كەشكىسىن شىعاتىن تەمىر جول كولىگى تۇنىمەن ءجۇرىپ تاڭەرتەڭگىلىكتە جەتەدى. ال اۆتوبۋستار 10-12 ساعات تەڭسەلتىپ بارىپ تابان تىرەيدى. قازىرگىدەي ۋاقىت تىعىز, شارۋا كۇيگەن شاقتا اسىعىس جولاۋشىلارعا بۇل قولايسىز بولىپ كەلگەن ەدى. ەندى جاعداي وزگەرىپ وتىر. قاراعاندىدان جەزقازعانعا, بالقاشقا, ول جاقتان ىلە كەرى سامعايتىن ۇشاقتار ارقىلى وسى ارادا قاتىناۋعا 1,5 ساعات عانا جۇمسالاتىن بولدى. بۇدان بىلاي قاراي ەت پىسىرىمدەي ۋاقىتتا ۇيدە وتىرۋعا, نە ءىستى ءبىر كۇندە ءبىتىرىپ قايتۋعا مۇمكىندىك بار. الداعى ۋاقىتتا بالقاشتان استاناعا, استانادان بالقاشقا ۇشاتىن رەيس تە اشىلعالى تۇر.
ايقىن نەسىپباي, قاراعاندى.
وقۋ سەرتيفيكاتتارى تاپسىرىلدى. اسىراۋىندا بالالارى بار «اسىل انا» وبلىستىق ۇيىمى كەمتار انالارعا جان-جاقتى قاراسۋدى ماقسات تۇتادى. 14 جىل ىشىندە قىرۋار ىستەر اتقاردى. قوعامنىڭ ءتورايىمى ت. سارسەكەەۆا مۇگەدەكتىگىنە قاراماستان, بالالارعا شاتتىق سىيلاۋدى جالعاستىرىپ كەلەدى. جۋىردا ونىڭ ۇيىمداستىرۋىمەن پەتروپاۆل قالالىق مادەنيەت ۇيىندە «ەرەسەكتەر مەن بالالار – اجىراماس دوستار» اتتى شارا ءوتتى. اكتسياعا قوعامدىق ۇيىم, اكىمدىك وكىلدەرى قاتىسىپ, بالالارعا سىيلىقتار ۇلەستىردى. كىشكەنتاي بۇلدىرشىندەر دە سىي-سياپاتسىز قالمادى. وبلىستىق بالالار قۇقىعىن قورعاۋ دەپارتامەنتىنىڭ ديرەكتورى ۆلاديمير ليتۆينەنكو تەڭدىك شايقىقىزىنىڭ جانكەشتى دە تىنىمسىز ەڭبەگىن جوعارى باعالاپ, العىس حات تاپسىردى. بيىل 9 سىنىپتى بىتىرگەن بالالاردىڭ كوللەدجدەردە تەگىن وقىتىلاتىنىن مالىمدەپ, بىرقاتارىنا سەرتيفيكات بەردى.
ءومىر ەسقالي,سولتۇستىك قازاقستان وبلىسى.
دوستىعى جاراسقان ءوڭىر. وتكەن اپتادا وبلىس ورتالىعىندا «ەرتىس – دوستىق وزەنى» اتتى حالىقارالىق فەستيۆال كۇندەرى اياقتالدى. بۇل بيىلعى جىلعى ەل تاۋەلسىزدىگىنىڭ 20 جىلدىعىنا ارنالدى. ەستاي اقىن اتىنداعى قالالىق مادەنيەت سارايىنا فولكلورلىق-ەتنوگرافيالىق انسامبلدەر مەن جەكە ورىنداۋشىلار جينالدى. بۇل مەرەكەگە ۇلى وزەن جاعاسىندا ورنالاسقان ومبىنىڭ ء«مولدىر» ءانسامبلى, ەلىمىزدىڭ شىعىس قازاقستان وبلىسى مەن كەرەكۋ ءوڭىرىنىڭ ونەرپازدارى شاقىرىلدى. وبلىس اكىمىنىڭ ورىنباسارى ءاليا عالىموۆا فەستيۆالعا ءسات-ساپار تىلەدى. ونەر ۇجىمدارى ءبىر وزەن بويىندا تۇراتىن ءارتۇرلى ۇلت وكىلدەرىنىڭ دوستىعى مەن تاتۋلىعىن قوبىزبەن دە, دومبىرامەن دە, اۋەلەگەن اندەرمەن دە شىرقادى. ءۇش كۇنگە سوزىلعان فەستيۆال سوڭى گالا-كونتسەرتكە ۇلاستى.
فاريدا بىقاي, پاۆلودار.
جەمقورلىقتىڭ قاي تۇرىنە دە جول جوق. تاراز قالاسىندا «نۇر وتان» حدپ الماتى, قىزىلوردا, وڭتۇستىك قازاقستان, جامبىل وبلىستىق جانە الماتى قالالىق فيليالدارىنىڭ پارتيالىق باقىلاۋ كوميسسيالارى مەن جەمقورلىقپەن كۇرەس جونىندەگى قوعامدىق كەڭەس باسشىلارىنىڭ قاتىسۋىمەن سەمينار-كەڭەس بولىپ ءوتتى. وندا پارتيالىق باقىلاۋدى جانە جەمقورلىققا قارسى ءىس-ارەكەتتەردى ۇيىمداستىرۋدىڭ تۇرلەرى مەن ادىستەرى, باسىم باعىتتارى ءسوز بولدى. سونداي-اق, سەمينار-كەڭەس بارىسىندا وتكەن دوڭگەلەك ۇستەلگە پارلامەنت سەناتىنىڭ دەپۋتاتى, جەمقورلىقپەن كۇرەس جونىندەگى رەسپۋبليكالىق قوعامدىق كەڭەستىڭ توراعاسى و.ابدىكارىموۆ, «نۇر وتان» حدپ جامبىل وبلىستىق فيليالىنىڭ توراعاسى ق.بوزىمباەۆ قاتىسىپ, جەمقورلىققا قارسى كۇرەس جۇمىستارىنىڭ جايى تۋرالى باياندادى.
