قاتىسۋشىلار پاتريوتتىق اندەر مەن ابايدىڭ سوزىنە جازىلعان قازاقستان كومپوزيتورلارىنىڭ شىعارمالارىن ورىندادى. ەلىمىزدىڭ تۇكپىر-تۇكپىرىنەن جينالعان 39 جاس ءانشىنىڭ اراسىنان باس جۇلدەنى اندرەي مەدۆەدەۆ جەڭىپ الدى.
شىعىس قازاقستان وبلىسىنىڭ اتىنان قاتىسقان اندرەيدىڭ ونەرىن قازىلار القاسى جوعارى باعالادى. الماتىلىق بەگىم ايدوس پەن اسەم سەرگەەۆا, اقتوبەلىك امانجول وتەمۇراتوۆ ءبىرىنشى ورىننىڭ بيىگىنەن كورىندى. جۇلدەلى ەكىنشى ورىن اتىراۋلىق ءنۇرسات الماس, استانالىق تالعات ءاللابىرىنوۆ, ماڭعىستاۋلىق ءمولدىر جايلىباەۆا, شىعىسقازاقستاندىق اندرەي شاگيدەۆيچتەرگە بەرىلدى. ال الماتىدان كەلگەن نازگۇل ورىنتاي, بولات مارعۇلان, جانداربەك ەركىنباەۆ, حاليد ورىنقۇل, استانالىق مۇحتار روماشەۆ, قىزىلوردالىق ءازيزا ابدىرەيىم, اتىراۋلىق ءىلياس بولەكباەۆتار ءۇشىنشى ورىن يەلەندى.
ءۇش كۇن بويى جايىق جاعاسىن ادەمى انمەن تەربەگەن بايقاۋ مەرەيتوي يەسى عافيز ەسىموۆتىڭ شىعارماشىلىق كەشىمەن قورتىندىلاندى. ونەر مەرەكەسىنە حالىق ءارتىسىنىڭ دوس-تۋىستارى مەن ارىپتەستەرى جينالدى. وبلىس اكىمى نۇرلان نوعاەۆ مەرەيگەرگە «اتىراۋ وبلىسىنىڭ قۇرمەتتى ازاماتى» اتاعىن تابىستاپ, ەلباسىنىڭ «بولاشاققا باعدار: رۋحاني جاڭعىرۋ» ماقالاسىنداعى «تۋعان جەر» باعدارلاماسى اياسىندا اتىراۋ ايماعىندا ناقتى شارالار قولعا الىنا باستاعانىن ايتتى. شىعارماشىلىق كەشتە وبلىس اكىمىنىڭ قولداۋىمەن جارىق كورگەن عافيز ەسىموۆتىڭ شىعارماشىلىعىنا ارنالعان انتولوگيانىڭ تۇساۋى كەسىلدى.
باقىتگۇل باباش,
«ەگەمەن قازاقستان»
