جەڭدىك! گول! جانكۇيەرلەرگە راحمەت!

كەشە استانا تورىندە قازاقستان قۇراماسى ءازىربايجان كومانداسىن قابىلداپ, 2012 جىلعى ەۋروپا چەمپيوناتىنىڭ ىرىكتەۋ تۋرنيرىندەگى العاشقى جەڭىسىنە جەتتى. ەسەپ – 2:1. وسى كەزگە دەيىن ەۋروپا چەمپيوناتىنىڭ ىرىكتەۋ تۋرنيرىنە ەكىنشى رەت قاتىسىپ, سونىڭ ەكەۋىندە جەڭىستى تويلاعان ۇلتتىق قۇراما ءۇشىن كەشەگى ازىربايجانمەن بولعان جيىرماسىنشى ويىن جەڭىستى كۇندەرىمىزدىڭ جالعاسى بولسا دەگىمىز كەلەدى. بۇگىن قوستانايدا وتەتىن پاتريوتتار فورۋمىنىڭ الدىندا قوستانايلىق تەڭبىل دوپ شەبەرى سەرگەي گريدين بۇكىل قازاقستان­دىقتارعا تاماشا قۋانىش سىي­لادى. «توبىل» كومانداسىنىڭ قۇرامىندا شەبەر ويىنىمەن كوپكە تانىلعان جاس شابۋىلشى ەلىمىزدىڭ قۇراما كومانداسىندا العاش رەت ونەر كورسەتىپ, ال­عاش­قى ويىنىندا... ەكى بىردەي گول سوقتى. مۇنداي جاعداي فۋتبولدا سيرەك كەزدەسەدى. ادەتتە قۇرا­ما كومانداداعى العاشقى ويىن­دا اسىپ-ساسپايتىن ادام از. وندايدا ادەتتەگى جۇرىسىنەن جاڭى­لىپ, ءوز كومانداسىنداعى ويىن ورنەگىنەن دە ايىرىلىپ قالىپ جاتاتىندار جەتەدى. ال سەرگەي «اس­تانا-ارەناداعى» تۇڭعىش ماتچ­تا-اق كانىگى شەبەرلەردەي قيمىلدادى, كومانداعا تابيعي تۇردە كىرىگىپ كەتكەندەي اسەر قالدىردى.  وسى كەزدەسۋدە ءتاجى­ري­بەلى ويىنشىلارمەن بىرگە سوڭ­عى كەزدە جاسىل الاڭدا كوپ­شىلىكتىڭ كوزىنە ءتۇسىپ جۇرگەن جاس ويىنشىلار دا ونەر كور­سەتتى. سونىڭ ءبىرى جاڭاعى ايتقان سەرگەي گريدين بولسا, ونىمەن جانىن بەرىپ, ويىندا بۇكىل كۇش-قايراتىن جۇمساعان ۇلان قو­نىس­باەۆ, قايرات نۇرداۋلەتوۆ سياق­تى ويىنشىلار. ال قۇرا­ما­عا بەرند شتورك كەزىندە كوپتەن بەرى الىنباي, «اقتوبەنىڭ» نا­مىسىن قورعاپ جۇرگەن سامات سىماقوۆ, مارات حايرۋللين سەكىلدى تاجىريبەلى ويىنشى­لار­دىڭ ورنى بولەك, ارينە. بۇل ماتچتا جاراقاتىنا بايلانىستى قاقپاشى داۆيد لوريا مەن جار­تىلاي قورعاۋشى اندرەي كارپوۆيچ وينامادى. كاپيتاننىڭ جەي­دەسىن كيگەن نۇربول جۇماس­قاليەۆ ءتىپتى قۇراماعا شاقى­رىل­مادى. قۇرامانىڭ جاڭا باپكەرى ميروسلاۆ بەرانەكتىڭ الداعى ۋاقىتتا نۇربولداي باسقا دا تاجىريبەلى ويىنشىلاردى كوماندا ساپىنا قوساتىنىنا سەنەمىز. ال كەشەگى ويىندا دۋبل جاساعان