يراكتىڭ ەل-كۋت قالاسىندا ورىن العان قوس لاڭكەستىكتەن 34 ادام قازا تاپتى. سوڭعى مالىمەتتەرگە قاراعاندا, تاعى 64-ءى جارالانعان.
قالانىڭ ورتالىق الاڭىندا جاسالعان العاشقى جارىلىستى تەكسەرۋ ءۇشىن جانە جارالانعاندارعا كومەكتەسۋ ماقساتىندا كۇش قۇرىلىم قىزمەتكەرلەرى مەن جەدەل جاردەم دارىگەرلەرى الاڭعا جاقىنداي بەرگەن ساتتە اۆتوكولىككە ورناتىلعان ەكىنشى جارىلعىش زات ىسكە قوسىلعان. سوڭعى كەزدە بۇل ەلدە لاڭكەستىك ارەكەتتەردىڭ ارتۋىنان امەريكالىق اسكەريلەردىڭ وسىندا قالۋ مەرزىمىن ۇزارتۋ كەرەك دەگەن اڭگىمەلەر ءجيى ايتىلا باستادى.
مافيادان مەزى بولعان مەكسيكالىقتار
مىڭعا جۋىق مەكسيكالىق وسى ەل استاناسى مەحيكودا كوشەلەردى جاياۋ ارالاپ, ەسىرتكى مافياسى تاراپىنان قازا تاپقان تۋىسقاندارىنىڭ سۋرەتتەرىن قولدارىنا الىپ ءجۇردى.
اكتسياعا قاتىسۋشىلار مافيا قولىنان قازا تاپقاندار سانى ازايماي وتىرعاندىعىن العا تارتادى. ولاردىڭ پايىمىنشا, ەل پرەزيدەنتى فەليپ كالدەرون ءوز ۋادەسىنىڭ ۇدەسىنەن شىقپاۋدا. بۇعان دەيىن بيلىك ادامداردىڭ باسىن شابۋعا بۇيرىق بەرىپ كەلگەن كارتەل باسشىسىن تۇتقىنداعاندىقتارىن حابارلاعان بولاتىن.
تىكۇشاق تەحنولوگياسى ۇرلاندى ما؟
پاكستان «ءال-كايدا» جەتەكشىسى بولعان وساما بەن لادەننىڭ كوزىن جويۋ كەزىندە اپاتقا ۇشىراعان امەريكالىق تىكۇشاقتىڭ سىنىقتارىن قىتايلىقتارعا كورسەتتى دەگەن اقپاراتتى پاكستاندىق اسكەريلەر جوققا شىعارىپ وتىر.
پاكستاندىق رادارلارعا كورىنبەيتىن تىكۇشاق قالدىقتارىن قىتايلىقتار سۋرەتكە ءتۇسىرىپ قانا قويماي, ارنايى جابىندىنىڭ بولشەگىن دە العان كورىنەدى. تىكۇشاق قالدىقتارىن پاكستان اقش-قا قايتارىپ بەرگەنىمەن, ەكى ەل اراسىنداعى قارىم-قاتىناس سۋىپ تا ۇلگەردى. قازىر قىتاي پاكستانعا قارۋ ساتۋشى ەڭ ءىرى ەلدەر قاتارىندا. اراداعى ساۋدا-ساتتىق جىلىنا 9 ميلليارد دوللاردى قۇرايدى.
پرەزيدەنتتىككە كانديداتتار انىقتالدى
سايلاۋلار مەن رەفەرەندۋمداردى وتكىزۋ ءجونىندەگى قىرعىزستان ورتالىق سايلاۋ كوميسسياسى پرەزيدەنتتىككە كانديداتتار سانى 66 ادامعا جەتكەندىگىن ءمالىم ەتتى. ولاردىڭ ءاربىر التىنشىسى پارتيالاردان ءتۇسكەندەر, ال قالعاندارى ءوزىن ءوزى ۇسىنۋشىلار كورىنەدى.
كانديداتتاردى ۇسىنۋ ۇدەرىستەرى بۇگىن, 16 تامىزدا اياقتالىپ, ودان كەيىن تىركەۋ باستالادى. ساراپشىلار سولاردىڭ تەك بىرەرى عانا جەڭىسكە جەتۋى ىقتيمال دەپ ساناسا, سونىڭ ءبىرى – سوتسيال-دەموكراتيالىق پارتيا تاراپىنان ۇسىنىلعان قازىرگى پرەمەر-مينيستر المازبەك اتامباەۆ. ال قابىلدانعان زاڭ بويىنشا روزا وتۋنباەۆانىڭ پرەزيدەنتتىككە تۇسۋىنە قۇقى جوق.
وباما رەيتينگى قۇلدىراپ بارادى
اقش پرەزيدەنتى ب.وبامانىڭ رەيتينگى تاريحي مينيمۋمعا دەيىن تومەندەپ كەتتى. Callup كومپانياسىنىڭ زەرتتەۋلەرى پرەزيدەنت جۇمىسىنا سەنىمسىزدىك بىلدىرگەن امەريكالىقتار قاتارى 43 پايىزعا جەتكەندىگىن كورسەتكەن.
