كوميتەت توراعاسى اسقار بەيسەنباەۆ وتىرىستى اشا كەلىپ, پرەزيدەنت ن.ءا.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا ەكونوميكانى جەدەل تەحنولوگيالىق جاڭعىرتۋ ءبىرىنشى باسىمدىق بولىپ بەلگىلەنگەنىن اتاپ ءوتتى. جولداۋدا ەلىمىزدە 3D سيپاتىندا باسۋ, ونلاين-ساۋداسى, ءموبيلدى بانكينگ, تسيفرلىق قىزمەت كورسەتۋلەر سەكىلدى كەلەشەگى زور سالالاردى دامىتۋ قاجەتتىگى تۋرالى اتاپ ءوتىلدى. ودان باسقا, مەملەكەت باسشىسى جوعارى وقۋ ورىندارى مەن «الاتاۋ» يننوۆاتسيالىق تەحنولوگيالار پاركى نەگىزىندە عىلىمي جانە يننوۆاتسيالىق الەۋەتتى دامىتۋدى تاپسىرعان بولاتىن.
«يننوۆاتسيالىق تەحنولوگيالار پاركى» دەربەس كلاستەرلىك قورىنىڭ باس ديرەكتورى سانجار كەتتەبەكوۆ يننوۆاتسيالىق كلاستەر قىزمەتى تۋرالى بايانداما جاسادى. شارا بارىسىندا ارنايى ەكونوميكالىق ايماقتى باسقارۋ جۇيەسىنە, اەا-داعى سالىق سالۋ جانە كەدەن تولەمدەرى جۇيەسىن جەتىلدىرۋگە, ونىمگە سۇرانىستى ىنتالاندىرۋ شارالارىن ەنگىزۋگە قاتىستى وزەكتى ماسەلەلەر كوتەرىلدى. كوشپەلى وتىرىسقا سەنات دەپۋتاتتارى, ينۆەستيتسيالار جانە دامۋ مينيسترلىگىنىڭ, باسقا دا مەملەكەتتىك ورگانداردىڭ, بىرقاتار كاسىپورىنداردىڭ باسشىلارى, ساراپشىلار قاتىستى.
تالقىلاۋدى كوميتەت توراعاسى ا. بەيسەنباەۆ قورىتىندىلادى. ول ينۆەستيتسيالار جانە دامۋ مينيسترلىگىنىڭ وكىلدەرىن «يننوۆاتسيالىق تەحنولوگيالار پاركى» يننوۆاتسيالىق كلاستەرىنىڭ ستراتەگياسىن ناقتىلاۋ بارىسىندا كوتەرىلگەن ماسەلەلەردى قاراستىرۋعا جانە بارلىق قاجەتتى شەشىمدەردى قابىلداۋعا شاقىردى. قازىرگى كەزدە مينيسترلىك «ارنايى ەكونوميكالىق ايماقتار جانە يندۋستريالىق ايماقتار تۋرالى» جاڭا زاڭ تۇجىرىمداماسىن ازىرلەۋگە كىرىستى. ا.بەيسەنباەۆ اتاپ وتكەندەي, تالقىلاۋ ناتيجەسى سەنات دەپۋتاتتارىنىڭ ءتيىستى زاڭنامالىق اكتىلەر بويىنشا جۇمىسى كەزىندە ەسكەرىلەتىن بولادى.
شاراعا قاتىسۋشىلار «Tech Garden» ۇدەتكىشى نەگىزىندە ۇيىمداستىرىلعان ستارتاپ-جوبالار كورمەسىندە جانە «يننوۆاتسيالىق تەحنولوگيالار پاركى» ارنايى ەكونوميكالىق ايماعىنداعى بىرقاتار نىسانداردا بولدى.
ارمان وكتيابر,
«ەگەمەن قازاقستان»
الماتى
