جولاۋشىلارعا قىزمەت كورسەتۋ سالالىق ستاندارتپەن بەلگىلەنگەن

قازىرگى تاڭدا ەلىمىزدىڭ كولىكتىك باقىلاۋ ورگاندارى تەمىرجولداعى جەكە مەنشىك تاسىمالداۋ كومپانيالارىنىڭ قاۋىپسىزدىك تالاپتارىن مۇقيات ساقتاۋىنا جانە كولىككە سەرۆيستىك قىزمەت كورسەتۋ ساپاسىنا تەكسەرۋ جۇرگىزۋدى جوسپارلاۋدا. ونىڭ ىشىندە جولاۋشىلار ۆاگوندارىن جوندەۋ ىسىنە دە نازار اۋدارىلماق. وسىعان وراي تەمىر جول قوزعالىسى قاۋىپسىزدىگىن قامتاماسىز ەتىپ, كەمشىلىكتەردىڭ الدىن الۋعا باعىتتالعان ءىس-شارالار ايلىعى باستالدى. اتالعان ماسەلەگە بايلانىستى «جولاۋشىلار تاسىمالى» اق «سولتۇستىك» جولاۋشىلار تاسىمالى جونىندەگى ايماقتىق فيليالىنىڭ ديرەكتورى ءشامىل قوجابەكوۆپەن تىلدەسكەن ەدى. – ءشامىل كيم ۇلى, ءوزىڭىز باسقارىپ وتىرعان «سولتۇستىك» جولاۋشىلار تاسىمالى جونىندەگى ايماقتىق فيليالى قاي وڭىرلەرگە قىزمەت كورسەتەدى؟ – «سولتۇستىك» جولاۋشىلار تاسىمالى ءجونىن­دەگى ايماقتىق فيليالى استانا, قاراعاندى (سونىڭ ىشىندە بالقاش), پاۆلودار جانە قوستاناي وبلىس­تارىنداعى ءتورت تەلىمدە قۇراستىرىلعان جولاۋشى­لار پويىزدارىنىڭ 20 باعىتىنا قىزمەت كورسەتەدى. ءبىزدىڭ فيليالدىڭ قۇرىلىمىنداعى تىركەمە ۆاگوندار قازاقستان ىشىندە, سونداي-اق مەملەكەتارالىق باعىتتارعا قاتىنايدى. ماسەلەن استانا – ۆارشاۆا, بالقاش – ماسكەۋ, بالقاش – نوۆوسيبيرسك جانە جازعى ماۋسىمدا استانا – ەكاتەرينبۋرگ, استانا – نوۆوسيبيرسك, استانا – ومبى باعىتتارىنا. – سوڭعى جىلدارى جولاۋشىلارعا سەرۆيستىك قىزمەت كورسەتۋدە قانداي جاڭا باستامالار بار؟ – بۇگىنگى تاڭدا جولاۋشىلار پويىزدارىندا جو­لاۋشىلارعا قىزمەت كورسەتۋ تالابى سالالىق ستاندارتپەن بەلگىلەنگەن. وسىعان وراي سەرۆيستىك قىزمەتتى جاقسارتۋ جونىندەگى جۇمىستار اتقارىلىپ جاتىر. فيليال قۇرىلىمىنداعى 5 جولاۋشىلار پويى­زى ۆاگون-مەيرامحانامەن قامتىلعان. 2010 جىلدان باستاپ استانا – ماسكەۋ باعىتىنداعى №71/72 جولاۋشىلار پويىزىن جايلىلىعى جوعارى دەڭ­گەيلى پويىز مارتەبەسىنە كەلتىرۋ جۇمىستارى اتقا­رىلۋدا. – جولسەرىكتەردى ىرىكتەپ تاڭداۋ ماسەلەسىندە قانداي تاجىريبەلەرىڭىز بار؟ – بىزدە ەڭبەك ەتەتىن جولسەرىكتەردىڭ ورتاشا ستاتيستيكالىق جاسى – 30-45 جاس. ولاردىڭ ورتا-ارناۋلى نەمەسە جوعارى بىلىمدەرى بار. جولسەرىكتەر مىندەتتى وقۋ كۋرستارىنان وتەدى جانە ولاردىڭ ءاربىرىنىڭ دايىندىق كۋرسىن اياقتاۋ تۋرالى سەرتيفيكاتتارى نەمەسە كۋالىكتەرى بار. – جولاۋشىلارعا سەرۆيستىك قىزمەت كورسە­تۋدە سىزدەردە قانداي پروبلەمالى جايلار بار؟ ونى تۇزەتۋدىڭ قانداي جولدارىن ۇسىناسىز؟ – سەرۆيستىك قىزمەتتىڭ ەڭ ۇلكەن پروبلەماسى – بۇگىنگى كۇنگە ساي جاڭا جولاۋشىلار ۆاگوندارىنىڭ بولماۋى. وسىعان وراي استانادا جولاۋشىلار ۆاگونىن قۇراستىرۋ زاۋىتىن ىسكە قوسۋدى جەدەلدەتۋ قاجەت. ال قازىرگى ءسات ءۇشىن تۆەر ۆاگون قۇرىلىس زاۋىتىنان 22 جولاۋشىلار ۆاگونىن ساتىپ الۋ – قۇپتارلىق قادام. بۇل استانا مەن اتىراۋ اراسىنداعى قاتىناستى دامىتۋعا مۇمكىندىك تۋعىزادى. بۇل ۆاگوندار سوڭعى تەحنيكالىق جانە سەرۆيستىك تالاپتارعا ساي. سونىڭ ىشىندە جەكە كوتەرمەسىمەن مۇگەدەكتەرگە ارنالعان كۋپە دە بار. قازىرگى كەزدە جولاۋشىلارعا سەرۆيستىك قىزمەت كورسەتۋدە جۇردەك جولاۋشىلار پويىزدارىنىڭ ماسەلەسىن شەشۋ ماڭىزدى بولىپ تۇر. – جولاۋشىلار كوبىنە جولسەرىكتەردىڭ جولاۋ­شىلاردى «بيلەتسىز» ورنالاستىراتىندىعىنا شاعىم ايتىپ جاتادى. ونى قالاي جويۋعا بولادى؟ – بۇل جاعدايدا, قازاقستان رەسپۋبليكاسىنىڭ تەمىر جول كولىگىمەن جولاۋشىلاردى, جۇكتى جانە اۋىر جۇكتى تاسىمالداۋ ەرەجەسىن بۇزعان پويىز بريگاداسىنىڭ قىزمەتكەرلەرىنە جۇمىستان بوساتۋعا دەيىن اپاراتىن تارتىپتىك شارانىڭ ەڭ قاتاڭ تۇرلە­رىن قولدانۋ الايدا, قۇقىقتىق بازا جولاۋشىلارعا قىزمەت كورسەتۋ سالاسىندا ءبىر رەت جىبەرگەن ءتارتىپ بۇزۋشىلىق ءۇشىن ەڭبەك شارتىن بۇزۋدى قاراستىر­مايدى. سوندىقتان تارتىپكە شاقىرۋ شارالارىن دەڭگەيىمەن قولدانۋعا تۋرا كەلەدى. جولاۋشىلار پويىزدارىن تەكسەرۋدى ۇيىمداستى­رۋدىڭ يكەمدى كەستەسى ەنگىزىلگەن. ينسپەكتورلار ارقىلى جولاۋشىلار پويىزدارىن تەكسەرۋدىڭ بەكىتىلگەن كەستەسىنەن باسقا, كەشەندى كوميسسيالاردىڭ كەنەتتەن تەكسەرۋ جانە جەلىگە شىعۋ ادىستەرى دە قولدانىلادى. وسىعان ۇقساس مەرزىمدى سالىستىرعاندا جولاۋشىلاردىڭ شاعىمدانۋ سانى ەداۋىر ازايدى. جولاۋشىلار كوبىنەسە ۆاگونداردىڭ توزىعى جەتكەندىگىنە شاعىمدانادى. – قازىر سىزدەردىڭ كاسىپورىندارىڭىزدا بارلىق جولسەرىكتەر بىرىڭعاي كيىم ۇلگىسىمەن قامتىلعان با؟ – شىنىندا, وسى جىلعا دەيىن جولسەرىكتەردى كيىم­مەن قامتۋدا كەمشىلىكتەر بولعان ەدى. وسى ۋاقىتتا ۇلتتىق ويۋ-ورنەكتى قوسىپ, بىرىڭعاي ديزاين­مەن كيىم تىگۋگە شارت جاساستىق. ءبىر-ەكى جىلدىڭ ىشىندە جاعداي تولىق تۇزەلەدى. – اڭگىمەڭىزگە راحمەت. اڭگىمەلەسكەن: ءابدىراحمان قىدىربەك.