ازىرگە تۇرعىنداردىڭ 54 پايىزى پرەزيدەنتكە سەنەدى. دەگەنمەن, وباما رەيتينگىسى Standard & Poor’s تاراپىنىڭ اقش رەيتينگىن «ااا»-دان «اا+كە» دەيىن تومەندەتۋىمەن بايلانىستى كورىنەدى. ونىڭ ۇستىنە دەموكراتتار مەن رەسپۋبليكاشىلار اراسىندا مەمقارىزعا بايلانىستى ساياسي قاقتىعىس تا ورىن الىپ, تاراپتار ارەڭ دەگەندە كەلىسىمگە قول جەتكىزىلگەنى ءمالىم.
كاددافي قايتا قارۋلانۋعا شاقىردى
م.كاددافي ليۆيالىقتاردى تاعى دا «ساتقىندار مەن ناتو-عا قارسى قارۋلانۋعا» شاقىردى. ليۆيانىڭ مەملەكەتتىك تەلەارناسى كوسەمنىڭ ءوزىن كورسەتپەي, تەك ونىڭ داۋىسىن عانا تاراتقان. بۇدان كەيىن تۋنيستە كاددافي مەن كوتەرىلىسشىلەر وكىلدەرى اراسىندا كەلىسسوزدەر جۇرگىزىلگەن.
ازىرگە ەكى جاق تا بۇل تۋرالى ءتىس جارماي وتىر. ساراپشىلار ستراتەگيالىق ەز-زاۆيا قالاسىن كوتەرىلىسشىلەردىڭ باسىپ الۋىنان كەيىن كەلىسسوزدەر جۇرگىزىلۋى مۇمكىن دەگەن-ءدى. كاددافي كوتەرىلىسشىلەرمەن كەلىسسوز جۇرگىزبەيتىندىگىن مالىمدەپ كەلسە, ۇلى سەيف ءال-يسلام ليۆيادا شارياتتىق باسقارۋ ەنگىزەمىز دەگەن بولاتىن.
قىسقا قايىرىپ ايتقاندا:
بريتانيانىڭ دجەرسي ارالىنداعى سەنت-حەليەر قالاسىندا بەلگىسىز بىرەۋ التى ادامدى (ەكى ەركەك, ەكى ايەل جانە ەكى بالا) باۋىزداپ كەتكەن. پوليتسيا 30 جاستاعى كۇدىكتىنى تۇتقىنداعان. 90 مىڭداي تۇرعىنى بار ارال ەڭ قاۋىپسىز سانالادى ەكەن.
وڭتۇستىك كاليفورنياداعى Ritz-Karlton قوناق ۇيىنەن قۇنى 250 مىڭ دوللارلىق ايگىلى گوللاندتىق سۋرەتشى رەمبراند ۆان رەيننىڭ تۋىندىسى ۇرلانىپ كەتكەن. قازىر پوليتسيا بەينەجازۋ قۇرالدارىنىڭ جازبالارىن تەكسەرۋدە كورىنەدى.
اۋعانستاندا پارۆان پروۆينتسياسى گۋبەرناتورىنىڭ رەزيدەنتسياسىندا بولعان لاڭكەستىك شابۋىلدان 16 ادام ءولىپ, 29-ى جارالانعان. رەزيدەنتسياعا باسا-كوكتەپ كىرىپ كەلگەن جانكەشتىلەر وزدەرىن جارىپ جىبەرگەن. قازا تاپقانداردىڭ باسىم بولىگى مەملەكەتتىك شەنەۋنىكتەر ەكەن.
پاكستانداعى حۋب قالاسىنىڭ اۋماعىندا اۆتوبۋستىڭ ويپاڭعا قۇلاپ كەتۋى سالدارىنان 20 ادام كوز جۇمىپ, تاعى ءبىرازى ءار ءتۇرلى جاراقاتتار العان. اۆتوبۋستا 80 ادام بولعان, جاراقات العانداردىڭ كوبىسى اۋىر حالدە اۋرۋحاناعا جەتكىزىلىپتى. سوندىقتان قازا تاپقاندار قاتارى ارتۋى مۇمكىن دەلىنۋدە.
بەلورۋسسيا شەكاراشىلارى ەۋروپارلامەنت دەپۋتاتى مارەك ميگالسكيدى پويىزدان ءتۇسىرىپ, ەل ىشىنە جىبەرمەپتى. بەلورۋسسيادا ميگالسكي جەرگىلىكتى قۇقىق قورعاۋشىلارمەن, بەلسەندى ازاماتتارمەن جانە پولياكتار وداعى وكىلدەرىمەن كەزدەسپەك بولسا كەرەك.
ينۆەستور ءارى ەڭ باي ادامداردىڭ ءبىرى ۋوررەن باففەت اقش كونگرەسىنە وسى ەلدەگى ەڭ باي دەگەندەرگە سالىقتى كوبەيتۋ كەرەك دەگەندى ايتادى. ءوزىنىڭ تاپقان تابىسىنىڭ تەك 17,4 پايىزى سالىققا كەتەتىندىگىن جەتكىزگەن ول وزىمەن بىرگە جۇمىس ىستەيتىندەردىڭ ورتاشا العاندا 36 پايىز سالىق تولەيتىندىگىن جازادى.
ينتەرنەت ماتەريالدارى نەگىزىندە ازىرلەندى.
