ول العاش رەت 1992 جىلى ناۋىرزىم اۋدانىندا باستالعان بولاتىن. ايتىس دەسە, دەلەبەسى قوزاتىن كورەرمەندەر اقىنداردى بالاسىنعان جوق, اۋداندىق مادەنيەت ءۇيىنىڭ اۋزى-مۇرنىنان شىعىپ وتىرعان ەدى. ءبىر قىزىعى, العاشقى ايتىستا قازىلار القاسىنا توراعالىق ەتكەن بەلگىلى ساتيريك جازۋشى عۇمار احمەتچين 25 جىل بويى وسى مىندەتتى سۇيىسپەنشىلىكپەن اتقارىپ كەلەدى. ول مەڭدىعارادا وتكەن 25-ءشى ايتىستىڭ دا قازىلار القاسىن باسقاردى.
− العاشقى ايتىستا باس جۇلدەنى العان سالتانات وتەلباەۆا 7-سىنىپتا وقيتىن, ول قازىر وبلىستىق, رەسپۋبليكالىق ايتىستارعا قاتىسىپ جۇرگەن تانىمال اقىن, مادەنيەت سالاسىنداعى بىلدەي مامان. ءۇشىنشى ورىندى 5-سىنىپتا وقيتىن قىدىربەك قيىسقان دەگەن شىناشاقتاي قارا بالاعا بەرىپ, قولىنا ۆەلوسيپەد ۇستاتىپ ەدىم. ەندى سول قىدىربەك وزىممەن بىرگە قازىلار القاسىندا وتىر, تاماشا تەرمەشى, ءانشى, رەسپۋبليكاعا بەلگىلى جۋرناليست. ونان دا قىزىعىن ايتايىن, «جاس تۇلپار» ايتىسىنىڭ بىرىندە ءۇشىنشى ورىندى ءتىلى ءمىردىڭ وعىنداي قالاقتاي عانا قارا بالاعا بەرگەن ەدىك, ەندى سول ەرلان قالماقوۆ وتكەن جىلدان باستاپ, وبلىستىق مادەنيەت باسقارماسىنىڭ تىزگىنىن قولىنا الدى. ءوزى جاقسى جازبا اقىن. 25-ءشى ايتىسقا ەرلاننىڭ ءوزى كەلىپ, مەكتەپ وقۋشىلارىنىڭ ايتىسىن دامىتۋعا ۇلەس قوسقانىمدى ايتىپ, وبلىستىق ءبىلىم باسقارماسىنىڭ باسشىسى ءباتيما داۋىموۆا مەن مادەنيەت باسقارماسىنىڭ باسشىسى رەتىندە ءوزى قول قويعان العىس حاتتى تاپسىردى. ايتىستا قاناتىن ۇشتاعان بالالاردىڭ وسىلاي وسكەنىنە ەڭبەگىم دالاعا كەتپەگەن ەكەن دەپ, توبەم كوككە جەتكەندەي بولدى, − دەپ اعىنان جارىلدى عۇمار عاريف ۇلى.
− ايتىسقا جاتپاي-تۇرماي دايىندالاتىنبىز, ءوزىمىزدى كادىمگى اقىن سەزىنەتىن ەدىك. مەن سول ايتىستا ءسانيا دەگەن قىزعا: «ەرجەتىپ, اتتىڭ جالىن تارتقان كەزدە, اۋىلىڭا ادەيى ىزدەپ بارىپ قايتام» دەگەنىم ەسىمدە. زال قول شاپالاقتاپ, دۋىلداپ كەتتى, – دەپ ەسىنە الادى قىدىربەك قيىسقان.
مەڭدىعارادا وتكەن 25-ءشى ايتىسقا وبلىستىڭ ءار شالعايىنان 16 وقۋشى قاتىستى. تاۋەلسىزدىك الاردان بۇرىن قازاقتىڭ سانى 2 پايىز عانا دەپ ەسەپتەلەتىن رۋدنىي قالاسىندا قازىر بىرنەشە قازاق مەكتەبى بار. ايتىسقا جىل سايىن اقىنىن شىعاراتىن دا رۋدنىي قالاسى. باياعىدا قازاق ءتىلىنىڭ ءيىسى شىقپاي, تىم-تىرىس جاتاتىن دەنيسوۆ, قاراسۋ, سارىكول اۋداندارى دا بيىل ءبىر-ءبىر اقىنىن ۇكىلەپ جىبەرىپتى. كۇنى بويى كورەرمەنىن بالاپان جىرمەن جەلپىنتكەن ايتىستا قازىلار القاسى باس جۇلدەگە مەڭدىعارالىق وقۋشى دىنمۇحامەد قۇسايىنوۆتى لايىق كوردى. ودان كەيىنگى جۇلدەلەردى قانجىلاعان وقۋشىلار مەن تالاي شاكىرتتى ونەرگە باۋلىعان بەلگىلى ايتىسكەر اقىن بۇركىت بەكەتوۆ ۇزدىك تالىمگەر رەتىندە ماراپاتتالدى.
ءتىلى ورىسشاعا بۇرا تارتا بەرەتىن قوستانايدىڭ قازاقىلانۋىنا كيەلى ونەردىڭ دە ۇلەسى جوق دەپ كىم ايتار ەندى؟
ءنازيرا جارىمبەتوۆا,
«ەگەمەن قازاقستان»
قوستاناي وبلىسى,
مەڭدىعارا اۋدانى
