وتىرىستا پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆا اتالعان جوبا الەمنىڭ الدىڭعى قاتارلى تۋىندىلارى قاتارىنا تاۋەلسىزدىك جىلدارى جارىققا شىققان قازاقستاننىڭ مادەني قۇندىلىقتارىن قوسۋعا, سونداي-اق, بولاشاقتا ونىڭ الەمدىك مادەنيەتتىڭ ءبىر بولشەگىنە اينالۋىنا جول اشاتىنىن ايتتى. ىرىكتەلىپ الىنعان تۋىندىلار ەلىمىزدە ءومىر ءسۇرىپ جاتقان بارلىق مادەنيەتتەر مەن ۇلتتاردىڭ ۇلتارالىق پاليتراسىن قامتۋى كەرەك. وسى سالا بويىنشا قۇرىلعان جۇمىس توبى مادەني تۋىندىلاردى ىرىكتەۋ
بويىنشا ۇيىمداستىرۋ جۇمىستارىن جۇيەلەۋدى باستاماق.
جۇمىس توبىنىڭ مۇشەسى, عالىم ەرلان سايىروۆ: «جاھاندىق زاماناۋي قازاقستاندىق مادەنيەت» اتتى جوباداعى نەگىزگى ماقسات – بارلىق شىعارماشىلىق ورتالىق وكىلدەرىنىڭ باسىن قوسىپ, ەلباسى مىندەتىن جۇزەگە اسىرۋ. ول مىندەت – كەلەسى جىلدان باستاپ, بىرىككەن ۇلتتار ۇيىمىنىڭ التى تىلىندە قازاق ءتىلى, ادەبيەتى, مادەنيەتى, ونەرى, تەاتر, كينو سالالارى بويىنشا ۇزدىك تۋىندىلاردى حالىقارالىق دەڭگەيگە شىعارۋ. بۇل جوبا حالىقتىڭ اراسىندا الەۋمەتتىك وپتيميزم تۋدىرادى. سونىمەن قاتار, بولاشاقتا قازاقستاننىڭ ستراتەگيالىق رەسۋستارىن جاسايدى دەپ ويلايمىن. ونەر سالاسىندا جۇمىس توبى قۇرىلدى, سول جۇمىس توبى اياسىندا ساراپشىلار قۇرىلادى. ساراپشىلار توبى شورت-پاراق ارقىلى جۇمىس ىستەيدى. ناقتىراق ايتقاندا, قازاقستانداعى ونەردىڭ 4 باعىتى بويىنشا ەڭ ۇزدىك تۋىندىلاردى جينايدى. سودان سوڭ, وسى جىلدىڭ ەكىنشى جارتىسىندا بۇكىلحالىقتىق تالقىلاۋعا ۇسىنىلادى. تالقىلاۋدان ىرىكتەلگەن شىعارمالار مەملەكەتتىك كوميسسياعا جىبەرىلەدى», – دەدى ول.
كسرو جانە قازاقستان جازۋشىلار وداعىنىڭ مۇشەسى ليۋبوۆ شاشكوۆا اتالعان جوبانىڭ باستى ماقساتىنىڭ ءبىرى قازىرگى قازاقستاننىڭ اۆتورلارى مەن شىعارمالارىن تانىمال ەتۋ ەكەنىن ايتتى. «الەمدە باسىلىپ جاتقان, تەاتر ساحنالارىندا قويىلىپ جاتقان, مۋزىكالىق الاڭداردا ورىندالىپ جاتقان كوريفەيلەرىمىزدى تانيمىز, كلاسسيكامىزدى, ۇلى فولكلورىمىزدى بىلەمىز, ال قازاقستاندا تاۋەلسىزدىك جىلدارى قانداي تۋىندىلار جارىققا شىقتى, جاستار نە جازدى, مىنە, وسىنى تانىتۋ – مىندەت», – دەدى ول.
وتىرىستا زاماناۋي مادەنيەتتىڭ ۇزدىك ۇلگىلەرىنىڭ تىزبەسىن جاساۋ ءۇشىن جۇمىس توبىنا قاجەت ىرىكتەۋدىڭ ناقتى كريتەريلەرى ايتىلدى. ناقتىراق ايتقاندا, بىرىنشىدەن, تۋىندى قازاقستاننىڭ تاۋەلسىزدىگى كەزەڭىندە دۇنيەگە كەلگەن بولۋى شارت, ەكىنشىدەن, قوعامدا حالىق مويىنداعان, تانىلعان اۆتورلار بولۋى كەرەك. ۇشىنشىدەن, جارىق كورگەن تۋىندى (كىتاپ, فيلموگرافيا, تەاتر قويىلىمى, كورمەلەرگە قاتىسۋ, ت.ب.) قوعامدا تانىمال بولۋى ءتيىس. تورتىنشىدەن, جاڭاشىلدىعىمەن, بىرەگەيلىگىمەن, زياتكەرلىگىمەن, وبرازدىلىعىمەن, ۇلتتىق بولمىسىمەن ەرەكشەلەنۋى شارت. بەسىنشىدەن, جوعارى كاسىبي دەڭگەيگە, مادەني, ادەبي تالعامعا, ساحنالىق مادەنيەتكە ساي بولۋى قاجەت. التىنشىدان, زورلىق-زومبىلىقتى, ءدىني ارازدىقتى, ناشاقورلىقتى ناسيحاتتاماۋى ءتيىس. جەتىنشىدەن, ىرىكتەۋ كەزىندە قازاقستان اۋماعىندا تۇراتىن بارلىق مادەنيەت وكىلدەرى, ۇلتتىق پاليترا ەسكەرىلۋى قاجەت.
ايتا كەتەيىك, تۋىندىلاردى ىرىكتەۋ ءۇش كەزەڭ بويىنشا جۇزەگە اسىرىلماق. تۋىندىلارعا ءتيىستى ساراپتاما مەن ىرىكتەۋ جۇرگىزىلگەن سوڭ, جۇمىستاردىڭ ءتىزىمى جۇمىس توبىنىڭ جالپى وتىرىسىندا تالقىلانىپ, كوميسسيانىڭ قاراۋىنا, بەكىتۋىنە جىبەرىلەدى.
تالعات ءسۇيىنباي,
«ەگەمەن قازاقستان»
الماتى
