2016 جىلدىڭ جەلتوقسان ايىندا جوعارعى سوت پەن «استانا» حقو قىزمەتكەرلەرىن شەتەلدە دايىنداۋ, دالىرەگىندە لوندوندا Law Society باعدارلاماسى بويىنشا وقىتۋعا 15 قىزمەتكەرگە «بولاشاق» پرەزيدەنتتىك ستيپەندياسىن ءبولۋ بويىنشا رەسپۋبليكالىق كوميسسيا شەشىم شىعارعان.
تاعىلىمداما باعدارلاماسى 6 ايعا شاقتالعان: ءساۋىر ايى مەن قىركۇيەك ايى اراسىندا اكادەميالىق جانە پراكتيكالىق كومپونەنتتەردەن تۇرادى: 10 اپتا تەوريا مەن 5 اپتا تاجىربيەنى ۇلىبريتانيانىڭ زاڭ جانە ادۆوكاتتىق فيرمالارىندا, سوتتاردا وتەدى.
بۇل باعدارلاما شەتەلدە مامانداردى دايىندىقتان وتكىزۋ, قازاقستاندىق مامانداردى الەمنىڭ ەڭ مىقتى وقۋ ورىندارىندا دايىنداۋ باعدارلاماسى بويىنشا تۇزىلگەن.
كادرلاردى شەتەلدە دايىنداۋ بويىنشا اتقارىلعان ءىس-شارالاردى ايتا كەلە, مەملەكەتتىك حاتشى گ.ابدىحالىقوۆا قازىرگى كۇنى «سوتتار جانە سوت قىزمەتكەرلەرى» كاتەگورياسىنىڭ پرەزيدەنتتىك بولاشاق حالىقارالىق ستيپەندياسىنداعى باسىمدىققا يە ماماندىقتاردىڭ قاتارىندا ەكەنىن ايتتى.
«بۇل ەلباسىنىڭ العا قويعان – زاڭنىڭ جوعارعى مارتەبەسىن قامتامسىز ەتىپ, ينۆەستيتسيالىق كليماتتى جاقسارتۋعا قاتىستى ماقساتىنداعىداي, سوتتاردىڭ كۆاليفيكاتسياسىن ارتتىرادى», - دەدى ول.
«استانا» حقو باسقارۋشىسى قايرات كەلىمبەتوۆتىڭ ايتۋىنشا, حالىقارالىق قارجى ورتالىعىنىڭ قۇرىلۋىندا ادامي كاپيتال اسا ماڭىزدى, سول ءۇشىن دە احقو ءبىلىم مينيسترلىگىمەن ارنايى باعدارلامانى قولعا الدى.
«ەل ەكونوميكاسىنا قارجى رەسۋرستارىن تارتىپ, كاپيتالدىڭ جاڭا تولقىنىنىڭ قۇرىلۋى ءۇشىن احقو-عا حالىقارالىق دەڭگەيدەگى جوعارعى كاسىبي ماماندار قاجەت», - دەدى ول.
ءوز كەزەگىندە قر جوعارعى سوتى توراعاسى قايرات ءمامي ستيپەنديانتتارعا ەلباسىنىڭ ۇلت جوسپارىنىڭ 24 قادامىن جۇزەگە اسىرۋ ءۇشىن استانادا حالىقارالىق اربيتراجدىق ورتالىعى قۇرىلاتىنىن, ونىڭ قىزمەتىنىڭ سوت ىسىندە اعىلشىن ءتىلى مەن انگلوساكسوندىق قۇقىق جۇيەسىن قۇرۋ ارقىلى ينۆەستيتسيالىق داۋ-دامايلاردى شەشۋگە باعىتتالاتىنىنا توقتالدى.
«سوندىقتان, انگلوساكسوندىق قۇقىقتىق جۇيەسىن زەرتتەۋگە باراتىن, شەتەلدىك تاجىربيەنى زەرتتەيتىن سوتتاردىڭ ارنايى توبىن دايىنداۋ قاجەت», - دەدى ول.
