سىر ەلىندە تۋىلعان ورەن اسكەري سالاداعى قادامىن 2001 جىلى شىمكەنت قالاسىنداعى رەسپۋبليكالىق اسكەري مەكتەپ-ينتەرناتتا وقۋدان باستايدى. ەكى جىلدان سوڭ تۇركياداعى اسكەري-تەڭىز ۋچيليششەسىنە قابىلدانىپ, ونىڭ قابىرعاسىنان بەس جىلدان سوڭ «كەمە قۇرىلىسى ينجەنەرى» ماماندىعىن الىپ شىعادى. ارمان قۋالاعان جاس ودان ءارى تۇرىك ەلىندەگى وقۋ ورىندارى مەن كەمەلەردە بىلىكتىلىك كوتەرۋ ماقساتىندا كۋرستاردان وتەدى. ەلگە ورالعان اسكەري مامان «وجەت» شاعىن كۇزەت كەمەسىنە ەلەكترمەحانيكالىق-جاۋىنگەرلىك بولىمگە كوماندير بولىپ تاعايىندالادى دا, ارتىنشا 21814 اسكەري ءبولىمى كومانديرىنىڭ ەلەكتر مەحانيكا ءبولىمى بويىنشا ورىنباسارى بولىپ قىزمەتكە كىرىسەدى. جۇمىسقا جاۋاپتى جاس كوپ ۇزاماي ەلەكتر مەحانيكالىق قىزمەتتىڭ اعا وفيتسەرى رەتىندە كەمەلەرگە قىزمەت كورسەتۋ, قۇرۋ جانە جوبالاۋ-جاساقتاۋ جۇمىستارىمەن اينالىسادى.
– قىزمەت مەنى قىزىقتىرا تۇسكەنىن ۇقتىم دا ودان ءارى ءبىلىم الىپ, بىلىگىمدى تەرەڭدەتە ءتۇسۋ كەرەك دەپ شەشتىم. وسى ويمەن تۇركياداعى اسكەري-تەڭىز كۇشتەرى اكادەمياسىنا اسكەردى اكىمشىلىك باسقارۋ ماماندىعى بويىنشا وقۋعا ءتۇستىم. سودان كەيىن سۋدا ىزدەستىرۋ جانە ىزدەۋ-قۇتقارۋ قىزمەتىنىڭ باستىعى بولىپ تاعايىندالدىم.
اسكەردە قىزمەت ەتۋ ءاربىر ەر ادامنىڭ پارىزى دەپ بىلەمىن. راس, 90-شى جىلدارداعى داعدارىس كەلمەسكە كەتىپ, قازىر اسكەري سالا قايتا ءوز بيىگىنە كوتەرىلدى دەپ ويلايمىن. ونىڭ سەبەبى, ەلىمىز داعدارىستان شىقتى, اسكەريلەرگە جاقسى جاعداي جاسالدى, سالامىز اياعىنان تۇردى. ەندى وتانىمىزدى دامىتۋ, قورعاۋ – ءبىزدىڭ مىندەتىمىز, – دەيدى س.داستان.
قاي قىزمەتتە دە ءوزىن ۇيىمداستىرۋ قابىلەتىنىڭ جوعارىلىعىمەن تانىتا بىلگەن سامات قازىر 29011 اسكەري ءبولىمى وقۋ ورتالىعىنىڭ باستىعى. وقۋ ورنى – ەلىمىزدەگى قازاقستان رەسپۋبليكاسى قاۋرلى كۇشتەرى اسكەري-تەڭىز كۇشتەرى قۇرامىنا كىشى باسشىلىق قۇرام جانە تەڭىز ماماندارىن دايىنداۋمەن اينالىساتىن بىردەن-ءبىر وقۋ ورنى. العاشىندا ورتالىق اسكەر قاتارىندا ءارتۇرلى جاعدايلارمەن قىزمەت ەتە الماعان 27 مەن 32 جاس ارالىعىنداعى جىگىتتەردى قابىلداپ, ولاردى قارۋلى كۇشتەردىڭ تانك جانە موتواتقىشتار بولىمشەلەرىنە دايىنداۋمەن شۇعىلداندى. ولار اسكەري الاڭداردا بولىپ, قارۋمەن جۇمىس جاساپ ۇيرەندى, اسكەري تەحنيكالارمەن تانىستى جانە ۇرىس كەزىندە ءارتۇرلى جاعدايلارعا دايىن بولۋ جولدارىن ۇيرەندى. ءۇش جىل ىشىندە وقۋ ورتالىعىندا ماڭعىستاۋ, اتىراۋ, اقتوبە, باتىس قازاقستان وڭىرلەرىنەن كەلگەن 700 جىگىت اتقىش, پۋلەمەتشى, گراناتا لاقتىرۋ سالالارى بويىنشا وقىپ شىقتى.
كەلىسىمشارت بويىنشا جۇمىس ىستەۋشىلەر كىشى كەمە قىزمەتكەرى ماماندىعى بويىنشا دايىندىقتان وتەدى جانە قىزمەتكە تاعايىندالادى. بۇل تۇرعىدا ورتالىق ەلىمىزدىڭ قارۋلى كۇشتەرى قۇرامىن كوبەيتۋ جانە جاستاردى جۇمىسپەن قامتۋ سياقتى ەكى بىردەي باعىتتى قاتار جۇزەگە اسىرىپ كەلەدى.
وتباسىندا ەكى بالا تاربيەلەپ وتىرعان سامات المات ۇلىنىڭ بولاشاققا سەنىمى مول. قازاق, ورىس تىلدەرىمەن بىرگە تۇرىك جانە اعىلشىن تىلدەرىن مەڭگەرگەن ول الەم ەلدەرىمەن تاجىريبە الماسا الۋ ءۇشىن بىرنەشە ءتىل بىلگەندى ءجون سانايدى. سامات ءسوز سوڭىندا قازاق جاستارىنىڭ ەلىمىزدى قورعاۋ ءۇشىن ءبىلىمدى, شىنىققان شىمىر بولۋى قاجەتتىگىن ماڭىزدى دەپ بىلەتىندىگىن جەتكىزدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
