پاۆلودار وبلىستىق دەنە شىنىقتىرۋ جانە سپورت باسقارماسىنىڭ مالىمەتىنشە, بيىل بۇل جوبالار قاتارىندا پاۆلودارداعى ۋسولكا شاعىن اۋدانىندا حالىقارالىق ستاندارتتارعا ساي 300 ورىندىق تريبۋناسى بار 50 مەترلىك ءجۇزۋ باسسەينىنىڭ قۇرىلىسى باستالادى. ال باياناۋىلدا تاۋ شاڭعىسى كەشەنىنىڭ جوباسى ازىرلىك ۇستىندە. وڭىردە ەركىن كۇرەس زالدارى جاڭعىرتىلىپ, پاۆلودار, ەكىباستۇز جانە اقسۋ قالالارىندا 32 ستريت-ۆوركاۋت (street workout) جاتتىعۋ قوندىرعىلارىن جانە ويىن الاڭدارىن ورناتۋ جوسپاردا بار. جالعىز باياناۋىل ەمەس, وڭىردەگى ءار اۋداندا سپورتقا ەرەكشە كوڭىل بولىنۋدە. سوندىقتان, وبلىستىق اكىمدىكتە وتكەن وتىرىستا سپورتقا جاۋاپتى تۇلعالار ء«بىزدىڭ ءوڭىر ءۇشىن 2017 جىلدى سپورت جىلى دەپ اتاۋعا بولادى», دەپ اتاپ ءوتتى.
ERG كومپانياسى مەن وبلىس اكىمدىگى اراسىندا جاسالعان مەموراندۋمعا سايكەس, جەرگىلىكتى دەنە شىنىقتىرۋ جانە سپورت باسقارماسى باياناۋىل اۋداندىق اكىمدىگىنىڭ «ۇلتتىق ساياباق» باسشىلىعىمەن بىرلەسىپ, تاۋ شاڭعىسى كەشەنىن سالۋ ءۇشىن جەر تەلىمىن ءبولۋ ماسەلەسىمەن اينالىسۋدا. سونىمەن قاتار, جول, ەلەكتر جەلىسىن تارتۋ سياقتى جۇمىستار باستالىپ تا كەتكەن.
باسقارما جوبا بويىنشا وبلىس ورتالىعىندا 164 ميلليون تەڭگەگە ەكى كۇرەس زالىن قايتا قۇرۋدى جوسپارلاعان. ورتالىق جاعاجايدا, سونداي-اق, قالاداعى 33 تۇرعىن ءۇيدىڭ اۋلاسىندا جانە اقسۋداعى 10 الاڭدا ۆوركاۋت قۇرىلعىلارىن ورناتپاقشى. بۇل ماقساتتا «سامۇرىق-قازىنا تراست» قورىنىڭ قولداۋىمەن وڭىردە پلاستيكتەن جاسالعان قورشاۋلارى بار حوككەي كورتى, كۇش جاتتىعۋ قۇرىلعىلارى, شاعىن فۋتبول, ستريت-ۆوركاۋت, ستريتبول الاڭدارى جانە بالالارعا ارنالعان 10 ينكليۋزيۆتى, كوپ فۋنكتسيالى الاڭقايلار ورناتىلادى. ولاردىڭ سەگىزى – پاۆلودار, ەكىباستۇز جانە اقسۋ قالالارىندا ورىن تەپپەكشى.
– سونىمەن بىرگە, بيىل قاشىر اۋدانىنىڭ ورتالىعى تەرەڭكولدە, اقسۋ قالاسىنىڭ ەۆگەنەۆكا, قىزىلجار اۋىلدارىندا دەنە شىنىقتىرۋ-ساۋىقتىرۋ كەشەندەرى بوي كوتەرەدى. وبلىستىڭ ءۇش قالاسىندا, سونداي-اق, باياناۋىل اۋىلىندا 200 ميلليون تەڭگەگە فۋتبول الاڭدارى سالىنادى. مەملەكەت-جەكەمەنشىك ارىپتەستىك جەلىسى بويىنشا وبلىس ورتالىعىندا جابىق فۋتبول كەشەنىنىڭ قۇرىلىس جۇمىستارى قولعا الىنادى. جۋىق ارادا ونىڭ ەسكيزدىك جوباسى تانىستىرىلاتىن بولادى, – دەيدى وبلىستىق دەنە شىنىقتىرۋ جانە سپورت باسقارماسىنىڭ باسشىسى مارات ايداشەۆ.
تاعى ءبىر جاقسى جاڭالىق – ەندى قالا تۇرعىندارى مەن قوناقتار وبلىس ورتالىعىنداعى ۋسولكا وزەنىندە قايىققا ءمىنىپ, ەسكەك ەسەتىن بولادى. ويتكەنى, بۇرىن بۇل جەردە ارنايى قايىق بازاسى بولعان-دى. ەسكەك ەسۋ سەكتسياسى اشىلماقشى. قاجەتتى قۇرال-جابدىقتى ساتىپ الۋعا جانە وزەن جاعاسىندا قايىقتاردى ساقتاۋعا ارنالعان ەللينگ سالۋعا كونكۋرس جاريالانىپ تا قويىپتى. اكادەميالىق ەسكەك ەسۋشىلەردى دايىندايتىن جاتتىقتىرۋشىلار دا بۇل ىسكە جۇمىلدىرىلماقشى.
فاريدا بىقاي,
«ەگەمەن قازاقستان»
پاۆلودار وبلىسى
