«جەكەگە» جەڭىلدىك جوق
«تۇرعىن ۇيگە توپالاڭ تيگەلى قاشان؟! الدىمەن التىنشى كىرەبەرىسكە الاڭدادىق, ءۇيدىڭ بۇيىرىنەن دۇكەن مەن ءدارىحانا يەسى قوسىمشا قۇرىلىس جۇرگىزگەلى ۇرەي سەيىلدى. قازىر ءبىرىنشى كىرەبەرىس قيناپ تۇر. قابىرعا قيىلىسقان تۇس جارىلعاندا, اكىمدىككە ارىزداندىق. بىراق, بەرگەن ۋادە بولماسا, قايىر شامالى. ءوزىمىز قالتادان قاراجات شىعارىپ, ۋاقىتشا قاۋىپسىزدىكتى قامتاماسىز ەتتىك».
بۇل − الاشاحان داڭعىلىنداعى №33 ۇيدە تۇراتىنداردىڭ ايتقانى.
«باسپانا 1966 جىلى پايدالانۋعا بەرىلگەن. 2000 جىلدان بەرى ءبىزدىڭ بالانستا. كەزىندە جان-جاقتى تەكسەرىلىپ, جارىلعان جەرى بىتەلگەن. 2012-2014 جىلدارى ەشقانداي وعاش وزگەرىس بايقالمادى. 2015 جىلى تامىزدا تاعى سىزات ءتۇستى. بىلتىر ءۇش رەت جالپى جينالىسىن وتكىزدىك. ءبىرىنشى كىرەبەرىستەگى اپاتتان ارىلۋدىڭ جاي-جاپسارى تالقىلاندى. ودان ءارى ءب ۇلىنۋدى توقتاتۋ ءۇشىن پانەلدى نىعايتۋعا باعىتتالعان جوندەۋ جۇرگىزىلدى», دەدى «بوساعا» جەكەمەنشىك پاتەر يەلەرى كووپەراتيۆىنىڭ باسشىسى سارسەنكۇل يگەمبەرلينا.
ارينە, جايسىز جاعدايدان جەرگىلىكتى بيلىك جان-جاقتى حاباردار.
«مەن تۇرعىندارمەن بىرنەشە رەت كەزدەستىم. ءۇي جەكەمەنشىك پاتەر يەلەرى كووپەراتيۆىنە قارايدى. «جەكەمەنشىككە» جەڭىلدىك قاراستىرىلماعان. سوندىقتان, قاجەتتى قاراجاتتى تۇرعىندار وزدەرى جيناۋى نەمەسە جاڭعىرتۋ باعدارلاماسىنا قاتىسۋى كەرەك. باسقا باسپانا تاۋىپ بەرۋگە مۇمكىندىك جوق. جەزقازعاندا جاعدايى كەلىسپەگەن ءۇي جالعىز ول ەمەس».
جەزقازعان قالاسى اكىمىنىڭ ورىنباسارى نۇرجان ورىنباەۆ وسىلاي دەدى.
«كوممۋنالدىقتى» قايتەدى؟
وتكەن عاسىردىڭ ورتاسىندا سالىنعان ۇيدەن ءۇمىت شامالى. «ودان دا ونى ءسۇرىپ تاستاپ, ورنىنا جاڭادان تۇرعىزعان الدەقايدا ءتيىمدى», دەيدى قۇرىلىسقا كوزىقاراقتىلار. وكىنىشتىسى, جاڭاسى دا جەتىسىپ جاتقان جوق.
مەتاللۋرگتەر قالاسىنداعى ساتباەۆ داڭعىلىنىڭ بويىندا 2008 جىلى پايدالانۋعا بەرىلگەن كوپ قاباتتى تۇرعىن ءۇي بار. سونىڭ توعىز جىلعا جەتپەي-اق توز-توزى شىقتى. №89 «ا» ءۇي ەكى جىلدان كە-
ءيىن «اپاتتى» تىزىمىنە ىلىكتى. كەيىنگى جەتى جىلدا تۇرعىنداردىڭ كورگەنىن ەشكىمنىڭ باسىنا بەرمەسىن.
بەس قاباتتى جاڭا ءۇيدىڭ جەرتولەسى باسسەينگە بەرگىسىز. كولكىگەن سۋ بەلدەن كەلەدى. ونىڭ سوڭعى رەت قاشان قۇرعاتىلعانى ەشكىمنىڭ ەسىندە جوق. ويتكەنى, جەرتولەنىڭ تورلى ەسىگىنە جاقىنداپ, بوساعادان قۇلاق سالساڭ, سۋدىڭ سىلدىرى ەستىلەدى.
دەمەك, ءۇيدىڭ قۇبىرىنان كەتىپ جاتىر. ولاي بولماسا, تۇرعىن ءۇي تۇرعىزىلعان جەردىڭ استىنداعى باسقا قۇبىردان اتقىلاۋدا. نەمەسە, تاستاقتى تۇستان تەسىپ شىققان بۇلاقتىڭ كوزى دە بولۋى مۇمكىن. ايتەۋىر, تۇرعىنداردىڭ ايتۋىنا قاراعاندا, جاسالعان ساراپتاما اۋىز سۋ ەكەنىن كورسەتىپتى.
اكىمدىكتە بۇل ۇيدە تۇراتىنداردى جاقسى تانيدى. ولار وتىنۋدەن, ارىزدانۋدان, جازۋدان جالىققان ەمەس. تابالدىرىقتى توزدىرعان تۇرعىندار «جەرگىلىكتى بيلىك بىردەڭە ىستەۋگە مىندەتتى!» – دەيدى ءبىراۋىزدان. ويتكەنى, ول – اكىمدىكتىڭ كوممۋنالدىق مەنشىگى. قولجەتىمدى باسپانا باعدارلاماسىمەن سالىنعان.
تۇرعىن ءۇي-كوممۋنالدىق شارۋاشىلىعى ءبولىمىنىڭ مالىمەتىنشە, بيىل اپاتتى ۇيلەرگە بيۋدجەتتەن قاراجات قاراستىرىلماعان. كوشىرۋگە دە, وتەماقى تولەۋگە دە. تەك كوممۋنالدىق مەنشىكتەگى ۇيلەردىڭ اقاۋىن انىقتاۋ عانا جوسپارلانعان.
«اپات ايتىپ كەلمەيدى», الايدا «كۇن كۇركىرەمەي» قوزعالمايتىن بولدىق قوي؟!
الىبەك ءابدىراش
قاراعاندى وبلىسى,
جەزقازعان قالاسى
