مۇنان اسقان قورلاۋ بولا ما؟!.

وتكەن اپتادا اقمولا وبلىسىندا قازاقتىڭ تومەنشىكتەۋى ارتتا قالدى ما دەگەن ءتىلى, ەندى ەشكىمگە تابا بولماسپىز دەگەن ار-نامىسى ۇلكەن سوققىعا دۋشار بولدى. ول سوققىنى بىزگە ءبى­رىنەن سوڭ ءبىرى اراعا بىرەر كۇن سالىپ وسى وڭىردەگى جەرگىلىكتى باسىلىمدار جاسادى. بۇقارالىق اقپارات قۇرالدارىندا مۇن­داي ماسقارالىقتى, تۇتاس ءبىر ۇلتتى قورلاۋدىڭ ەڭ سوراقى كو­رىنىسىن كەشەگى ايۋداي اقىرعان كەڭەس زامانىندا دا كورمەپ ەدىك. اركىمگە ءبىر ءيىلىپ توسەك, جاي­ىلىپ جاستىق بولعان ءوزىمىز  ناشارمىز با, جوق الدە, ءبىز قان­شا باۋىرىمىزعا تارتقانمەن, پيعىل سونداي ما, تۇسىنە الماي وتىرمىز. ايتالىق, كەشەگى كوك­شەتاۋ وبلىسىنان قالعان ەسكى كوز عوي دەپ ءوزىمىز انا تىلىندەگى «كوكشەتاۋ» گازەتىنەن كەم كور­­مەي­تىن قالالىق «ستەپنوي ماياك» گازەتىنە 2011 جىلدىڭ 26 مامىرىنداعى №21 سانىندا «جيلە بومجا-كازاحا» دەگەن كروس­سۆوردتى جاريالاپ, سونشا نە كورىندى؟!. (ولار رەسەيلىك جۋرنالدان ەش وزگەرىسسىز كوشىرىپ ال­عان ەكەن). بومج ءسوزىنىڭ توركىنى ءتۇسى­نىك­تى. بەلگىلى ءبىر تۇراعى جوق قاڭ­عىباس. وسى ەل مەن جەردىڭ يەسى قازاقتى بومج-عا, ال بۇكىل اتا-بابامىز, سونىڭ ىشىندە الەمدى اۋ­زىنا قاراتقان تالاي عۇلاما­لا­رى­مىز دۇنيەگە كەلگەن قاسيەتتى كيىز ءۇيىمىزدى سول بومج-دىڭ تۇ­را­­عى­نا تەڭەپ, قانىڭدى باسىڭا تەپكىزەتىن بۇل باسىلىمدى وسى­دان كەيىن سوتقا بەرسە دە وبال جوق. شىركىندەردىڭ اقىرى كوشى­رىپ باسىپ وتىرعاسىن بومج ءسوزىن, تىم قۇرىسا, كوشپەندىلەر ءسوزى­مەن  الماستىرۋعا ورەلەرى جەتپەگەنى مە؟!. ەلباسىنىڭ ساياسا­تىن جۇرگىزەدى دەگەن, بيۋدجەتتەن قارجى الاتىن مەملەكەتتىك با­سى­لىمنىڭ ءوزى وسىنى ىستەپ وتىرسا, باسقالارىنا نە جو­رىق؟!. بۇل  ەكى ورتادا وبلىستا شى­عاتىن جەرگىلىكتى باسىلىمداردا جاريالانعان 30 مامىر - 5 ماۋ­سىم ارالىعىنداعى تەلەديدار باع­دارلاماسىندا دا ءوڭىڭ تۇگىل تۇسىڭە كىرىپ شىقپايتىن سۇمدىق جاعدايلار ورىن الىپ: «كىم-كورىنگەنگە قولجاۋلىق بولعان وسى ءبىز كىمبىز؟» دەگەن توتە سۇراق ەكى-ءۇش كۇننەن بەرى ميىمىزدى كەمىرۋدە. ايتالىق, كوكشەتاۋ قالالىق تاۋەلسىز «كۋرس», بۋراباي اۋدان­دىق «بۋراباي», «لۋچ», ەڭبەك­شىل­دەر اۋداندىق «جاڭا ءداۋىر», «سەل­­سكايا نوۆ» سياقتى گازەت­تەردىڭ بەتتەرىندەگى «حابار» تەلەارناسىنىڭ سەيسەنبى, 