مەرەيلى مەرەكە قارساڭىندا قاراعاندىلىق قايسار قىزدىڭ بىرقاتار جەتىستىكتەرىن جۇرتقا پاش ەتىپ, اسكەري ساربازدى سوڭىنان ەرىپ كەلە جاتقان بولاشاق جاس جەتكىنشەكتەرگە ۇلگى ەتۋدى ءجون كوردىك.
جالپى, تولقىن باكىجانوۆا جايلى اڭگىمە قوزعاماس بۇرىن قولىنا قارۋ ۇستاپ, اسكەردە قىزمەت ەتەتىن قىز-كەلىنشەكتەر جايلى از-كەم ايتا كەتكەن ءجون. وڭاي شارۋا بولسا, ەكىنىڭ ءبىرى, ەگىزدىڭ سىڭارى وسى ماماندىقتى مەڭگەرە قويار ەدى. ەڭ الدىمەن, اتالعان اۋىر جولدى تاڭداعان ايەل زاتىندا مىنەز بولۋ كەرەك شىعار. قايتپاس قايسارلىق, وشپەس وجەتتىلىك سارباز سۇلۋلارعا ەڭ اسىل قارۋ بولسا قۇپ. بۇل تۇرعىدان العاندا, تولقىن − توپىراعى تەكتى, سۇيەگى اسىل, تاربيەلى وتباسىنان شىققان ۇلگىلى ورتانىڭ قىزى. قارقارالى اۋدانىنا قاراستى ەگىندىبۇلاق اۋىلىنىڭ تۋماسى بولعاندىقتان, ونىڭ تەكتىلىگى تامىرىندا, قازاقىلىعى قانىندا دەپ بىلەمىز. ول, سونداي-اق, مەرگەن. مەرگەن بولعاندا دا كىل سۇرمەرگەندەر جينالعان قازاقستان رەسپۋبليكاسى قارۋلى كۇشتەرىنىڭ ەكى ءىرى سايىسىندا نىسانا كوزدەۋدە باس جۇلدەنى بەرمەگەن يەلەنگەن ەكى دۇركىن چەمپيون. بۇل – جيىر-
ما توعىز جاستاعى تولقىن باكىجانوۆا ءۇشىن تولايىم تابىس, جاقسى جەتىستىك ەكەنى ءسوزسىز.
ماماندىعىنا ادال مەرگەن قىز 2007-2011 جىلدارى ارالىعىندا ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىندە قارجىگەر ماماندىعىن الىپ شىققان. وتباسىنداعى ورتانشى قىزدى اناسى باسىندا دارىگەر بولسا دەپ ارمانداپتى. دەگەنمەن, بالا كەزدە ويانعان اسكەري سارباز بولۋ قيالى ءبارىبىر وسى جولعا جەتەلەپ الىپ كەلدى.
−العاشقى كەزدەرى بۇرىن ماعان تانىس ەمەس اسكەري تارتىپكە ۇيرەنۋ قيىنداۋ بولدى, – دەيدى ءبىزدىڭ كەيىپكەرىمىز. – سەبەبى, ارميانىڭ ءتارتىبى وزگەشە. ال ءتارتىپسىز اسكەر بولمايدى. مىسالى, ون جىل بۇرىنعى جاۋىنگەر مەن قازىرگى جاۋىنگەردىڭ اراسىنىڭ وزىندە ايىرماشىلىق بار. بىراق, قازىرگى اسكەريلەردىڭ جاۋىنگەرلىك الەۋەتى ەداۋىر جوعارى. ويتكەنى, جوسپارلى تۇردە وتكىزىلەتىن جىل سايىنعى جاۋىنگەرلىك دايارلىققا ارنالعان وقۋ-جاتتىعۋلار ۇلكەن كاسىبي دەڭگەيدە وتۋدە جانە زاماناۋي اسكەري تەحنولوگيالاردى مەڭگەرۋدە. ء بىلىم ادىستەمەسى جانە اسكەري تەحنولوگيالار وزگەرگەن سايىن جاۋىنگەر بىلىمىنە تالاپتار جوعارىلايدى, – دەيدى ت. باكىجانوۆا.
جالپى, پاتريوتتىق تاربيە دەگەنىمىز تەك وتانعا دەگەن جالاڭ سۇيىسپەنشىلىكتەن تۇرماسا كەرەك. بۇل وتباسىنداعى ۇلگى-ونەگە مەن مەكتەپتەن باستالاتىن ءمىنسىز قىزمەتكە دە بايلانىستى ەكەنى ءسوزسىز. ءبىزدىڭ سۇلۋ ساربازىمىز دا وسى ء سوزىمىزدى قۋاتتاي تۇسەدى.
اسكەردە تەك قارا كۇش ەمەس, بىلىكتىلىك كەرەك. دانا حالقىمىز «بىلەكتى ءبىردى جىعادى, ءبىلىمدى مىڭدى جىعادى» دەگەن جوق پا ەدى, اسكەري ايەلدەر دە ەلىمىز قارۋلى كۇشتەرىنىڭ كوپتەگەن سالاسىندا قىزمەت ەتىپ, ەر-ازاماتتاردان ەش قالىسپاي, وقۋ-جاتتىعۋلارىندا الدىڭعى قاتاردا ءجۇر. ونىڭ ۇستىنە, اسكەردە سەن ايەلسىڭ, سەن ەركەكسىڭ دەپ بولمەيدى. ءبارى قارۋ ۇستاعان وتان قورعاۋشىلار. تولقىن باكىجانوۆا سولاردىڭ ءبىرى.
تولقىنعا يىعىڭداعى جۇلدىزىڭ مەن بيىگىڭدەگى جۇلدىزىڭ قاتار جارقىراسىن دەمەكپىز.
ميراس اسان,
«ەگەمەن قازاقستان»
