ءوزىمىزدىڭ ۇلتتىق بايلانىس جانە حابار تاراتاتىن سپۋتنيگىمىزدىڭ بولۋى تىركەلگەن سپۋتنيكتىك بايلانىس ارنالارىندا ەلىمىزدىڭ قاجەتتىلىكتەرىن قاناعاتتاندىرۋعا, ەلىمىزدىڭ اقپاراتتىق قاۋىپسىزدىگىن قامتاماسىز ەتۋگە, شەت ەلدەرگە كەتەتىن اقشالاي قاراجات اعىمىن ازايتۋعا مۇمكىندىك بەرەدى.
«KazSat-3» ۇلتتىق سپۋتنيگىنىڭ رەسۋرستارىن قولدانىسقا بەرگەن ءۇش جىل ىشىندە ونى 9 مەملەكەتتىك ورگان مەن كوممەرتسيالىق ۇيىم پايدالانۋدا. وتكەن جىلى شەتەلدىك بايلانىس جانە حابار تاراتاتىن عارىش اپپاراتىن قازاقستان رەسپۋبليكاسىنىڭ ۇلتتىق تەلەوپەراتورلارىنا كوشىرۋ تولىعىمەن اياقتالعان بولاتىن.
بۇگىندە «KazSat-3» سپۋتنيگىنىڭ نەگىزىندە قازاقستاننىڭ بارلىق اۋماقتارى بويىنشا SD, HD, UHD فورماتىندا ساندىق تەلەراديوحابار قامتاماسىز ەتىلدى. «قازتەلەراديو» اق تەلەراديوحابار سالاسىنداعى ۇلتتىق وپەراتور قازىرگى ۋاقىتتا «OTAU TV» سپۋتنيكتىك تەلەراديوحابار باعدارلامالارىنىڭ پاكەتىن ترانسلياتسيالايدى.
سپۋتنيك قىزمەتىنىڭ HD-فورماتىنداعى تەلەارنالار پاكەتىن رەسپۋبليكامىزدىڭ بارلىق اۋماعى بويىنشا ترانسلياتسيالاناتىن Caspio HD وپەراتورى, سونداي-اق, HVEC فورماتىندا حابار تاراتاتىن «الما تۆ» كومپانياسى پايدالانادى. بۇل فورمات ارنالاردىڭ سانىن جانە ولاردىڭ ساپاسىن ارتتىرۋعا, HD جانە Ultra HD (4K) ارناسىن ترانسلياتسيالاۋعا مۇمكىندىك بەرەدى.
«KazSat-3» سپۋتنيگىن جاساۋ كەزىندە اپپاراتتىڭ سيپاتتاماسىن جانە سەنىمدىلىكتىڭ قاجەتتى دەڭگەيىن قامتاماسىز ەتۋگە مۇمكىندىك بەرەتىن زاماناۋي تەحنيكالىق شەشىمدەر قولدانىلعان بولاتىن. بۇگىندە سپۋتنيكتىڭ قامتۋ ايماعى قازاقستاننىڭ, قىرعىزستاننىڭ, وزبەكستاننىڭ, تاجىكستاننىڭ, تۇرىكمەنستاننىڭ, سونىمەن قاتار, رەسەيدىڭ ورتالىق بولىگىنىڭ اۋماقتارىنا تارالعان.
عارىش اپپاراتىن باسقارۋدى اقمولا وبلىسىنىڭ اقكول قالاسىنداعى عارىش اپپاراتتارىن جەر ءۇستى باسقارۋ كەشەنىنىڭ جانە الماتىداعى «كوكتەرەك» عارىش اپپاراتتارىن باسقارۋ رەزەرۆتىك كەشەنىنىڭ جاڭا تەحنيكالىق قۇرالدارىن پايدالانا وتىرىپ, قازاقستان رەسپۋبليكاسى قورعانىس جانە اەروعارىش ونەركاسىبى مينيسترلىگىنىڭ اەروعارىش كوميتەتى «رەسپۋبليكالىق عارىشتىق بايلانىس ورتالىعى» اق-تىڭ («رعبو» اق) جوعارى بىلىكتى ماماندارى جۇزەگە اسىرادى.
«رعبو» اق ۇجىمى ەلىمىزدىڭ تاۋەلسىز تەلەكوممۋنيكاتسيالىق نارىعىن ودان ءارى دامىتۋ ءۇشىن «KazSat» بايلانىس جانە حابار تاراتۋ سپۋتنيكتەرىنىڭ قازاقستاندىق ۇلتتىق توپتامالارىن دامىتۋ بويىنشا جۇمىستى بەلسەندى جالعاستىرىپ كەلەدى.