سەرگەي گريدينگە نەگىزگى قۇرامعا قوسىپ, ءوزىن كورسەتۋگە مۇمكىندىك بەرگەنىن قازاقستان قۇراماسىنا جەتەكشىلىك تىزگىنىن جاڭا قولعا الىپ جاتقان چەح جاتتىقتىرۋشىسى ميروسلاۆ بە­رانەكتىڭ كوزىنىڭ قىراعىلى­عى­نىڭ بەلگىسى دەپ سەنگىمىز كەلەدى. قازاقستان كومانداسىنا ۆۋگار ناديروۆ سوققان العاشقى گول تۇ­تاستاي قورعاۋشى يۋري لوگۆي­نەنكونىڭ كىناسى دەۋگە بولادى. ايتقانداي, ءازىربايجان كومان­دا­سىنىڭ باپكەرى بەرتي فوگتس ويىن­شىلاردى الماس­تىرۋ­دا وتە ءساتتى شەشىم قابىلدادى. سول گولدىڭ اۆتورى ۆۋگار ناديروۆ ءبىزدىڭ قاق­پاعا دوپ سوعاردان ەكى مي­نوتتەي عانا بۇرىن دجاۆيد گۋسەينوۆتى ال­ماستىرعان بولاتىن. وسى ويىن­دا ميروسلاۆ بەرانەك تە ويىن­شى­لاردى ءساتتى الماستىرا ءبىلدى. ول ەكىنشى تايمدا قۇراما سا­پىنا كوپتەن بەرى قوسىلماي, الاڭدا ءوزىنىڭ ويى­نىن تابا الماي جۇرگەن سەرگەي وستا­پەن­­كونى سەرگەي حيج­­ني­چەن­­­­كو­مەن, يۋري لوگ­ۆي­نەنكونى ميحايل روجكوۆپەن ال­ماستىردى. ال مارات ءحايرۋلليندى الەكساندر كيروۆپەن الماس­تىرعانى بىزگە ءتۇ­سىنىكسىزدەۋ بولىپ كورىندى. وسى ويىندا سەرگەي گري­ديننىڭ ەكىنشى گو­لىنا ادە­مى پاس بەرگەن مارات ويىنىن جالعاستىرا بەرگەن­دە ءبىزدىڭ شا­بۋىلشىلار ەسەپتى تاعى ەسەلەي تۇسەر مە دەگەن ويىمىز بولعانى جاسىرىن ەمەس. دەگەنمەن, ويىن ءبىزدىڭ پايدا­مىزعا شەشىلدى. ەڭ باستىسى وسى. ستاديوندا قۇرا­ما­عا بولىسىپ, «العا, قازاقتار!», «قازاقستان!» دەپ 94 ءمينوت بويى ۇرانداتقان جانكۇ­يەر­لەردىڭ قۋا­نى­شىندا شەك جوق. بۇل جاعداي باسقاعا بولماسا دا بىزگە تۇسىنىكتى نارسە. ويتكەنى, قا­زاقستان قۇرا­ماسى ۋەفا-عا 2002 جىلى كىرگەنىمەن, 2006 جىلدان, ياعني ەۋروپا چەم­پيو­ناتى­نىڭ ىرىكتەۋ تۋرنيرىنە قاتىس­قان كەزدەن بەرى ءۇشىنشى جەڭىسىنە جەتىپ وتىر. العاشقى جەڭىستى ءبىز 2007 جىلى الماتىدا سەربيانى 2:1 ەسەبىمەن ۇتىپ, توي­لاعان بولا­تىنبىز. ال ەكىنشى جە­ڭى­سىمىزگە سول جىلى ارمەنيانى سىرت الاڭ­دا 1:0 ەسەبىمەن جەڭ­گەنىمىزدە جەتكەنىمىز ەسىمىزدە. ءبىز ويىننان كەيىن وسى رە­پور­تاجدى جازىپ ءۇل­گەرۋ ءۇشىن رەداك­تسياعا اسىقتىق تا, ماتچتان سوڭ­عى ءباسپاسوز ءماس­ليحاتىنا قاتىسا المادىق. ستاديوننان شىققان بەتتە بىرەر اۋىز