ستالينگراد تۇبىندە 1943 جىلى 15 قاڭتاردا بولعان كەسكىلەسكەن ۇرىستا ل.اعابەكوۆتىڭ مينومەتشىلەر ۆزۆودى جاۋدىڭ كەزەكتى قارسى شابۋىلىن تويتارادى. ولجا رەتىندە تۇسىرگەن نەمىس پۋلەمەتىمەن گيتلەرشىلدەردىڭ اۆتوكولىگىنە وق اتىپ, ونى جويىپ جىبەرگەن. جاۋدىڭ 20 سولداتىن تۇتقىنعا العان. سونداي باتىلدىعى ءۇشىن ۆزۆود كومانديرى «قىزىل جۇلدىز» وردەنىنە ۇسىنىلعان ەكەن. الايدا, بۇل ناگرادا بەلگىسىز سەبەپتەرمەن ەرجۇرەك كومانديرگە بۇيىرماپتى.
مۇنداي ايتۋلى شارانىڭ وسكەلەڭ ۇرپاققا بەرەرى مول. سالتاناتقا جينالعاندار مەكتەپ اۋلاسىندا ۇلى وتان سوعىسىنا قاتىسۋشىلارعا ارناپ ورناتىلعان ەسكەرتكىشكە گۇل شوقتارىن قويىپ, ولاردى ءبىر مينۋت ۇنسىزدىكپەن ەسكە الدى. ارۋاقتارعا قۇران اياتتارى باعىشتالدى. اۋدان اكىمىنىڭ ورىنباسارى م.پەرنەبەكوۆ, ءماسليحات حاتشىسى ن.قويباعاروۆ, ارداگەرلەر كەڭەسىنىڭ توراعاسى ءا.شىڭعىسباەۆ, ەكپىندى ورتا مەك-
تەبىنىڭ ديرەكتورى ن.دىلدابەكوۆ ءسوز سويلەپ, تاريحي ساتكە كۋا بولىپ وتىرعاندارىن, مۇنىڭ ءوزى جاستاردى وتانسۇيگىشتىككە, پاتريوتيزمگە, ەلى مەن جەرىن سۇيۋگە تاربيەلەيتىنىن جەتكىزدى.
1917 جىلى بۇرىنعى قىزىل ۇڭگىر اۋىلدىق كەڭەسىنە قاراستى چاپاەۆ اتىنداعى كولحوزدا تۋعان لاۋلان اعابەكوۆ قىزىل ارميا قاتارىنا 1939 جىلى الىنعان. سوعىس ءورتى بۇرق ەتە قالعاندا ول تۇراقتى قىزىل اسكەر قارۋلى كۇشتەرىنىڭ ساپىندا بولعان ەكەن. 1941 جىلدىڭ جاز ايىنان 170-اتقىشتار ديۆيزياسىنىڭ 198 اتقىشتار پولكىنىڭ قۇرامىندا ۆەليكيە لۋكي تۇبىندە كۇشى باسىم فاشيست جەندەتتەرىمەن شايقاسادى. جەڭىل جاراقاتتانىپ, كوپ ۇزاماي قايتا ساپقا قوسىلىپتى. كەلەسى جىلى ول 20 اقپان مەن مامىر ايىنىڭ ارالىعىندا وڭتۇستىك-باتىس مايدانىنداعى 199-اتقىشتار ديۆيزياسىنا قاراستى 617-اتقىشتار پولكىندە پۋلەمەتشىلەر بولىمشەسىن باسقارىپ, تالاي اسكەري جورىقتاردى باستان كەشىرەدى. كەيىن ل.اعابەكوۆ ءۇش ايلىق قىسقا مەرزىمدى كۋرسقا جىبەرىلىپ, كىشى لەيتەنانت شەنىن الىپ شىعادى. كوپ ۇزاماي 204-اتقىشتار ديۆيزياسىنىڭ 700-اتقىشتار پولكىندەگى 82 ميليمەترلىك مينومەتشىلەر ۆزۆودىنىڭ كومانديرى بولىپ تاعايىندالادى. ستالينگراد تۇبىندەگى قيان-كەسكى شايقاستارعا قاتىسادى. سودان كەيىن جاپون ميلليتاريستەرىن تالقانداۋعا دا اتسالىسىپ, 1946 جىلى عانا تۋعان جەرىنە ورالادى.
بەيبىت ومىردە ل.اعابەكوۆ اۋىل شارۋاشىلىعى سالاسىن وركەندەتۋگە اتسالىسادى. ايەلى بەيبىت ەكەۋى 3 ۇل, ەكى قىز تاربيلەپ ءوسىرىپ, بەرتىندە 72 جاسىندا قايتىس بولادى. مايدانگەر قارت بۇعان دەيىن «قىزىل جۇلدىز», « ۇلى وتان سوعىسى» وردەندەرىمەن جانە ونداعان مەدالدارمەن ناگرادتالعان بولاتىن. ال وسى ماقالانىڭ جازىلۋىنا تۇرتكى بولعان وردەننىڭ كىتاپشاسى ۇرپاقتارىنا تابىس ەتىلدى. مۇنداي مايدانگەرلەردىڭ كەشەگى جورىق جولدارى بۇگىنگى ۇرپاققا ۇلگى-ونەگە.
سەرىكقالي جەكسەنباەۆ,
جۋرناليست
وڭتۇستىك قازاقستان وبلىسى
