«ەۋرازيا-2011» كينوفەستيۆالى وسى كۇرەڭ كۇزدە وتەدى

وسىدان ءۇش جىل بۇرىن استاناعا اۋىسىپ, ودان كەيىن الماتىعا قايتا ورالعان حالىقارالىق «ەۋرازيا» كينوفەستيۆالى بيىل جەتىنشى رەت 19-24 قىركۇيەك ارالىعىندا وتپەك. بۇل فەستيۆالعا ۇسىنىلاتىن فيلمدەر قازاق كينەماتوگرافياسىنىڭ سوڭعى جەتىستىكتەرىن بەينەلەمەك. ەلىمىزدە تەك بيىلعى جىلى 27 فيلم ءتۇسى­رىل­گەن بولسا, ونىڭ 12-ءسى وسى باي­قاۋعا جولداما الادى دەپ كۇتىلۋدە. ەكى ايدان كەيىن وتكىزىلەتىن كينو-دۋماننىڭ جاي-جاپسارىنا وراي «ينتەرفاكس-ق­ا­زاق­ستان» اگەنتتىگىندە «ەۋرازيا» حكف-ءنىڭ ۇيىم­داستىرۋ كوميتەتى ارنايى ءباسپاسوز ءماسليحاتىن وتكىزدى. ويتكەنى, انە-مىنە دەگەنشە كەلىپ قالاتىن قىركۇيەك ايى دا الىس ەمەس. وعان قوسا كينوفەستيۆالگە دايىندىق جۇمىستارى بۇگىندە قىزۋ ءجۇرىپ جاتقان كورىنەدى. بۇل تۋرالى باق وكىلدەرىنە «ەۋرازيا» حكف ۇيىمداستىرۋ كوميتەتىنىڭ توراعاسى, ش.ايمانوۆ اتىنداعى «قازاقفيلم» كينوستۋ­دياسى» اق پرەزيدەنتى ەرمەك امانشاەۆ ايتتى. – 19 قىركۇيەك كۇنى مادەنيەت مينيسترلىگى, ش.ايمانوۆ اتىنداعى «قازاقفيلم» اق, كينەماتوگرافيستەر وداعى جانە «ەۋرازيا» حكف ديرەكتسيا­سىنىڭ ۇيىمداستىرۋىمەن بولاتىن كينوفەس­تي­ۆالدىڭ اشىلۋ سالتاناتى وتەدى. شارا جىلداعىداي – «Almaty towers» كەشەنىندە بولادى. فەستيۆال شەڭبەرىندە جۇرەتىن بارلىق ءىس-شارالار مەن كەزدەسۋلەر سول عيمارات پەن ونداعى بەس كينوزالدا وتەدى. قازىر نەگىزگى ۇيىمداستىرۋ جۇمىستارى اياقتالدى. باعدارلاما اۋقىمدى بولماق. شىلدە ايىنىڭ سوڭىندا فەستيۆال بايقاۋىنا قاتىساتىن نەگىزگى كارتينالار بەلگىلى بولادى. كونكۋرسقا 12 كارتينا قاتىسادى, – دەدى ول. جانە «ەۋرازيا-2011» كينوفەستيۆالىنىڭ حالىق­ارا­لىق قازىلار القاسىن اتاقتى وڭتۇستىككورەيالىق رەجيسسەر كيم كيدۋك باسقاراتىنى بەلگىلى بولىپ وتىر. ونىڭ «اريرانگ» اتتى سوڭعى كارتيناسى «ەرەكشە وقيعا» باعدارلاماسى بويىنشا كور­سەتىلمەك. – قازىلار القاسىنىڭ قۇرامىنا سونداي-اق, ايگىلى جاپون رەجيسسەرلەرىنىڭ ءبىرى يويچي ساي (2007 جىلى ونىڭ «قان مەن سۇيەك» ءفيلمى «ەۋرازيا» كونكۋرسىنا قاتىسقان), رەسەي حالىق ءارتىسى, رەجيسسەر