بۇگىندە تاراز – جامبىل وبلىسىنىڭ وراتالىعى جانە جارتى ميليوننان استام تۇرعىنى بار, قازاقستاننىڭ وڭتۇستىك ءىرى يندۋستريالدى جانە مادەني ورتالىعى. تاريحي ەسكەرتكىشتەرگە باي قورىنىڭ ارقاسىندا شاھاردىڭ تۋريستىك الەۋەتى زور. 2011 جىلى باستالعان كونە شاھاردىڭ ارحەولوگيالىق قازبا جۇمىستارى ەكى مىڭجىلدىق تاريحى بار بىرەگەي ارتەفاكتىلەرگە قول جەتكىزۋگە مۇمكىندىك بەردى.
عالىمداردىڭ ايتۋىنشا مۇندا اسفالت استىندا ەسكى قالا بار جانە ونىڭ جاسى كەم دەگەندە ەكى مىڭعا جەتەدى.
«التى جىل قاتارىنان كونە تاراز قالاسىنىڭ كەڭاۋقىمدى ارحەولوگيالىق قازبا جۇمىستارى جۇرگىزىلۋدە. وسى ۋاقىت ارالىعىندا ارحەولوگتار VI-XII عاسىرلارعا تيەسىلى شامامەن 50 مىڭداي ارتەفاكت تاپتى, ولار ورتاعاسىرلىق قامال, VIII - IX عاسىرلارداعى مەشىت, مەدرەسە, وتقا تابىنۋشىلاردىڭ مەحرابى, زىندان, كونە تالاس وزەنى ساعاسىنىڭ جاعاسى, تۇرعىن ۇيلەردىڭ ىرگەتاستارى», - دەپ اكىمدىكتەن تولىقتىردى.
20 گەكتار القاپقا شولۋ مۇناراسى, دوستىق ءۇيى مەن كونگرەسس-حوللى بار ەتنومادەني ورتالىق, «تاراز سازدارى» ستەلاسى, «مىڭبۇلاق» ساياباعى, قازبا جۇمىستارى بارىسىندا تابىلعان ەكسپوناتتار قويىلعان مۋزەي نىسانى ورنالاستى.
تابىلعان كونە زاتتار ناقىشىنا كەلتىرىلىپ سالىنعان ويۋ ورنەكتەرگە باي جانە قولدان جاسالعان. قىش ىدىس اياقتارى, التىن, شىنى مەن مەتاللدان جاسالعان زاتتاردا بار. سانكت-پەتەربۋرگ ەرميتاجىنان كەلگەن شىعىستانۋشى-ماماندار از ۋاقىتتا كوپتەپ تابىلعان تاريحي قۇندىلىقتارعا جوعارى باعا بەردى.
ەندى بەلگىلى بولعانداي, قازاق حاندىعىنىڭ 550-جىلدىعىنا وراي اشىلعان «كونە تاراز» رەسپۋبليكالىق ماڭىزداعى تاريحي ەسكەرتكىش – ارحەولوگيالىق پارك ەكسپو-2017 حالىقارالىق كورمەسىنىڭ قوناقتارى ارالايتىن قالالار تىزىمىنە ەنگىزىلدى.
