اقتاڭداقتار سانادان وشپەيدى

پارلامەنت ماجىلىسىندە «نۇر وتان» حدپ فراكتسياسى جانىنداعى الەۋمەتتىك كەڭەس ءتورايىمى, ءماجىلىس دەپۋتاتى ايتكۇل ساماقوۆا 31 مامىر – ساياسي قۋعىن-سۇرگىن قۇربان­دارىن ەسكە الۋ كۇنىنە وراي استاناداعى بالالار ءۇيىنىڭ ءبىر توپ وقۋشىلارىن اقمول اۋىلىندا ورنالاسقان «الجير» مەموريالدى-مۇراجاي كەشەنىنە تاعزىم ەتۋگە الىپ باردى. ولار الدىمەن كەڭەس وداعىن­داعى مىڭداعان جەكە ادامدار عا­نا ەمەس, تۇگەلدەي حالىقتار تاع­دىرىن قيعان توتاليتارلىق ءتار­تىپ قۇرباندارىن ءبىر مينۋت ءۇنسىز ەسكە الىپ, 7000 ادامنىڭ اتى-ءجونى جازىلعان ەسكە الۋ قابىر­عا­سىنا گۇل شوقتارىن قويدى. سودان كەيىن بالالار «قاقاعان سۋىق «الجير» دەرەكتى ءفيلمىن كورىپ, «قۇپيا ساندىق سىر شەرتەدى», «گۋلاگ بالالارى» دەپ اتال­عان كورمەلەردى قارادى. كورمە نەگىزى مۇراجاي قىزمەتكەرلەرىنىڭ عىلىمي ەكسپەديتسيالارى كەزىندە ورىنبور, ماسكەۋ, ومبى, ال­ما­تى, تاشكەنت, قىزىلوردا قالا­لا­رى­نان جينالعان. «الجير» لاگەرى تۇتقىندارىنىڭ تاعدىرى تا­قىرىبىن اشاتىن فوتوقۇجاتتار, حاتتار جانە ولاردىڭ جەكە زات­تا­رى قويىلعان. كسرو-دا تالايدىڭ ءومى­رىن توزاققا اينالدىرعان 953 لاگەر بولسا, سونىڭ ۇشەۋى ەلىمىز اۋ­ما­عىندا قۇرىلدى. وسىنداعى اتى­نان ادام شوشىرلىق «الجير» لا­گەرى كسرو-داعى ايەلدەر قامال­عان جالعىز ازاپتاۋ ورنى بولدى. – مەملەكەت تاريحتىڭ اقتاڭ­داق بەتتەرى حالىق ساناسىنان ۇمى­تىلىپ كەتپەۋى ءۇشىن, جاس­تار­دىڭ بويىندا وتانعا, ۇلتقا دەگەن ۇلان-عايىر سۇيىسپەنشىلىك سەزىمى قالىپتاسۋى ءۇشىن ءبارىن جاساپ جاتىر. بۇگىنگى سەندەرمەن بىرگە توتاليتارلىق ءتارتىپ قۇربان­دا­رىن ەسكە الىپ جاتقانىمىز سو­نىڭ ءبىر كورىنىسى, – دەدى بالالارمەن بولعان اڭگىمەدە ايتكۇل ساماقوۆا. ساۋلە دوسجانوۆا, جۋرناليست سۋرەتتەردى تۇسىرگەن سايلىباي مايلىباەۆ.