حالىقتى جوسپارلى قونىستاندىرۋدىڭ قىرلارىن دا ايقىندايدى
مەملەكەت باسشىسى ءوز جولداۋىندا قازاقستان حالقىنىڭ ءومىر ءسۇرۋ ساپاسىن ارتتىرۋ جونىندە ۇكىمەتكە بىرقاتار ناقتى تاپسىرمالار بەرە كەلە حالىقتى جۇمىسپەن قامتۋدىڭ تۇبەگەيلى جاڭا ستراتەگياسىن ازىرلەۋ مىندەتىن جۇكتەگەن بولاتىن. ۇكىمەت وسىعان سايكەس جۇمىسپەن قامتۋدىڭ 2011-2020 جىلدارعا ارنالعان جاڭا باعدارلاماسىن جاساپ, قابىلدادى. بۇل باعدارلاما ۇستىمىزدەگى جىلدىڭ 1 شىلدەسىنەن باستاپ ىسكە اسىرىلا باستايدى.
باعدارلامانى جۇزەگە اسىرۋدىڭ جولدارى مەن تەتىكتەرى قازىرگى كۇنى ەگجەي-تەگجەيلى پىسىقتالۋ ۇستىندە. وعان قاجەتتى بارلىق نورماتيۆتىك-قۇقىقتىق اكتىلەردى ۇستىمىزدەگى جىلدىڭ 1 مامىرىنا دەيىن قابىلداۋ جوسپارلانعان.
ناۋرىزدىڭ سوڭىنداعى ۇكىمەت وتىرىسىندا باعدارلامانى جۇزەگە اسىرۋدىڭ نەگىزگى شارالارى تاعى دا قارالدى. ولار جايىندا ەڭبەك جانە حالىقتى الەۋمەتتىك قورعاۋ ءمينيسترى گۇلشارا ءابدىحالىقوۆا باياندادى.
سونىمەن بۇل باعدارلاما حالىققا نە بەرەدى؟ ودان اۋىل ادامدارى, اسىرەسە, ونداعى جۇمىسسىز ادامدار نە كۇتە الادى؟ ۇكىمەت قابىلداعان جاڭا باعدارلاما جوباسىنا جانە قولىمىزدا بار دەرەكتەرگە سۇيەنە وتىرىپ وسى تۋرالى اڭگىمە قوزعاماقپىز.
حالىقتى جۇمىسپەن قامتۋدىڭ 2011-2020 جىلدارعا ارنالعان باعدارلاماسىنىڭ نەگىزگى ماقساتى – جۇمىسسىزدار سانىن ازايتۋ, ولاردىڭ تۇراقتى جانە ناتيجەلى جۇمىس ورىندارىنا يە بولۋىنا جاردەمدەسۋ ارقىلى حالىقتىڭ تابىسىن ارتتىرۋ بولىپ تابىلادى. وسىعان قول جەتكىزۋ ءۇشىن ەڭبەك جانە حالىقتى الەۋمەتتىك قورعاۋ مينيسترلىگى مەن باسقا دا مەملەكەتتىك ورگانداردىڭ الدىنا مىناداي شارالاردى جۇزەگە اسىرۋ مىندەتى قويىلىپ وتىر:
بىرىنشىدەن, ءوز بەتىنشە جۇمىسپەن اينالىسۋشىلاردى, جۇمىسسىزداردى ءجانە تابىسى از ادامداردى انىقتاپ, ولاردى جۇمىسپەن قامتۋدىڭ بەلسەندى باعدارلامالارىنا تارتۋ.
ەكىنشىدەن, ەلىمىزدى يندۋستريالاندىرۋ باعدارلامالارىن جۇزەگە اسىرۋ ءۇشىن كادرلار الەۋەتىن دامىتۋ.
ۇشىنشىدەن, ەلىمىزدىڭ اتاۋلى الەۋمەتتىك كومەك كورسەتۋ جۇيەسىن الدىعا قويىلىپ وتىرعان جاڭا مىندەتتەر اياسىندا جەتىلدىرۋ.
ءسوز بولىپ وتىرعان وسى ماسەلەلەر ەسكەرىلە كەلە جۇمىسپەن قامتۋ باعدارلاماسىن ىسكە اسىرۋ ءۇشىن ءبىرىنشى كەزەكتە حالىقتى وقىتۋعا, جۇمىسقا ورنالاستىرۋعا, تۇرعىلىقتى جەرى بويىنشا ءوزىنىڭ جەكە ءىسىن اشۋدى ۇيىمداستىرىپ, وسى ىسكە جاردەمدەسۋگە ءمان بەرىلەدى, ال مۇنداي مۇمكىندىكتەر بولماعان جاعدايدا, ەكونوميكالىق ءوسۋ ورتالىقتارىنا ءوز ەركىمەن كوشۋلەرىنە قولايلى احۋال تۋدىرىلادى.
باعدارلاماداعى شارالاردى جۇزەگە اسىرۋ نەگىزگى ءۇش باعىت بويىنشا جۇرگىزىلەدى.
ءبىرىنشى باعىت. ءوز بەتىنشە جۇمىسپەن اينالىسۋشىلاردى, جۇمىسسىزداردى ءجانە تابىسى از ادامداردى وقىتۋ جانە ەڭبەك رىنوگىندا ولاردىڭ جۇمىسقا ورنالاسۋىنا جاردەمدەسۋ.
ەكىنشى باعىت. اۋىلدا كاسىپكەرلىكتى دامىتۋعا جاردەمدەسۋ.
