وعان «قازمۇنايگاز» بارلاۋ ءوندىرۋ» اق باسشىلىعى, «قاراجانباسمۇناي» اق, «وزەنمۇنايگاز» اق, «قازگەرمۇناي» بك جشس, «كارپوۆسكي سەۆەرنىي» جشس كاسىپورىندارى ۇجىمدارىنىڭ وكىلدەرى مەن ارداگەر مۇنايشىلار, «ەمبىمۇنايگاز» اق-قا قاراستى باسقارمالاردىڭ گەولوگ ماماندارى قاتىستى.
سالتاناتتى شارانى جىلى قۇتتىقتاۋ لەبىزىمەن اشقان «ەمبىمۇنايگاز» اق باس ديرەكتورىنىڭ جاڭا جوبالار جانە تەحنولوگيالار جونىندەگى ورىنباسارى انۋار جاقسىبەكوۆ ەمبى كەن الاڭدارىنىڭ گەولوگيالىق بارلاۋ جۇمىستارىنىڭ بۇگىنگى تىنىسىنا جان-جاقتى توقتالدى.
– كومپانيانىڭ الدىندا تۇرعان تىڭ باستامانىڭ ءبىرى – تۇز استى قاباتتارىن بۇرعىلاۋ جۇمىستارى. ەمبىلىك ماماندار وسى باعىتتا جان-جاقتى ءىزدەنىس ۇستىندە. گەولوگيالىق بارلاۋ جۇمىستارىن ءجانە تەرەڭ بۇرعىلاۋدى ءجۇرگىزۋ ءۇشىن پەرسپەكتيۆالى تۇز استى قاباتتارى انىقتالدى. گەولوگيالىق-بارلاۋ جۇمىستارى باعدارلاماسىن جۇزەگە اسىرۋ ءناتيجەسىندە وتكەن جىلى «شىعىس ۋاز» بەن «ورتالىق نوۆوبوگات» (ليمان بلوگى) كەن الاڭدارىندا بارلاۋ جۇمىستارى اياقتالدى. كاسىپورىننىڭ بولاشاعى جاڭا كەنىشتەردىڭ اشىلۋىمەن, پەرسپەكتيۆالى الاڭداردىڭ تىڭعىلىقتى زەرتتەلۋىمەن بايلانىستى ەكەنى بارىمىزگە بەلگىلى. بۇل ورايدا تايسويعان مەن قاراتون-سارقامىس بلوكتارىندا زەرتتەۋ-بارلاۋ جۇمىستارىن جانداندىرۋ ءماسەلەسى كۇن تارتىبىندە تۇر, − دەپ اتاپ ءوتتى ءوز سوزىندە ا.جاقسىبەكوۆ.
سالتاناتتى جيىندا «قازمۇنايگاز» بارلاۋ ءوندىرۋ» اق ءوندىرىس جانە كەن ورىندارىن يگەرۋ جونىندەگى باسقارۋشى ديرەكتور ق.نۇرعاليەۆ ءسوز الىپ, گەولوگتاردى جانە ارداگەرلەردى كاسىبي مەرەكەسىمەن قۇتتىقتادى.
– قازاقستان 100 جىلدان استام ۋاقىتتان بەرى مۇناي ءوندىرىپ كەلەدى. مۇناي-گاز سەكتورى بۇگىندە ستراتەگيالىق سالاعا اينالدى. گەولوگتار جەر قويناۋىن بارلاۋ, مۇناي-گاز قورلارىن كوبەيتۋ, جاڭا كەن ورىندارىن يگەرۋ, ءوندىرىس كولەمىن ارتتىرۋ سياقتى جاۋاپتى ءمىندەتتەرىن ابىرويلى اتقارىپ كەلەدى. سىزدەرگە جۇكتەلگەن جاۋاپكەرشىلىك جۇگى اۋىر, سالماقتى. ءسىزدەر ماماندىققا ادالدىق دەگەن قاعيدانى بەرىك ۇستانىپ, بۇل سالاداعى جۇمىستاردى تابىستى اتقارۋعا كۇش سالىپ وتىرسىزدار. ءونىم كولەمىن ۇلعايتۋداعى ءىزدەنىستەر, ءتيىمدى گەولوگيالىق تەحنيكالىق شارالار, وندىرىسكە ەنگىزىلىپ جاتقان جاڭالىقتار ءوز ناتيجەسىن بەرىپ وتىر. كومپانيانىڭ وندىرىستىك قىزمەتتە جەتكەن جەتىستىگىندە سىزدەردىڭ ءارقايسىڭىزدىڭ ۇلكەن ۇلەسىڭىز بار. مەملەكەتىمىزدىڭ گەولوگيا سالاسىندا جۇرگىزىپ وتىرعان ساياساتىنىڭ دايەكتى جۇزەگە اسۋى جولىندا بيىك بەلەستەردى باعىندىرا بەرىڭىزدەر, – دەپ اتاپ ءوتتى ول.
سالتاناتتى شارادا قازاقستان مۇناي-گاز جانە ەنەرگەتيكا سالاسىن دامىتۋعا قوسقان ۇلەستەرى ءۇشىن جەكەلەگەن ماماندار «KAZENERGY» قاۋىمداستىعىنىڭ مەدالىمەن, قۇرمەت گراموتاسىمەن, العىس حاتىمەن, سونىمەن قاتار, «قازمۇنايگاز» بارلاۋ ءوندىرۋ» اق, «ەمبىمۇنايگاز» اق قۇرمەت گراموتاسىمەن, العىس حاتىمەن ماراپاتتالدى. ەمبى كەن الاڭدارىندا مۇناي-گاز قورىن ىزدەۋ-بارلاۋ باعدارلاماسىنىڭ جۇزەگە اسۋىنا زور ۇلەس قوسقان ءبىر توپ ارداگەر-گەولوگقا ەستەلىك سىيلىقتار تابىس ەتىلدى.
باقىت اسەنوۆا
اتىراۋ وبلىسى
