بۇرىن كولشەڭگەل ەدى, قازىر قانشەڭگەل

وقۋ ءبىتىرىپ, ماماندىق الىپ, ەڭبەككە ارالاسقاننان بەرى قارا­عاندىدا تۇرامىن.تۋىپ وسكەن جەرىم بۇرىنعى تالدىقورعان وب­لىسى اقسۋ اۋدانى بولعان­دىقتان, قازىر زەينەتكەر رەتىندە ۋاقىتىم كەڭدىكتەن,  ەل جاققا ءجيى­رەك قاتىنايمىن. مەن ءۇشىن دە­مالىستىڭ ەڭ قىمباتتىسى ت­ۋ­عان-تۋىسقاندارمەن, دوس-جاران­دارمەن قاۋىشىپ قايتار شاق. الايدا ايتايىن دەگەنىم بۇل ەمەس. جول بويىنداعى بەلگى­لەر­دىڭ انا ءتىلىمىزدىڭ ماعىناسى بۇزىلىپ, بۇرمالانىپ جازىل­عانى كوڭىلگە  قاياۋ ءتۇسىرىپ ءجۇر­گەندىگىنە  قىنجىلىسىمدى جەتكىزسەم دەيمىن. جەر-سۋدىڭ باستاپ­قى اتاۋلارىنىڭ بىلمەگەن ادامعا مۇلدەم باسقاشا ءتۇسىندىرىلىپ, ونىڭ كوزگە ۇيرەنشىكتى بولىپ كەتۋى تۇبىندە سولاي قابىلدانىپ, قالىپ­تاسىپ كەتۋىنە قاۋىپتەن­دى­رەدى. مۇن­داي بۇرمالاۋشىلىقتار اسىرەسە, جامبىل مەن الماتى وب­لىسىنىڭ اۋماعىندا ءجيى ۇشى­راساتىندىعىن اتاماسقا بول­مايدى. سونىمەن, ماسەلەن, جول بو­يىن­دا بۋرىلبايتال دەگەن ەلدى مە­كەن بار. ونىڭ اتاۋى وسى كۇنگە شەيىن باياعى ورىسشا ىڭعايدا بۋر­بايتال بولىپ جازىلعان قال­پىنان وزگەر­تىلمەگەن.  ءبىر ءارىپتىڭ ءتۇسىپ قالۋى قاندايلىق ادە­مى اتاۋ ءمانىن بۇزىپ تۇر دەسە­ڭىزشى. نەمەسە سول تۇستا ەرتەدەن جىڭعىلدى اتالا­تىن وزەك بولۋ­شى ەدى. ول كەشەگى كەڭەستىك كەزەڭ­دە جىنگەلدى بولىپ جازىلىپ تۇر­دى. قازىر ەندى شەڭ­گەلدىگە اي­نا­لىپتى. ونىڭ جاعا­سىن­دا جىڭ­عىل قاۋلاپ وسەتىندىگى بالا كەزىمىزدەن تانىس. شەڭگەل مۇندا ەش­قاشان ءوسىپ كورمەگەن. ال بۇل ەكى ءوسىم­دىكتىڭ ايىرماشىلىعى بارى بەلگىلى.  جوق نارسەنىڭ تىقپالانۋى ءتۇسى­نىكسىز. ودان ءارى اسقاندا  قۇرعاقشو­لاق اتتى وزەك الدان شىعاتىن. بۇرناعى جىلى قۋىرشاقشولاق بولىپ جا­زىلىپ شىعا كەلگەنىن كوردىك. بۇگىن­دە سول قالپىندا تۇر. تاعى ءبىر بەلەسكە كوتەرىلگەندە كولشەڭگەل اۋى­لى كورىنەتىن. ەندى قانشەڭگەل بو­لىپ وزگەرتىلىپتى. كوكتەمدە قار سۋىنان كولشىك پايدا بولىپ, جا­عاسىندا شەڭگەل كوكتەي­تىندىكتەن, سولايشا اتالعانىن ۇلكەندەر اۋزىنان ءبىلۋشى ەدىك. ءبورىلى وزە­گىنىڭ ءالى كۇنگە دەيىن بۋرىۋزەك دەپ ورىس­شا­لانعان قال­پىندا قال­عانىن قايتەرسىز. ايتا بەرسەك, اقسۋعا جەتكەنشە وسىلايشا ەجەلگى اتاۋلارى ورەسكەل بۇرمالانعان, وزگە ءتىل مانەرىندە جازىلعان جول بەلگىلەرى جىرتىلىپ ايرىلادى. ولار تۇزەتىلمەي تۇرا بەرە مە؟ احات ايازباي ۇلى. قاراعاندى.