وپىرىلعان اعاشتار وڭدەۋدەن وتپەك

الماتىدا توتەنشە جاعدايلار ءمينيسترى ۆلاديمير بوجكو مەن قالا اكىمى احمەتجان ەسىموۆتىڭ قاتىسۋىمەن مامىر ايىنداعى تابيعات قۇبىلىستارىنىڭ سالدارىن قالپىنا كەلتىرۋ ماسەلەسى تۋرالى جينالىس ءوتتى. مامىر ايىندا جەتىسۋ جەرىندە بولعان جەر سىلكىنىسى مەن قاتتى داۋىلدان كەيىنگى زارداپتاردى جويۋ ماسەلەسى سىنعا ۇشىرادى. قالا اكىمى 17 مامىرداعى داۋىل­دان كەيىن-اق قۇلاعان تال مەن جابىل­عان جولدى جاقىن كۇندەرى قالپىنا كەلتىرەتىندىكتەرىن جەتكىزگەن بولا­تىن. الايدا مەدەۋ, شىمبۇلاق جو­لى تازارتىلعانىمەن, كۇنى بۇگىنگە دەيىن تاۋ بوكتەرىندەگى جۇزجىلدىق الىپ اعاشتار سول وپىرىلعان قال­پىندا جاتىر. ىلە الاتاۋى ۇلتتىق ساياباعىندا قۇلاعان 90 مىڭ اعاش بۇل كۇندە قۇرت تۇسكەنىمەن قويماي, جازعى ورتكە دە سەبەپشى بولۋ قاۋ­پىن تۋدىرۋدا. وسى ماسەلەلەرگە قا­تاڭ شۇيلىككەن اكىمگە ورمان شارۋا­شىلىعى ماماندارى 20 كۇننىڭ ىشىندە ولقىلىقتى اۋىزدىق­تاي­تى­نىن ايتتى. ول ءۇشىن جۇمسالاتىن قاراجات پەن ەڭبەك كۇشى, وزگە دە تەحنيكالار كورشىلەس ايماقتاردان تارتىلاتىندىعى ەسكەرىلدى. جەل قۇلاتقان 3178 اعاشتى تۇبىرىمەن وتاپ, ءتيىستى جەرگە جەتكىزۋ ءۇشىن جەرگىلىكتى بيۋدجەتتەن وسى ۋاقىتقا دەيىن 75 ميلليون تەڭگە جۇمسالعان. احمەتجان ەسىموۆ قالانىڭ جول ينفراقۇرىلىمىنا زالال كەلتىرمەس ءۇشىن ەندىگى جەردە قاۋساعان اعاش­تار­دىڭ ماڭىنان ۋاقىتشا شاعىن تسەح اشىپ, كەرەكسىز قاراعايلاردى وڭدەۋمەن جانە قالدىقتارىنان تى­ڭايتقىش جاساۋدى ۇسىندى. جينالىستا ءسوز بولعان ەكىنشى ءما­سەلە – ىلە الاتاۋى ۇلتتىق سايا­باعى اۋماعىنداعى كىشى الماتى كولىنە قۇياتىن م.مامەتوۆا مۇزدى­عىنىڭ №6 كولى تۋرالى بولدى. مامىر با­سىنداعى سىلكىنىستەن كەيىن وسى وزەندە «مۇز جارىلىپ, جى­راسىندا قاۋىپتى سى­زات پايدا بو­لىپتى, سۋ تاسقىنى بولۋى مۇمكىن ەكەن» دەيتىن الىپ-قاشتى اڭگىمە ەل ءىشىن ەركىن كەزگەن-ءدى. «قازسەل­دەن­قورعاۋ» مەملەكەتتىك مە­كە­مە­سىنىڭ ماماندارى سىلكىنىستەن كە­يىن-اق اتال­مىش ايماقتى تەكسەرىپ, قاۋىپ تۋدىراتىن جاعدايدىڭ جوق ەكەندىگىن ەسكەرتكەن. مينيستر مەن اكىم جينالىسقا كىرمەس بۇرىن تىك­ۇشاق­پەن كولدىڭ احۋالىن باسىنا بارىپ بايقاپ قايتتى. «قازسەلدەنقورعاۋ» مەكەمەسىنىڭ باس­تىعى ت.بايمولداەۆ №6 كولدە ءدال قازىر 70-80 سانتيمەترلىك قىسقى مۇز­دىڭ جاتقانىن, سۋدىڭ دەڭگەيى بىل­تىر­عىعا قاراعاندا 3,5 مەترگە دەيىن تومەن ەكەندىگىن ايتىپ, جۇرت­شىلىق­تىڭ ۇرەي­لەنۋى نەگىزسىز ەكەندىگىن جەتكىزدى. جينالىس قورىتىندىسىندا م.مامەتوۆا مۇزدىعىنىڭ №6 كولىنە قالىپتى سۋ جيناۋ ىسىنە جۇيەلى تۇردە مونيتورينگ جۇرگىزۋ جانە داۋىل­دان كەيىنگى قۇلاعان تالدار­دىڭ ورنىن تەز ارادا تولىقتىرۋ جۇمىسىن تياناق­تاۋ شاراسى تاپسىرىلدى. قانات ەسكەندىر, جۋرناليست. الماتى.