31 مامىر كۇنگى باعدارلا­ما­سىن­داعى «ماعجان جۇماباەۆ» دەرەكتى ءفيلمى «ماع­جان پياتنيتساباەۆ», ال, جەكسەنبى, 5 ماۋ­سىم كۇنگى باعدارلاماسىنداعى «با­قىت­جان ءجۇمادىلوۆتى ەسكە الۋ كەشى» «باقىتجان ءپياتنيتسادىلوۆتى ەسكە الۋ كەشى» بولىپ جار­تىلاي قازاقشا, جارتىلاي ورىس­شا شا­تىلىپ-بۇتىلىپ, مى­نا قۇبى­جىق­قا نانار-نانبا­سى­مىز­دى بىلمەي, دال بولىپ وتىر­عان  جايىمىز بار. «ءتىل تۋرالى» العاشقى زاڭ­نىڭ قابىلدانعانىنا بيىل اتتاي 22 جىل. الداعى جەلتوقسان­دا تاۋەل­سىزدىگىمىزدىڭ جاريالان­عا­نىنا 20 جىل تولماقشى. سوندا جەتكەن جەرىمىز وسى ما؟ ءبىز «ءجا» دەپ باياعى ۇيرەنشىكتى سى­ڭاي تانىتقانى­مىزبەن, سول ءناۋ­بەتتە جازىقسىز­دان جازىق­سىز اتىلىپ كەتكەن ماع­­جان اقىن ارۋاعى جاي كۇنگە دە ەمەس, ءدال 31 مامىر – ساياسي قۋ­عىن-سۇرگىن قۇرباندارىن ەسكە الۋ كۇنىنە ءدوپ كەلگەن بۇل ساي­قى­ما­زاق­تىقتى قا­لاي كەشەدى؟!.  سون­دىق­تان, ەگەر تاۋەلسىز ەل ەكەنىمىز راس بولسا, بۇدان بىلاي تۇ­تاس ءبىر ۇلت­تىڭ نامىسىن قورلاي­تىن مۇن­­داي ار­سىزدىقتارعا ءۇزىلدى-كەسىلدى تى­يىم سالاتىن ۋاقىت جەتتى. ال, ەندى  «جۇمانىڭ» ور­نى­نا ادام­نىڭ ويىنا كىرىپ شىق­پاس قايداعى جوق «پياتنيتسالار» وسى گازەتتەردىڭ (مۇمكىن, جال­عىز بۇل باسىلىمداردىڭ ەمەس, رەسپۋب­لي­­كا­مىزدا شىعاتىن باس­قا گا­زەت­تەر­دىڭ دە)  بەتتەرىندە قالاي ءورىپ كەتكەن؟ ول كىمنىڭ, قاي اران­دا­تۋشى­نىڭ ءىسى؟!. جوپەل­دە­مەدە مۇنىڭ انىق-قانىعىنا جەتە الماي وتىر­مىز. بىراق, قايت­كەن كۇندە دە جەتىپ, ءبىر شارا قولدان­با­ساق, ەلدىگىمىزگە سىن. قا­زاق تىلىنە قارسى تالاي قۇقاي­دى كور­گەنىمىزبەن, تاپ مى­ناداي شەكتەن شىعۋشىلىق ەستە جوق. مۇندايدا ادال پەيىلدى ورىس­تىلدى باسىلىمدارعا قىر­ا­عى­لىق تانىتپاسا بولمايدى. «كۇل بول­ما­ساڭ, ءبۇل بول» دەۋ ءجونسىز. ابى­روي بولعاندا, وب­لىس­تىق «ارقا اجارى», تاعى باسقا گازەتتەردە بۇل قاتەلەرگە جول بەرىلمەي, بەتكە سالىنعان جەرىنەن تۇزەتىلگەن.  ال, جوعا­رى­دان ءتۇ­سەتىن تەلەديدار باع­دار­لا­ما­لارى وقىلماي, دايىن­عا سەنىپ, سول كۇيى شىعىپ جاتا­تىن وزگە  با­سىلىمداردا وسى  وس­پا­دار قال­پىن­دا  كەتىپ قال­عان. سوندا قاپ­تاعان كەزەكشى رەداكتور, كوررەكتور, باس رەداكتور اي باعىپ وتىرعان با؟! الدە بۇل قاساقانا جىبەرىلگەن قاتە مە؟.. قايىرباي تورەعوجا, جۋرناليست. كوكشەتاۋ.