جاس ينسپەكتورلار سلەتى

بۇگىنگى تەحنيكانىڭ دامىعان شاعىندا جول قوزعا­لى­سىنىڭ قيىندىعىن باستان كەشىرمەگەن جان كەمدە-كەم. ءتىپتى, ادامنىڭ ومىرىنە قاۋىپ توندىرەتىن جايلار دا جيىلەپ بارادى. دەمەك, جول-كولىك وقيعاسىنىڭ الدىن الۋ, ەرەجە ساقتاۋدى ۇيرەتۋدىڭ ماڭىزى ەرەكشە ەكەنى انىق. وسى ورايدا مەكتەپ جاسىنداعى بۇلدىرشىندەردىڭ جول ءجۇرۋ قاۋىپسىزدىگى مەن ەرەجەلەرىن ساناعا ءسىڭىرۋ جايى باستى مىندەت. ونىڭ نەگىزىن جاس ينسپەكتورلار اراسىندا وتكىزىلەتىن ءتۇرلى بايقاۋلار ارقىلى دامىتۋ قولعا الىنعانى قۋانتادى. تالعار اۋدانى, پانفيلوۆ اۋىلىنداعى سپورت كەشەنىندە «قوزعالىس» جاس ينسپەكتورلاردىڭ ءحى حالىقارالىق سلەتى وسى يگى ىسكە باستاما بولدى. تاۋەلسىزدىكتىڭ 20 جىلدىعىنا وراي ۇيىمداستىرىلعان جاس ينسپەكتورلار سلەتىنە رەسەي, قىرعىزستان مەملەكەتتەرىنەن جانە ەلىمىزدىڭ بارلىق وب­لىس, قالالارىنان 20 كومانداعا بىرىكتىرىلگەن 200 بالا قاتىسۋدا. سلەتتە ەلىمىزدىڭ كوكبايراعى جەلبىرەپ, ءانۇرانى شىر­قالدى. شاراعا ىشكى ىستەر مينيسترلىگى جول پوليتسياسى كو­مي­تەتىنىڭ جاۋاپتى قىزمەتكەرلەرى قاتىسىپ, سلەتتىڭ ءبۇل­دىر­شىندەردىڭ جولدا ءجۇرۋ ساۋاتىن اشۋ مەن قاۋىپسىزدىك ەرەجەلەرىن ساقتاۋىنا ەرەكشە ىقپال ەتەتىندىگىنە توقتالىپ, كوماندالارعا ساتتىلىك تىلەدى. الاتاۋ بوكتەرىندە بەس كۇنگە سوزىلاتىن جاس ينسپەكتورلار سلەتى ءتۇرلى باعدارلامالار اياسىندا جۇمىستارىن باستاپ كەتتى. شەتتەرىنەن شىمىر, بەلسەندى بالالار بويلارىنا قونىمدى كيىمدەرىمەن ءوزارا باسەكەنى قىزدىرۋدا. كۇمىسجان بايجان. الماتى وبلىسى.