ساۋد ارابياسىنىڭ سىرتقى ىستەر مينيسترلىگىندە وتكەن كەزدەسۋ بارىسىندا ق.ءابدىراحمانوۆ «ەلباسى نۇرسۇلتان نازارباەۆتىڭ 2016 جىلعى 24-25 قازانداعى ەر-ريادقا رەسمي ساپارى ەكىجاقتى قارىم-قاتىناستاردىڭ جاڭا كەزەڭىنە جول اشتى, بولاشاقتا قارىم-قاتىناستارىمىز دامىپ, نىعايا تۇسەتىندىگىنە كامىل سەنەمىز», – دەپ ايرىقشا اتاپ ءوتتى. وسىعان وراي, مينيستر ءارىپتەستەرىمەن جوعارى دەڭگەيدە قول جەتكىزىلگەن كەلىسىمدەردىڭ ىسكە اسىرىلۋ جايىن تالقىلادى.
قازاقستان تاراپى بىرىككەن ۇلتتار ۇيىمى, يسلام ىنتىماقتاستىعى ۇيىمى جانە باسقا دا حالىقارالىق, سونداي-اق وڭىرلىك ۇيىمدار شەڭبەرىندەگى ەر-ريادپەن ىنتىماقتاستىعىن جوعارى باعالايدى, سونىمەن قاتار, استانا قالاسىندا شتاب-پاتەرى ورنالاسقان ازىق-ت ۇلىك قاۋىپسىزدىگى جونىندەگى يسلام ۇيىمىن قۇرۋعا ساۋد ارابياسىنىڭ قولداۋ كورسەتكەنى ءۇشىن العىس بىلدىرەدى.
قازاقستان سىرتقى ىستەر مينيسترى ساۋد ارابياسى تاراپىن بۇۇ قاۋىپسىزدىك كەڭەسى اياسىنداعى ەلىمىزدىڭ قىزمەتى, استانا پروتسەسىنىڭ ۇلەسى تۋرالى حاباردار ەتتى. وسىعان بايلانىستى, كەلىسسوزدەر بارىسىندا ەر-ريادتىڭ سيريا داعدارىسىن رەتتەۋ پروتسەسىندە وسى سالاداعى جاعدايعا ىقپال ەتەتىن كۇش رەتىندە ماڭىزدى ۇلەسى تالقىلاندى. تاراپتاردىڭ ورتاق پىكىرىنشە, سيرياداعى قاقتىعىس جانە ونى قارۋلى كۇشپەن شەشۋ ارەكەتتەرىنىڭ ودان ءارى جالعاسۋى بارشا ءۇشىن جەڭىلىسكە اكەلەتىن ناتيجەسىز جول بولىپ تابىلادى.
وسى ورايدا, مينيستر 2016 جىلى ساۋىردە وتكەن يسلام ىنتىماقتاستىعى ۇيىمىنىڭ ىستانبۇلداعى سامميتىندە ساۋد ارابياسى تاراپىنان قولداۋعا يە بولعان «يسلام الەمىندەگى تاتۋلاسۋ» ءجونىندەگى قازاقستان پرەزيدەنتى نۇرسۇلتان نازارباەۆ پەن تۇركيا پرەزيدەنتى رەجەپ ەردوعاننىڭ بىرلەسكەن باستاماسىنىڭ ماڭىزدىلىعىن اتادى.
ەكىجاقتى ساۋدا-ينۆەستيتسيالىق ىنتىماقتاستىق ماسەلەلەرىن تالقىلاۋ كەزىندە ونى جانداندىرۋ ءۇشىن ەڭ پەرسپەكتيۆالى سالالار رەتىندە مۇناي حيمياسى, اتوم ەنەرگياسىن بەيبىت ماقساتتا پايدالانۋ, اۋىل شارۋاشىلىعى, ينفراقۇرىلىمدىق جوبالار كولدەنەڭ تارتىلدى. بۇل باعىتتار 2016-2017 جىلدارعى قازاقستان مەن ساۋد ارابياسى اراسىنداعى ىنتىماقتاستىقتىڭ جۇمىس باعدارلاماسىندا كورسەتىلگەن. قازىرگى ۋاقىتتا استانادا وسى جىلدىڭ ەكىنشى جارتىسىندا وتەدى دەپ جوسپارلانعان ىنتىماقتاستىق ءجونىندەگى ۇكىمەتارالىق كوميسسيانىڭ 5-ءشى وتىرىسىنا دايىندىق جۇمىستارى جۇرگىزىلۋدە.
ەر-رياد اۋىل شارۋاشىلىعى سەكتورىنا, اتاپ ايتقاندا, قازاقستاننان ەت ونىمدەرىن جەتكىزۋگە ءمۇددەلى ەكەندىكتەرىن ءبىلدىردى. سونىمەن قاتار, وڭتۇستىك قازاقستان وبلىسىندا ساۋديا ينۆەستورلارىنىڭ قاتىسۋىمەن جاڭا قۇس فابريكاسىن ساتىپ الۋ ءىرى جوباسى جۇزەگە اسىرىلۋدا.
مينيستر ساۋديا تاراپىنا
ەكسپو-2017 كورمەسىنە قاتىساتىنى ءۇشىن العىس ايتىپ, كورولدىك پاۆيلونى كورمەنىڭ ەڭ ءىرى جانە ەڭ قىزىقتى پاۆيلوندارىنىڭ ءبىرى بولاتىندىعىنا سەنىم ءبىلدىردى. «ساۋد ارابياسىنىڭ بيزنەس-قاۋىمداستىقتارى الەمدىك دەڭگەيدەگى وسى ماڭىزدى ءىس-شاراعا بەلسەندى تۇردە قاتىسادى دەپ ءۇمىتتەنەمىز», – دەدى ول.
ەر-ريادتاعى مينيسترلەر كەزدەسۋى ءداستۇرلى تۇردە دوستىق پەن ءوزارا سەنىم احۋالىندا ءوتتى جانە قازاقستاننىڭ مۇسىلمان الەمىندەگى اتالعان ماڭىزدى ەلمەن قارىم-قاتىناستارىن ودان ءارى نىعايتۋعا سەپتەسەتىنى ءسوزسىز.
ق.ءابدىراحمانوۆتىڭ ساۋد ارابياسى مەن كۋۆەيت ەلدەرىنە جۇمىس ساپارى جالعاسۋدا.
