«بارلىق پايدالانىلعان ماتەريالدار – امەريكالىق ونىمدەر. بۇل – جاي عانا قاعاز ەمەس, 40 توننا سالماقتى كوتەرەتىن وتە مىقتى ماتەريال. سونىمەن قاتار, جىلۋدى دا ۇستاپ تۇرۋعا قاۋقارلى. ءبىز ونىڭ بەرىكتىگىن دالەلدەي الامىز. جالپى, تۇسىنىسپەۋشىلىك ورىن العانى ءۇشىن كەشىرىم سۇرايمىز. قۇرىلىسقا قۇم, توپىراق نەمەسە وسى تەكتەس باسقا دا قاراپايىم قوسپالاردان جاسالعان دۇنيەلەردى پايدالانعان ەمەسپىز. بىرنەشە كۇن بۇرىن اتالعان اۋماققا ءتيىستى تەستىلەۋ شارالارىن جۇرگىزدىك. سىناق ناتيجەسى بويىنشا ماتەريال ءتوزىمدى بولدى», دەدى «Sembol» كومپانياسىنىڭ مەنەدجەرى احمەت قاراحان.
جۇرگىزۋشى بولىپ ىستەيتىن بەينەروليك اۆتورى ۆياچەسلاۆ پاۆليۋكوۆ قوعامدا شۋ تۋدىرعان جاريالانىمى ءۇشىن كەشىرىم سۇرادى. «سوڭعى ەكى كۇندە بەينەروليككە بايلانىستى جۇرت دۇرلىگىپ كەتكەندىكتەن, ەكسپو قالاشىعىنا كومپانيا باسشىلىعىنان كەشىرىم سۇراۋعا كەلدىم. ماعان جوبالاۋشى ينجەنەرلەر ول جەردە پاركينگ بولاتىنىن ءتۇسىندىردى. جۇكتى تۇسىرگەن كەزدە نىساننىڭ اۋماعىندا ماتەريالدى پايدالانۋ ماقساتى جايىندا تولىق بىلمەيتىن ەدىم. دەگەنمەن, بەينەجازبانى جۇكتەدىم. اتاپ ايتقاندا, بەينەروليكتى ءۇش اپتا بۇرىن ەكى دوسىما جىبەرگەنمىن. ال وسىعان قاتىستى كەشەدەن بەرى كوپشىلىك شۋلاپ كەتتى», دەدى ول. 35 جاستاعى ۆ.پاۆليۋكوۆ استانادا تۇرادى ەكەن. ايتۋىنشا, ازىرگە جۇمىستان قۋىلماعان.
«دەرەككوزگە نازار اۋدارساق, ماتەريالدى الىپ كەلگەن ادامنىڭ زاماناۋي قۇرىلىس تەحنولوگيالارى جايىندا ايتىپ جاتقانىن اڭعارامىز. ول ءبىلىمدى, وقىعان جان شىعار. بىراق ونىڭ سوزدەرىن راستايتىن ەشقانداي مالىمەت ايتىلمادى», دەدى ءوز كەزەگىندە «استانا ەكسپو-2017» اق قوعاممەن بايلانىس دەپارتامەنتىنىڭ ديرەكتورى سەرگەي كۋيانوۆ.
اسحات رايقۇل,
«ەگەمەن قازاقستان»
