وڭىردە وتكەن جىلى اتا-اناسىنىڭ قامقورلىعىنسىز قالعاندار مەن جەتىم بالالاردى قولداۋ ماقساتىندا وبلىستىق اكىمدىكتىڭ ۇيىتقى بولۋىمەن كەشەندى باعدارلاما قۇرىلعان. مۇنداعى قولداۋ مەن قامقورلىق قانداي تۇرعىدا بولماق؟ باعدارلاماعا سايكەس جەتىم بالالاردى جەبەۋدىڭ بىرنەشە جولدارى قاراستىرىلعان. ارينە, ءبىرىنشى كەزەكتە تاعدىر تەپەرىشىنە ۇشىراعانداردى تۇراقتى باسپانامەن قامتۋ ماسەلەسى تۇر. ەڭ الدىمەن, ولار ءدال وسى ماسەلەدەن قيىندىق كورەتىنى, قالاي شارق ۇرسا دا ونىڭ شەشىمى مەن كىلتىن تابا الماي, باستارىن تاۋعا دا, تاسقا دا ۇراتىنى تابيعي جايت.
بۇعان دەيىنگى تاجىريبە جەتىم بالالارعا بيۋدجەتتىك قاراجاتتار ەسەبىنەن ءۇي ساتىپ الىپ بەرۋدىڭ تيىمسىزدىگىن كورسەتتى. ءارى مۇنداي جولمەن پاناسىزداردىڭ ءبارىن بىردەي جارىلقاۋ ەش مۇمكىن ەمەس ەكەنى دە ايقىن بايقالدى. سوندىقتان باعدارلاما جوباسى يەلەرى مۇنداي «مۇرادان» سانالى تۇردە باس تارتقان. ولار اتا-اناسىنىڭ قامقورلىعىنسىز قالعاندار مەن جەتىم بالالاردى تۇرعىن ۇيمەن قامتۋدىڭ وزگە وركەنيەتتى جولىن ۇسىنعان.
بۇل وسى ماقساتتى ىسكە اسىرۋ ءۇشىن ولارعا تۇرعىن ءۇي قۇرىلىس جيناق بانكىنەن ەسەپ-شوت اشۋ بولىپ تابىلادى. ارينە, مۇنداي ەسەپ-شوتتى وزدەرى اشۋعا جەتىمدەردىڭ جاعدايى كوتەرمەيتىنى ايتپاسا دا تۇسىنىكتى. سول سەبەپتى باعدارلاما تالاپتارى مەن نورمالارىنا سايكەس بۇل ساۋابى مول ىسكە وڭىردەگى ءىرى كاسىپورىنداردى, اكتسيونەرلىك قوعامدار مەن جاۋاپكەرشىلىگى شەكتەۋلى سەرىكتەستىكتەردى جانە جەرگىلىكتى مەملەكەتتىك ورگانداردى بەكىتۋ كوزدەلگەن. بۇگىنگى كۇنى العاشقى سومالار جەتىم بالالار ءۇشىن اشىلعان ەسەپ-شوتتارعا تۇسە باستادى.
كەشەندى باعدارلامانىڭ ەكىنشى تارماعى الەۋمەتتىك-پاتروناتتىق قولداۋ قاعيدالارىنا ارقا سۇيەيدى. بۇل باعىتتا دا اۋىزدى قۋ شوپپەن سۇرتۋگە ەش بولمايدى. ويتكەنى, جىلجىپ جاتقان ءىس, كورىنىپ جاتقان كومەك بار. ايتالىق اتالعان باعدارلاما قولعا الىنعان ۋاقىتتان بەرى 490 جەتىم بالاعا 30 ميلليون تەڭگەگە جۋىق كومەك كورسەتىلگەن. بۇل دەرەكتىڭ ءوزى وڭىردەگى بالالار ءۇيىنىڭ تۇلەكتەرى ءۇشىن قاجەتتى سوما جيناقتالعانىن كورسەتەدى.
سونداي-اق, كەشەندى باعدارلامانىڭ كەلەسى ءۇشىنشى تارماعى دىمكاس جەتىم بالالاردىڭ ەمدەلۋى ءۇشىن قولداۋ كورسەتۋدى قاراستىرادى. ونى ەكى ءتۇرلى جولمەن شەشۋ بەلگىلەنگەن. ياعني مۇنىڭ ءبىرىنشىسى – ارنايى سەرتيفيكاتتار تابىستاۋ, ەكىنشىسى سول اۋرۋ بالالاردىڭ تۇرعىن ءۇي قۇرىلىس جيناق بانكىندە اشىلعان ەسەپ-شوتىنا اقشا اۋدارۋ بولىپ وتىر. بۇعان قوسارىمىز وڭىردەگى وقۋدا وزات, ونەگەلى, زەرەك جەتىم بالالارعا استانادا وتكىزىلەتىن ەكسپو-2017 كورمەسىنە بيلەتتەر تەگىن بەرىلمەك. سەرتيفيكات دەمەكشى, ايماقتا ءبىر بولمەلى پاتەردىڭ سەرتيفيكاتىن جەتىم بالالارعا تابىستاۋ ءۇردىسى دە ورنىعىپ كەلەدى.
جەتىم كورسە جەبەپ, ولارعا قارا اعاشتاي پانا, بايتەرەكتەي سايا بولا ءبىلۋدىڭ ساۋابى وتە مول. وسى ورايدا اقتوبە وبلىسىنىڭ اكىمى بەردىبەك ساپارباەۆ قوس بىردەي جەتىم بالانى تىكەلەي ءوزىنىڭ قامقورلىعىنا العانى جۇرەكتى ەلجىرەتپەي, تەبىرەنتپەي قويمايدى. مۇنداي بيىك ادامگەرشىلىك ءىس-ارەكەتتەر تەك ۇلكەن جۇرەكتى ازاماتتارعا عانا ءتان ەكەنى كامىل. ەندەشە, وسىناۋ باستاما وزگەلەرگە دە ءسىڭىستى بولسا يگى. ءبىز مۇنداي شاپاعاتى مول قادامعا اقتوبە وبلىستىق ءبىلىم باسقارماسى ۇيىمداستىرعان «مەيىرىمدى جۇرەك» اتتى قايىرىمدىلىق كەشىندە كۋا بولعان ەدىك. وسى شارا تاقىرىبىندا كورسەتىلگەندەي مەيىرىمدى ءجۇرەكتىڭ باس يەسى وزگە ەمەس, ءوڭىر باسشىسىنىڭ ءوزى بولىپ شىققانى قانداي عانيبەت.
مۇنداي كوڭىل تولقىتار ءساتتە ۇندەمەي قالۋ, سىرت اينالۋ مۇمكىن بە؟ استە مۇمكىن ەمەس. وسىنداي جىلى سەزىم جەتەگىندە ءوز قامقورلىعىنا العان بالالارىنىڭ قاسىندا جايدارى جۇزبەن وتىرعان وبلىس باسشىسىنا تەز ادىمداپ جەتىپ بارىپ, سىزگە اللانىڭ ڭۇرى جاۋسىن, بەكە, – دەپ قالعانىمىزدى ءوزىمىز دە بايقاماي قالىپپىز.
قورعاي ءجۇر, قايىرىمدىلىق!
تەمىر قۇسايىن,
«ەگەمەن قازاقستان»
اقتوبە وبلىسى
