جالپى, قازاقتىڭ جالپاق تىلىمەن ايتقاندا, كاسىپقوي بوكس دەگەنىمىزدىڭ ءوزى جۋان جۇدىرىقپەن مال تابۋ عوي. تىگىسىن جاتقىزىپ, قانشا مايموڭكەلەسەڭ دە اينالىپ كەلگەندە بۇل تاقىرىپتاعى اڭگىمە اقشاعا بارىپ تىرەلەدى. ياعني, ءوز ەركىڭمەن, سانالى تۇردە تاڭداعان ماماندىعىڭ. ال ەندى, وسى ماماندىعىمەن نان تاۋىپ جەپ جۇرگەن كەيبىر بىلعارى قولعاپ شەبەرلەرىنىڭ ەلدىڭ اتىن شىعاردىم دەگەندى بۇلداعانداي بولعان ءىس-ارەكەتتەرىنە قاراپ تۇرىپ, قايران قالاسىڭ...
تۇنەۋگۇنى كاسىپقوي بوكستىڭ قىر-سىرىنا ەندى قانىعا باستاعان قوس بوكسشىمىز – باتىر جۇكەمباەۆ (9-0, 8 كو) پەن ابىلايحان قۇسايىنوۆ (6-0, 5 كو) مادەنيەت جانە سپورت ءمينيسترىنىڭ قابىلداۋىندا بولدى. مۇنداي باستامانىڭ قاي تاراپتان بولعانى بىزگە بەلگىسىز. بىراق تا, مينيسترمەن كەزدەسۋگە بوكسشىلارىمىز نەمەسە ولاردىڭ شاشباۋىن كوتەرىپ جۇرگەن ازاماتتار مۇددەلى بولعانعا ۇقسايدى...
وسى اقپاراتپەن تانىسىپ وتىرعاندا, بۇدان ءبىراز بۇرىن بولعان ءدال وسىعان ۇقساس وقيعا ەسكە ءتۇستى. WBA (Super) جانە IBO تۇجىرىمدارى بويىنشا الەمنىڭ سۋپەرچەمپيونى بولعان جانات جاقيانوۆ (27-1, 18 كو) سولتۇستىك قازاقستان وبلىسىنىڭ اكىمى ەرىك سۇلتانوۆقا بىلعارى قولعابىن سىيلاپ, قوشتاساردا ءوڭىر باسشىسى بوكسشىنىڭ قولىنا ءۇش بولمەلى پاتەردىڭ كىلتىن ۇستاتقان. نەگىزى, چەمپيون جوعارىداعى اتاق ءۇشىن امەريكالىق روۋشي ۋورەنمەن بولعان جەكپە-جەكتەن كەيىن 30 مىڭ اقش دوللارى كولەمىندەگى سىياقىنى جامباسقا باسقان بولاتىن.
اتالعان اقپارات باق ارقىلى تاراپ ۇلگەرمەي جاتىپ, ءبىزدىڭ تاعى ءبىر سايىپقىران بوكسشىمىز قانات يسلام الماتى قالاسىنىڭ اكىمى باۋىرجان بايبەكتىڭ قابىلداۋىندا بولىپ, ول دا قالا باسشىسىنا بىلعارى قولعابىن سىيعا تارتتى. كوپ ۇزاماي, وسى بوكسشىمىز مادەنيەت جانە سپورت ءمينيسترىنىڭ دە قابىلداۋىندا بولدى...
ارينە, جات ەلدەردەگى جان الىسىپ, جان بەرىسكەن جەكپە-جەكتەردە نامىستى قولدان بەرمەي, قازاقتىڭ اتىن شىعارىپ جۇرگەن ەرلەرگە قۇرمەتتىڭ قاندايى بولسا دا جاراسىمدى. «بايدىڭ اسىن بايعۇس قىزعانىپتى» دەگەننەن اۋلاقپىز. دەگەنمەن, كاسىپقوي بوكستا باق سىناپ جۇرگەن باھادۇرلەرىمىزدىڭ بىردەڭە دامەتكەندەي اكىم-قارانى جاعالاي بەرگەنى ادامدى ءارتۇرلى ويلارعا جەتەلەيدى ەكەن.
قازىر عوي, گەننادي گولوۆكيننىڭ اتاعى جەر جارىپ تۇر. «ەلدىڭ اتىن ەر شىعارار» دەگەن, بىلعارى قولعاپ شەبەرىنىڭ ەسىمىمەن قوساقتالىپ ەلىمىزدىڭ اتاۋىن دا جات ەلدىڭ بالالارى دا جاتقا ايتا باستادى. سويتكەن گولوۆكين قازىر دوللارمەن ەسەپتەگەندە ميلليونداپ اقشا تاۋىپ ءجۇر. قاراعاندىدا بىلدەي ءبىر فابريكاسى بار. ءبىر سوزبەن ايتقاندا – ميلليونەر. كوك تۋدى قابىرعاعا ءىلىپ قويىپ, كوك شاپاندى جامىلىپ العانى سۇيسىنتەدى-اق, سابازدىڭ. شارشى توپتىڭ الدىندا, ەلباسىنا قاراتىپ: «اكەم – ورىس, شەشەم – كارىس, ال مەن – قازاقپىن», – دەگەن ساڭلاقتى قازاق قايتىپ سۇيمەسىن؟!