كوسەمالى ساتتىباي ۇلى, جامبىل وبلىسى.
كوكشەدەگى اۋديو-تاكتيلدى كەشەن. كوكشەتاۋ قالالىق زاعيپ جانە ناشار كورەتىن ازاماتتارعا ارنالعان كىتاپحانا مەن رەسەيدەگى ءنوۆوسىبىر وبلىستىق ارناۋلى كىتاپحاناسى اراسىنداعى بەس جىلدىق ىنتىماقتى بايلانىس نىعايىپ كەلەدى. جۋىردا «كوكشەتاۋ-ءنوۆوسىبىر: تاريحقا جاناسۋ» اتتى اۋديو-تاكتيلدى كەشەننىڭ تۇساۋى كەسىلدى. «نۇر وتان» حدپ وبلىستىق فيليالىنىڭ, ىشكى ساياسات باسقارماسىنىڭ, وبلىس اۋماعىنداعى 7 ارناۋلى كىتاپحانانىڭ قىزمەتكەرلەرى مەن قالا جۇرتشىلىعى قاتىسقان باسقوسۋدا الەۋمەتتىك جوبانىڭ اۆتورى ءنوۆوسىبىر ارناۋلى كىتاپحاناسىنىڭ ديرەكتورى, رف نواك اسسوتسياتسياسى جەتەكشىسىنىڭ ورىنباسارى يۋري لەسنوۆسكي كەشەن قىزمەتىنىڭ پايدالى اسەرلەرى جايىندا اڭگىمەلەپ, تاجىريبەلىك ساباق وتكىزدى. اقمولا وبلىستىق زاعيپتار قوعامىنىڭ توراعاسى دۇيسەمباي اقىشەۆ, بۇلاندى اۋداندىق فيليالىنىڭ باسشىسى سەرىك اكىمباەۆ, لۋي برايل جۇيەسى بويىنشا وبلىستىق بايقاۋدىڭ جەڭىمپازى حاكيم قاپيزوۆ رەسەيلىك ارىپتەستەردىڭ يگى قادامدارىنا ريزاشىلىعىن ءبىلدىردى.
باقبەرگەن امالبەك. اقمولا وبلىسى.
مەرەكەگە باسسەين تارتۋ ەتتى. بالالاردى قورعاۋ كۇنى وڭتۇستىكتە لايىقتى اتالىپ ءوتتى. “بۇگىنگى بۇلدىرشىندەر – قازاقستاننىڭ ەرتەڭى. سوندىقتان ولارعا قاجەت دۇنيە بۇگىندەرى دايىن بولۋى كەرەك”, دەيدى وبلىس اكىمىنىڭ تاپسىرماسىنا بيزنەس وكىلدەرى دە اتسالىستى. جاقىندا لەڭگىر قالاسىنداعى ورتالىق ساياباقتا جەكە كاسىپكەر اناربەك تاستانبەكوۆ بالالارعا ءجۇزۋ باسسەينىن پايدالانۋعا بەردى. الدا – شىجىعان شىلدە. كانيكۋلعا شىققان بالالار تازا ءارى قاۋىپسىز سۋعا ءتۇسىپ ءماز-مەيرام. اۋدان اكىمى اۋەلحان تۇرعىنبەكوۆ پەن اۋىل اقساقالدارى كاسىپكەرگە ريزاشىلىعىن ءبىلدىردى.
باقتيار تايجان, وڭتۇستىك قازاقستان وبلىسى.
اتىراۋعا شاڭسورعىش كولىك كەلدى. ەندى اتىراۋ قالاسىنىڭ كوشەلەرىن ارنايى شاڭسورعىش كولىك تازالاۋعا شىقتى. وتكەن اپتادا اتىراۋ قالاسىنىڭ اكىمى مەرەكە يسمۇراتوۆقا «CityCat-2020» شاعىن شاڭسورعىش كولىكتىڭ مۇمكىندىكتەرى تانىستىرىلدى. ونى قازاقستانعا جەتكىزۋشى «IPC-Machines» كومپانياسىنىڭ مەنەدجەرى پاۆەل راتسۋبينسكيدىڭ ايتۋىنشا, كوشە شاڭىن سوراتىن كولىكتىڭ ارتىقشىلىعى كوپ. بىرىنشىدەن, جانارمايدى 30 پايىزعا دەيىن ۇنەمدەيدى. ەكىنشىدەن, تەك كوشەلەردى عانا ەمەس, جاياۋ جۇرگىنشىلەر جولىن, تار وتكەلدەر مەن ايالدامالاردى, ارىقتاردى تازالاعاندا شاڭ كوتەرىلمەيدى. قالا باسشىلىعى تامىز ايىندا وسىنداي ەكى كولىك الدىرۋدى جوسپارلاۋدا.
جولداسبەك شوپەعۇل, اتىراۋ.