تىلدەسكەن جانكۇيەر – كا­سىپكەر سەرىكبەك بورانباەۆ ويىننان العان اسەرىن بىلايشا ءبولىستى: «ءازىر­بايجان كو­مانداسىنىڭ مۇنىڭ الدىندا تۇركيا قۇراماسىن ءوز الاڭىندا جەڭگەنىن بىلگەندىكتەن وسى ويىن­­عا الاڭ كوڭىلمەن كەلگەنىم راس ەدى. شىنىن ايتقاندا, قوناق­تار­دان مۇنان الدەقايدا شەبەر ويىن كۇتكەن بولاتىن­مىن. ءازىر­بايجان­دىقتاردان ما­عان 22-ءشى ءنومىرلى افران يزمايلوۆ قاتتى ۇنادى. تەحنيكالىق تۇرعىدان وتە ساۋات­تى. الاڭدى جاقسى كو­رە بىلەدى. ءوز فۋتبول­شىلارى­مىز­دىڭ اراسىنان سەرگەي وستا­پەنكونىڭ, ۇلان قو­نىس­باەۆتىڭ, كازبەك گەتەريەۆتىڭ جانىن سا­لىپ ويناعانى كوزگە ۇرىپ تۇر­دى. سونىمەن بىرگە قور­عانىس شەبىندەگى سەلكەۋلىكتەر ءالى دە جان اۋىرتادى. قالاي دەگەندە دە قازاقستان كومان­دا­سىنىڭ ويىن ورنەگى شتوركتىڭ تۇسىنداعىدان ىلگەرى. جاڭا باپ­كەردىڭ جاڭا ويىن­شىلاردى, جاس ويىنشى­لار­دى قۇراماعا تار­تۋ تالابى دا قۇپتارلىق. فۋت­بول­شى­لارىمىز پسيحولوگيالىق تۇر­عىدان ءالى دە شىڭدالا تۇسسە دەيمىن. جەڭىسى­مىز قۇتتى بول­سىن!». ءبىز دە وسىنى ايتامىز. جە­ڭىستى كۇندەردە جۇزدەسۋگە جاز­سىن. ايتپاقشى, ءبىزدىڭ قۇراما­نىڭ وسى جەڭىسىنە شىن جۇرە­گى­مەن رەسەيدەگى فۋتبول جان­كۇيەر­لەرى دە قۋانىپ جاتقانى كوڭىل وسىرەدى. ماتچتان كەيىن ينتەرنەت سايتتاردى اقتارىپ وتىر­عانى­مىز­دا, ءوزىنىڭ اتىن اتاماسا دا قازاق­ستاننان رەسەيگە كوشىپ كەتكەن ءبىر جانكۇيەر بىلاي دەپ جا­زىپتى: «نيجني نوۆگورودتا اراب­­تىڭ ءبىر تەلە­ار­ناسىنان ماتچ­­تى قاراپ وتىر­مىن. بىرنەشە جىل ىشىندە قۇ­را­ما جاڭارتى­لىپتى. ما­عان ۇنا­دى, شابۋىلعا باتىل شى­عىپ ءجۇر. گريدين تاڭ­عال­دىر­دى. ونى ەندى رەسەي پرەمەر-ليگاسىندا كورسەم دەيمىن. جەرلەستەر, جە­ڭىس­تەرىڭىز قۇتتى بول­سىن!». ءبىز­دىڭ بۇعان الىپ-قوسارىمىز جوق. «جاقسى ءسوز – جارىم ىرىس» دەيدى. PS: وسى كۇنى ليحتەنشتەين مەن ليتۆا قۇرامالارىنىڭ كەزدەسۋىنە ءتورت قازاقستاندىق تورەشى قازىلىق جاسادى. باس تورەشى ارتەم كۋچين (قا­را­عان­دى), قاپتالدا ەۆگەني بەلسكي (تاراز), رۇستەم ءسۇيىنوۆ (پا­ۆ­لودار), ءتورتىنشى تورەشى قوستا­ناي­لىق اناتولي ۆيشنيچەنكو بولدى. سۋرەتتەردى تۇسىرگەن ورىنباي بالمۇرات. داستان كەنجالين.