۋىندا قىرعىزستان قازاقتارى قاۋىمداستىعى توراعاسىنىڭ ورىنباسارى تىلەۋقور بوشىموۆا قازاقستاننىڭ شيرەك عاسىر ىشىندەگى وتكەن جولى تۋرالى كەڭىنەن بايانداپ بەردى. ال قىرعىزستان حالىق اسسامبلەياسى كەڭەسىنىڭ توراعاسى توقان مامىتوۆتىڭ قۇتتىقتاۋمەن باس­تالعان ءسوزىن جۇرت ۇيىپ تىڭدادى. مەملەكەتتىك ۇلكەن قىزمەتتەردە بولعان ەلگە ءسوزى ءوتىمدى تۇلعالاردىڭ ءبىرى ت.مامىتوۆ پرەزيدەنت نۇرسۇلتان نازارباەۆتىڭ باستاماسىمەن ەگە­مەن­­دىكتىڭ العاشقى جىلدارىندا قازاقستاننىڭ يادرولىق قارۋدان ءوز ەركى­م­ەن باس تارتقانىن, مۇنىڭ ءتىپتى الەم­دىك قوعامداستىقتا ءمانى اسا زور وقيعا بولعانىن اتاپ كورسەتتى. ەكىن­شى­دەن, دەدى ول, ن.نازارباەۆ سارابدال ساياساتكەر, كەمەڭگەر كوشباسشى ەكەنىن ايقىن تانىتتى. بۇلاي دەپ وتىرعان سەبەبىم, قازاقستان دەر كەزىن­دە جۇرگىزىلگەن ەكونوميكالىق, ساياسي, مادەني-رۋحاني رەفورمالارىنىڭ ارقاسىندا ۇلكەن جەتىستىكتەرگە جەتتى. قازاقستاننىڭ ءوسىپ-وركەندەگەنى قازاقستاندىقتار ءۇشىن عانا ەمەس, اي­ماق ەلدەرى ءۇشىن, ونىڭ ىشىندە ءبىزدىڭ قىرعىزستان ءۇشىن دە اسا ماڭىزدى. قىرعىز بەن قازاق ءدىلى دە, ءتىلى دە, ءدىنى دە ءبىر, ءبىر وزەننەن سۋ ىشكەن حالىق, بارساق – بازارىمىز, كومىلسەك مازارىمىز دا ورتاق. دوڭگەلەك ۇستەل باسىندا ءسوز ءسوي­لەگەن باسقا دا ادامدار, قازاق دياس­پوراسىنىڭ وكىلدەرى وزدەرىنىڭ قازاق ەلىنە دەگەن تىلەۋلەستىگىن ءبىلدىردى. جيىنعا بىشكەك قالاسىنان وتىز شاقىرىم جەردەگى «وزەرنوە» اۋىلىنان ارنايى كەلگەن 92 جاستاعى قاني التىنبەكوۆ قازاقستاننىڭ تولاعاي تابىستارى ءوزىن ارقاشان دا قۋانىشقا بولەيتىنىن جەتكىزدى. ءومىر بويى ديقانشىلىقپەن اينالىسقان اقساقالدىڭ اتا-اناسى قىرعىزستانعا 1932 جىلى قونىس اۋدارىپتى. قاريا قازاقستاندى ءاردايىم العا تارتىپ كەلە جاتقان ەلباسى نۇرسۇلتان نازارباەۆقا ءوزىنىڭ اتالىق اق باتاسىن بەرىپ, قازاقستاندى ءوسىپ-وركەندەتۋ جولىنداعى ەڭبەگىنە جەمىس تىلەدى. نازاربەك بايجىگىتوۆ, رەسپۋبليكالىق «قىرعىز تۋى» گازەتىنىڭ جاۋاپتى حاتشىسى