قازاقتىڭ ءسوزىن قورلاۋ ءوزىن قورلاۋ ەمەس دەپ كىم ايتا الادى؟

«ەگەمەن قازاقستاننىڭ» 7 ماۋ­سىمداعى نومىرىندە «قانىڭ قالاي قايناماس؟!» ايدارىمەن «مۇنان اس­قان قورلاۋ بولا ما؟!.» اتتى ماتەريال  جاريالاندى. وندا كوك­شە­تاۋدىڭ قالالىق «ستەپنوي ماياك» گازەتىنىڭ «جيلە بومجا-كازاحا» دە­گەن كروسسۆورد باسقانى, ءبىر­قاتار اۋداندىق گازەتتەر «حابار» تەلە­ار­ناسىنىڭ 31 مامىر­داعى ءجا­نە 5 ماۋ­سىمداعى باعدار­لا­ما­سىندا جۇ­ما­باەۆ جانە جۇما­دىلوۆ فامي­ليالارىن «پياتنيتساباەۆ» جانە «ءپياتنيتسادىلوۆ» دەپ شىعار­عاندارى ايتىلعان. باقساق باقا ەكەن دەمەكشى, ال­عاشقى گازەت كروسسۆوردتى رەسەيلىك جۋرنالدان كوشىرىپ الىپ­تى, سوڭعىلارىنا تەلەباعدارلاما جو­عارىدان تۇسەدى ەكەن. وبلىس, قالا باسشىلارى دا وسىلاي دەيتىن بولار. بىراق گاپ باسقادا عوي. قازىر كروسسۆوردتان كوپ ەش نارسە جوق, دەگەنمەن كوردىڭىز بە, «ستەپنوي ماياك» ءبىر ءسوز ارقىلى بۇكىل ءبىر ۇلت­تى قورلايتىن كروسسۆوردتى كو­شى­رىپ باسقانىن. ىشكى ارام ويىن شىعارا الماي جۇرگەن ءبىر پاسىق رە­سەيلىك جۋرنالدى پايدالانا قوي­عان. جارايدى, رەسەيلىك جۋرنال ءما­سەلەسىن ەلىمىزدىڭ ماسكەۋدەگى ەلشىلىگىنە, سىرتقى ىستەر مينيسترلىگىنە قالدىرايىق, قازاق ۇلتىن قورلاي­تىن كروسسۆوردتىڭ جاريالانۋىنا, ماعجان جۇماباەۆتىڭ فاميليا­سىن «پياتنيتساباەۆ» دەپ قاتە جا­زىپ, ار-نامىستى تاپتاۋعا كوكشە­تاۋ قالالىق جانە اقمولا وبلى­سى­نىڭ بىرقاتار اۋداندىق پروكۋرا­تۋرالارى نە دەر ەكەن؟ ال قازاق ءسوزىن قورلاۋدىڭ ءجا­نە ءبىر كورىنىسىن «ۆرەميا» گازەتى دە بايقاتىپ ءجۇر. قازاقتىڭ «باستىق» دەگەن سوزىنەن شىعاتىن «باسەكە» دەيتىن ءسوز بار. جاقتى­رى­ڭىز, جاق­تىرماڭىز, ءسوزدىڭ بار ەكەندىگى انىق. ال «ۆرەميا» قىز­مەت­ك­ەرلەرى وسى سوزگە بارىنشا جاعىمسىز سيپات بەرىپ, بىرەۋدى سىناۋدىڭ, ءاجۋالاۋدىڭ مىندەتىن وسى «باسەكە» سوزىنە ارتىپ قويدى. ەلىمىزدەگى تەلەارنالار قازىر باس­قا تىلدەردەگى فيلمدەردىڭ قا­زاقشا ءتيترىن بەرەتىن بولىپ ءجۇر. اۋدارمانىڭ ءساتتىسى بار, ءساتسىزى دە بار, بىراق قازاقشا تۇسىنىگىڭ بولا­تىنى بەلگىلى. ال كتك ارناسىندا وسى قازاقشا تيتر سوزدەرىنىڭ ءۇستى­نەن اقىلى حابارلاندىرۋدىڭ ءجۇ­گىرتپە جو­لىن جىبەرۋ ادەتى بار. قا­زاقشا سوزدەر قاجەتسىز دەسە كەرەك. قازىرگى كەزدە باق تاۋەلدى, تاۋەلسىز, رەسمي, بەيرەسمي بولىپ بولىنەدى, الايدا ءبارى دە مەملەكەتتىك مۇددەنى كوزدەۋى قاجەت بولۋى­نا قاراماستان, وسىلاردىڭ كەيبىرى قازاق سوزىنە قاتىستى ويىنا كەلگەنىن ىستەيتىن بولىپ ءجۇر. قازاق ءسوزىن, سول ارقىلى قازاقتىڭ ءوزىن قورلاۋدان ساقتاۋعا ءتيىستى ورگان­دار­دىڭ باسشىلارى مۇندايدى كو­رەتىن ەمەس. سوندا ونداي باس­شى­لار كىمگە كەرەك بولعانى؟ ەرجۇمان سمايىل, زەينەتكەر. استانا.