سامميت تاقىرىبى «ۋيمەنوميكا شەگىنەن تىسقارى: مۇمكىندىكتەردى جەدەلدەتۋ» كاسىپكەر ايەلدەردىڭ الەۋەتى مەن مۇمكىندىكتەرىن كورسەتە وتىرىپ, ولاردىڭ بيزنەستەگى باسشىلىق لاۋازىمدارعا كوتەرىلۋ جولدارىن ايقىنداۋعا, سونىمەن قاتار, جاھاندىق نارىققا شىعۋ مۇمكىندىكتەرىن قامتاماسىز ەتۋگە باعىتتالعان.
سامميت ايەلدەرگە ارنالعان جاھاندىق شارالار كۇنتىزبەسىندە ەرەكشە ورىنعا يە, ياعني جاڭا يدەيالار مەن ىسكەرلىك بايلانىستار ورناتۋعا, جاڭا ءبىلىم الۋعا, بيزنەس پەن كوشباسشىلىقتا تاجىريبە الماسۋعا مۇمكىندىك بەرەتىن الەمدىك پىكىر الماسۋ الاڭى بولىپ تابىلادى.
بۇل ماڭىزدى جانە ءىرى اۋقىمدى ءىس-شارا جۇمىسىنا الەمنىڭ بارلىق مەملەكەتتەرىنەن 1000-نان استام ايەل قاتىستى. كەزدەسۋلەردىڭ ماقساتى − قازىرگى تاڭداعى الەمنىڭ سەرپىندى دامۋ جاعدايىنداعى ايەلدەردىڭ ەكونوميكالىق حال-احۋالىن جەتىلدىرۋ بويىنشا الەمدىك ساياسات وكىلدەرىنىڭ, ءىرى حالىقارالىق ۇيىمدار مەن كومپانيالار وكىلدەرىنىڭ جانە كوشباسشى ايەلدەردىڭ پىكىرلەرىمەن تانىسۋ.
قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەلەرى راۋشان سارسەمباەۆا مەن دينار نۇكەتاەۆا باستاعان 85 كاسىپكەر ايەلدەن تۇراتىن قازاقستاندىق دەلەگاتسيا وسى ماڭىزدى جيىنعا قاتىسىپ قايتتى.
سامميت جۇمىسىنا جاپونيانىڭ پرەمەر-ءمينيسترى سيندزو ابە, توكيو قالاسىنىڭ مەرى يۋريكو كويكە, جاپونيانىڭ سىرتقى ىستەر ءمينيسترى فۋميو كيشيدا جانە جاپونيانىڭ ت.ب. مەملەكەتتىك ورگاندارىنىڭ وكىلدەرى قاتىستى.
مۇنداي اۋقىمدى ءىس-شارانىڭ توكيو قالاسىندا وتكىزىلۋى كەزدەيسوق ەمەس, بۇل – سەرپىندى دامىپ كەلە جاتقان ازيا نارىعىنىڭ ايقىن مىسالى. سول سەبەپتى ءسامميتتىڭ پلەنارلىق وتىرىستارىنىڭ ماڭىزدى تاقىرىپتارىنىڭ ءبىرى «جاپونيامەن بيزنەس-ارىپتەستىك ورناتۋ» بولىپ تابىلدى. ال باسقوسۋدا جاپونيالىق جانە ازيا-تىنىق مۇحيتى نارىقتارىنا شىعۋ مۇمكىندىكتەرى جونىندە تولىققاندى اقپارات بەرىلدى.
سامميت جۇمىسى شەڭبەرىندە ايەلدەردىڭ كورپوراتيۆتى كوشباسشىلىققا جەتۋ مۇمكىندىكتەرىن جىلدامداتۋ جانە الەم بويىنشا ايەلدەر باسقاراتىن كاسىپورىندار سانىن ارتتىرۋعا باعىتتالعان ستراتەگيالار قۇرۋ بويىنشا الەمنىڭ تۇكپىر-تۇكپىرىنەن ءتۇرلى باستامالار تالقىلاندى.
«ەگەمەن-اقپارات»