دەسە دە, وسى گولوۆكيننىڭ ەلگە كەلگەندە قالتالى ازاماتتاردىڭ قولىنان جاڭا پاتەردىڭ كىلتىن العانىن ەستيمىز دە, ال ونىڭ قانداي دا ءبىر قايىرىمدىلىق شاراسىنا قاتىسقانى تۋرالى ماعلۇمات قۇلاعىمىزعا جەتكەن ەمەس. الدە, جەتپەي قالىپ جاتىر ما, مۇمكىن ءبىز ەستىمەي ءجۇرمىز بە؟
وسى جەردە, جاي انشەيىن مىسال رەتىندە مىنانى ايتا كەتۋگە بولار ەدى. نە نارسەنىڭ بولسىن پارقى سالىستىرعاندا بىلىنەدى عوي: فيليپپيندىك ايگىلى كاسىپقوي بوكسشى مەنني پاكياو 2016 جىلدىڭ قورىتىندىسى بويىنشا مىڭعا جۋىق وتباسىنىڭ ارقايسىسىن جەكە ۇيمەن قامتاماسىز ەتىپتى...
ءيا, «كۇلشەلى بالا سۇيمەككە جاقسى» دەگەن. اتاعى دا, اقشاسى دا زور كاسىپقوي بوكسقا, وندا سويقان سالىپ جۇرگەن تانىمال تۇلعالارعا جاناسۋعا اركىم-اق قۇمار. ماسەلەن, جۋرناليست اعايىن بۇل تاقىرىپقا قالام تەربەسە بولدى, ورمانداي وقىرمان جينايدى. بالكىم, اكىمدەر مەن مينيسترلەر دە داڭقتى بوكسشىلار ارقىلى رەيتينگىسىن كوتەرىپ الۋدان كەتارى ەمەس شىعار؟
بارىنە دە تۇسىنىستىكپەن قاراۋعا بولادى. بىراق, وسى جەردە مىناداي جايتتى قاپەرگە سالا كەتكەن ارتىقتىق ەتپەيدى دەپ ويلايمىز. ماسەلەن, ءبىزدىڭ سپورتتىڭ تابىسى تاۋداي بولعانىمەن, كەمشىن سوعىپ جاتقان تۇستارى دا جوق ەمەس. وليمپيالىق باعدارلاماعا ەنگەن سپورت تۇرلەرىنىڭ وزىندە دەمەۋگە ءزارۋ قانشا دارىن ءجۇر دەسەڭىزشى؟! الىستاعى اۋىل, شالعايداعى اۋداندا تۇرىپ جاتقان حالىقتىڭ جاساندى كوگال توسەلگەن قاراپايىم فۋتبول الاڭىنا, قاراسيراقتاردىڭ بىلعارى قولعاپ پەن بوكس قاپشىعىنا مۇقتاج ەكەنىن ماسەلە ەمەس دەپ كىم ايتتى؟ ايتا بەرسەڭىز, بۇقارالىق سپورتتىڭ دا ءبىر باسقا جەتەرلىك مۇڭى بار. مۇنداي مىسالداردى جىپكە تىزە بەرسەك, تاياۋ ارادا تاۋسىلماسى انىق. سوندا دەيمىز-اۋ, كاسىپقوي بوكسشىعا بولىنگەن استا-توك كوڭىل, كەرىسىنشە قولى قىسقا, كەرەگى كوپ وزگە سپورتشىلارىمىزعا شاراپاتىن تيگىزۋى كەرەك ەمەس پە؟ قالاي بولعاندا دا, مەملەكەتتىڭ قاراماعىنداعى اۋەسقوي سپورتتىڭ نەسىبەسىنە ورتاقتاسىپ, ماسىلدىڭ كۇيىن كەشۋ – كاسىپقوي بوكستا جۇرگەن مايتالماندارعا جاراسپايتىن قىلىق.
ارينە, اركىم ءوزىنىڭ تۇسىنىگى مەن ورەسى جەتكەنىنشە ومىرلىك سالت ۇستانادى. ەلدىڭ اتىن شىعارىپ جۇرگەن ەرلەرگە ءجون سىلتەپ, اقىل ايتۋدان اۋلاقپىز. دەگەنمەن, «ەلىم ماعان نە بەردى دەپ ەمەس, مەن ەلىمە نە بەردىم دەپ ءومىر ءسۇرۋ كەرەك» دەگەن ۇستانىم ەل نازارىندا جۇرگەن ناركەسكەن ۇلداردىڭ رۋحاني ۇستىنى بولسا ەكەن دەيسىڭ. وسى تۇرعىدان الىپ قاراعاندا, شەت ەل اسىپ, كاسىپقوي بوكستا جۇدىرىقپەن ناپاقا تاپقان جامپوزدارىمىز ەلگە كەلگەندە اكىم-قارانىڭ كابينەتتەرىن جاعالاپ كەتپەي, بىرۋاق بالالار جاتتىعىپ جۇرگەن زالدارعا بارىپ شەبەرلىك سىنىبىن وتكىزۋدى, جەتىمدەر ۇيىنە بارىپ قايىرىمدىلىق شاراعا قارايلاسۋدى ادەتكە اينالدىرسا دەيسىڭ. سوندا, باتىرلارىمىزدىڭ ابىروي-بەدەلى دە, تەر ءيسى سىڭگەن بىلعارى قولعاپتارىنىڭ باعاسى دا كورەر كوزگە وسە تۇسەر ەدى-اۋ!
قايرات ءابىلدينوۆ,
«ەگەمەن قازاقستان»
