بۇل ورايدا تەك ساحنا سىرتىندا تىلەكشى بولىپ قانا قويماي, ونەر قونعان بالاسىن قىراننىڭ ءوز بالاپانىن باۋلىعانىنداي بيىكتەرگە تالپىندىراتىن اتا-انانىڭ دا ءرولى ەرەكشە. ۇلپان ابدىكەرىموۆا دا وسىنداي ونەر دەسە ىشكەن اسىن جەرگە قوياتىن, ارقاشان قولداۋ بەرەتىن ونەگەلى شاڭىراقتا تاربيەلەنگەن. بالا جاستان باستاپ قانشاما بايقاۋلاردىڭ لاۋرەاتى, جۇلدەگەرى اتانعان. ساناڭىز, 2003 جىلى الماتىدا وتكەن حالىقارالىق «بوزتورعاي» بايقاۋىنىڭ ءى ورىن يەگەرى, 2004 جىلى اقتاۋدا ۇيىمداستىرىلعان ء«بىز كۇن پەرزەنتىمىز» حالىقارالىق بايقاۋىنىڭ ءى ورىن يەگەرى, 2005 جىلى بولگاريانىڭ تۋتراكان قالاسىندا وتكەن «رەچنىە نوتى» حالىقارالىق بايقاۋىنىڭ باس جۇلدە يەگەرى, 2009 جىلى يتاليادا وتكەن بۇكىلالەمدىك «San Remo» بايقاۋىنىڭ ءى ورىن يەگەرى, 2015 جىلى استانادا وتكەن «مەنىڭ قازاقستانىم!» حالىقارالىق ءان بايقاۋىنىڭ باس جۇلدە يەگەرى, ت.ب. وسىنداي ونشاقتى بايقاۋدىڭ باس جۇلدەسىن نە ءبىرىنشى ورنىن قانجىعاعا بايلاعان.
سىزىلتىپ ءتاتتى داۋىسپەن ءان سالاتىن ۇلپان ابدىكەرىموۆا قازىرگى كەزدە قازاق ۇلتتىق ونەر ۋنيۆەرسيتەتىنىڭ 3-كۋرسىندا وقيدى. «كلاسسيكالىق ۆوكال جانە حوردا ديريجەرلىك» فاكۋلتەتىنىڭ دوتسەنتى تاتيانا نيكولاەۆنانىڭ سىنىبىندا ءدارىس الىپ ءجۇر. كلاسسيكالىق باعىتتا ءان سالاتىن ونىڭ رەپەرتۋارىندا اريا, رومانس, وپەرا, حالىق اندەرىن قوسقاندا ءجۇز شاقتى ءان بار ەكەن. داۋىسى – ليريكالىق كولوراتۋرالىق سوپرانو. ۋنيۆەرسيتەتتىڭ رەكتورى ايمان مۇساقوجاەۆامەن بىرگە گاسترولدىك ساپارلارعا شىعىپ, وقۋ ورداسى اتىنان شەت ەلدەردىڭ ساحنالارىندا دا ونەر كورسەتىپ جۇرگەن جاس دارىن بەلگىلى ءانشى ديماش قۇدايبەرگەنمەن ءبىر توپتا ءدارىس الادى. ول ەسترادالىق, ال ءبىزدىڭ كەيىپكەرىمىز كلاسسيكالىق باعىتتا ءبىلىم ءنارىن جيناۋدا.
ۇ.ابدىكەرىموۆانىڭ ەل ورداسى استاناعا كەلۋى دە كەزدەيسوق ەمەس. قىزىلوردا قالاسىنداعى قازانعاپ اتىنداعى كوللەدجدە ءتورت جىل ءبىلىم العان بويجەتكەن وبلىستىق, رەسپۋبليكالىق دەڭگەيلەردەگى شارالاردا ءان سالىپ ءجۇرىپ كوزگە تۇسە باستايدى. ونىڭ ومىرىندەگى ەڭ ماڭىزدى وقيعا 2012 جىلى قىزىلوردا قالاسىنا ەلباسى ن.نازارباەۆتىڭ ساپارمەن كەلۋى بولاتىن. ۇلكەن ءىس-شارادا ءان ايتقان جاس قىزعا پرەزيدەنت اق باتاسىن بەرىپتى. «بۇگىندە جاستار ءۇشىن مۇمكىندىكتەر مول. تەك العا ۇلكەن ماقساتتار قويا ءبىلۋ كەرەك. سەن استاناعا كەل», دەگەن ەلباسى ءسوزىنىڭ قۇدىرەتى ۇلپاننىڭ اپكەسىنىڭ ىزىمەن الماتىعا بارسام دەگەن ويىنا توقتاۋ سالعان. ول ءوزىنىڭ استاناعا كەلۋىنە ەلباسىمىز سەبەپكەر بولعانىن جاسىرمايدى.
«استانا – ارماندار ورىندالاتىن قالا. ارينە, ونەر جولى وڭاي ەمەس. كورە الماۋ, قىزعانۋ, جولدى كەسۋ سىندى ءتۇرلى جاعىمسىز ارەكەتتەرگە دە جولىعۋىڭ مۇمكىن. بىراق, مەن قانداي جاعدايدا دا ونەردى, ساحنانى بيىك قويامىن. قانشاما ادام بولسا, سونشالىقتى تالعام بار. سوندىقتان, ءاربىر ءانشىنىڭ ءوز تىڭدارمانى بار ەكەنىنە سەنەمىن», دەيدى ۇ.ابدىكەرىموۆا. ول – ساحنا مادەنيەتى, داۋىس كۇتۋ, رەپەرتۋار تاڭداۋعا قاتىستى وزىندىك پىكىرى بار ءانشى. 22 جاستا عانا بولسا دا ونەگە كورگەندىگىن, مەكتەپ كورگەندىگىن بايقاتىپ, بايسالدى اڭگىمە ايتادى. ارماندارى دا كوپ. ەندى ءبىر جىلدان سوڭ ۋنيۆەرسيتەت بىتىرەتىن جاس ءانشىنى تاعدىردىڭ قانداي سىيى كۇتىپ تۇرعانىن ءبىز بىلمەيمىز. ايتسە دە تالانتىمەن ءوز ورتاسىن مويىنداتىپ جۇرگەن جاس ءانشىنىڭ بولاشاعىنا سەنەمىز.
ايگۇل سەيىلوۆا,
«ەگەمەن قازاقستان»