ۆلاديمير حوتينەنكو جانە ايگىلى فرانتسۋز اكتەرى, رەجيسسەر جانە سازگەر جيل مارشان بار, – دەدى ۇلتتىق ستۋديا باسشىسى. ونىڭ ايتۋىنشا, كينوفەستيۆال بارىسىندا حالىقارالىق كونكۋرسپەن قاتار, «قارقىندى دامىپ كەلە جاتقان قازاق كينوسى – 2010 جىلدىڭ سوڭى مەن 2011 جىلى تۇسىرىلگەن فيلمدەر», «حالىق­ارالىق كينوفەستيۆالدەردىڭ جۇلدەگەر فيلمدەرى», «ۆيرتۋالدى باتىس», «وزگەرمەلى شىعىس», «اقش ەلشىلىگى ۇسىنعان دەرەكتى فيلمدەر باعدار­لاماسى», «ۆەنەتسيالىق كينوفەستيۆال جاڭعى­رىعى» باعدارلامالارى ۇسىنىلاتىن بولادى. ەۋرازيا كينو كەڭىستىگىندە قۇلاشىن جايىپ كەلە جاتقان كينو-بايقاۋدىڭ بۇلجىمايتىن ءبىر ءداستۇرى – الەمگە اتى ءماشھۇر كينو ساڭلاقتارىمەن كوزبە كوز قاۋىشتىرۋى. بيىلعى جىلى دا «ەۋرازيا» كينوفەستيۆالىنە الەمدىك كينو جۇلدىزدارى  كەلەدى. وسى فەستيۆالدىڭ نەگىزگى قوناق­تارى­نىڭ ارا­سىن­دا «وسكار» سىيلىعىنىڭ جۇلدەگەرى, فرانتسۋز اكتري­ساسى جيۋلەت بينوش, امەريكاندىق اكتەر, پروديۋسەر ءارى ستسەناريست, «شانحايداعى تال­تۇس», «شاقى­رىل­ماعان قوناقتار», «ول, مەن جانە ونىڭ دوستارى» فيلمدەرىنىڭ كەيىپكەرى وۋەن ۋيلسون دا بار. ءبىر ايتا كەتەتىن ءجايت, وتكەن جىلى «ەۋرا­زيانىڭ» كونكۋرستىق باعدارلاماسىنا ۇسىنىلعان 15-كە تارتا وتاندىق فيلمدەر ىشىنەن ىرىكتەلگەن ا.ساتاەۆ­تىڭ«اداسقاندار» مەن ف.ءشارىپوۆتىڭ «قىز­عىلت قويان تۋرالى اڭىز» فيلمدەرى قاتىسىپ, كينوگەرلەر تاراپىنان لايىقتى باعالانعان بو­لا­تىن. ال بيىل ەكرانعا جولداما العان فيلمدەر ءىشى­نەن ر.ابدىراشەۆتىڭ «بالالىق شاعىمنىڭ اسپا­نى», ە.كونچالوۆسكيدىڭ ەكشن-فيلم زاڭدارى بو­يىنشا تۇسىرىلگەن «ا-عا قايتا ورالۋ», ا.سا­تاەۆ­تىڭ «ليكۆيداتور», س.تاۋەكەلوۆتىڭ «جەرۇيىق», ە.نۇر­مۇ­حام­بەتوۆتىڭ «اڭشى بالا» جانە د.سا­لا­مات­تىڭ «كىشكەنتاي» فيلمدەرىن ەرەكشە اتاپ وتۋگە بولادى. ال, گ.ناسىروۆتىڭ «گاككۋ», ج.پو­شا­نوۆ­تىڭ «جەل قىزى» جانە ت.بايتۇكەنوۆ پەن ت.قا­سىمجانوۆتىڭ «سۋپەرباحا» فيلمدەرى اي­رىقشا كينەماتوگرافيالىق ادىستەرىمەن ەرەكشەلەنەدى. بۇل ورايدا, اتالمىش فيلمدەردىڭ حالىقارالىق باي­قاۋعا قاتىسۋى مۇمكىندىگى ءسوز بولدى. ايناش ەسالي, الماتى.