ءۇشىنشى باعىت. ەڭبەك رەسۋرستارىنىڭ ۇتقىرلىعىن ارتتىرۋ.
باعدارلامانى جۇزەگە اسىرۋ باستالاتىن 2011 جىل – قاناتقاقتى كەزەڭ بولىپ ەسەپتەلەدى. وسى جىلى باعدارلامانى ىسكە اسىرۋدىڭ تەتىكتەرى ناقتىلانىپ, ولار قۇقىقتىق تۇرعىدان, ياعني زاڭدىق نەگىزدەرمەن قامتاماسىز ەتىلەدى.
ەكىنشى كەزەڭ 2012-2015 جىلداردى, ءۇشىنشى كەزەڭ 2016-2020 جىلداردى قامتيدى. بۇل كەزەڭدەردە باعدارلامانى جۇزەگە اسىرۋ جۇيەلى جولعا ءتۇسىپ, ءپارمەندى سيپاتقا يە بولۋى ءتيىس.
قازىرگى كۇنى ەڭبەك جانە حالىقتى الەۋمەتتىك قورعاۋ مينيسترلىگى باعدارلامانى ىسكە اسىرۋ ءۇشىن نورماتيۆتىك-قۇقىقتىق بازانى جەتىلدىرۋ جونىندەگى جۇمىستاردى جالعاستىرۋدا. وسى بويىنشا باعدارلاماعا قاتىسۋشىلاردىڭ ءوزارا مىندەتتەمەلەرى ايقىندالدى. ول مىندەتتەر الەۋمەتتىك كەلىسىم-شارتتار جاساسۋ ارقىلى بەكىتىلەدى. كوپ ۇزاماي يندۋستريالاندىرۋ كارتاسىنداعى جوبالار مەن «بيزنەستىڭ جول كارتاسى-2020» باعدارلاماسىنداعى شارالار نەگىزىندە پايدا بولعان جانە جاڭادان قۇرىلاتىن جۇمىس ورىندارىن ناقتى پايدالانۋ ءۇشىن اعىمداعى جانە پەرسپەكتيۆالىق جۇمىس ورىندارىنىڭ اۆتوماتتاندىرىلعان دەرەكقورى جۇمىس ىستەي باستايدى.
باعدارلامانىڭ ءبىرىنشى باعىتى ازاماتتاردىڭ تۇرعىلىقتى جەرى بويىنشا جۇمىسقا ورنالاسۋىنا جاردەمدەسۋ ارقىلى ولاردىڭ جۇمىسپەن تۇراقتى جانە ناتيجەلى قامتىلۋىن قامتاماسىز ەتۋدى كوزدەيدى. بۇل باعىت ءوز بەتىنشە جۇمىسپەن اينالىسۋشىلار, جۇمىسسىزدار جانە تابىسى از ادامداردى قامتيتىن بولادى.
باعدارلاماعا قاتىسۋدىڭ باسىم ءمۇمكىندىكتەرى اۋىل جاستارىنا بەرىلەدى.
ءبىرىنشى باعىتقا قاتىسۋشىلارعا مەملەكەتتىك قولداۋدىڭ مىناداي تۇرلەرى كورسەتىلەتىن بولادى:
كاسىپتىك دايارلاۋ, قايتا دايارلاۋ جانە بىلىكتىلىگىن ارتتىرۋ كۋرستارىنا تەگىن جولدامالار بەرىلەدى جانە وقۋ ورنىنا جەتكەنگە دەيىنگى جولاقى شىعىندارى سۋبسيديالانادى;
لايىقتى بوس جۇمىس ورىندارى ىزدەستىرىلەدى جانە جۇمىسقا, ونىڭ ىشىندە الەۋمەتتىك جۇمىس ورىندارىنا ورنالاسۋىنا جاردەم كورسەتىلەدى;
جۇمىسقا پسيحولوگيالىق بەيىمدەۋ شارالارى ۇيىمداستىرىلادى.
بۇل شارالاردى ىسكە اسىرۋ تەتىكتەرى تومەندەگىدەي.
باعدارلامانىڭ الەۋەتتى قاتىسۋشىلارى قۇجاتتاردىڭ قاجەتتى تىزبەسىن ۇسىنا وتىرىپ, باعدارلاماعا قاتىسۋ تۋرالى وتىنىشپەن جەرگىلىكتى جۇمىسپەن قامتۋ ورگاندارىنا ءوتىنىش بىلدىرەدى.
جەرگىلىكتى جۇمىسپەن قامتۋ ورگاندارى بەرىلگەن وتىنىشتەردىڭ نەگىزىندە ىقتيمال دەگەن قاتىسۋشىلاردىڭ ءتىزىمىن قالىپتاستىرادى.
قالىپتاستىرىلعان تىزىمدەر مەن ىقتيمال قاتىسۋشىلار تۋرالى مالىمەتتەر اۋداندىق (قالالىق) كوميسسيالاردىڭ قاراۋىنا جىبەرىلەدى.
ۇسىنىلعان قۇجاتتاردى قاراۋ ءناتيجەسى بويىنشا كوميسسيا مۇشەلەرى ءوتىنىش بەرۋشىلەردى باعدارلاماعا قاتىسۋشىلار قاتارىنا قوسۋ نەمەسە ءوتىنىش بەرۋشى باعدارلامانىڭ ءبىرىنشى باعىتىنا قاتىسۋ ولشەمدەرىنە سايكەس كەلمەدى دەپ تاپقان جاعدايدا, ودان باس تارتۋ تۋرالى شەشىم قابىلدايدى. اۋداندىق كوميسسيا وتىرىستارى حاتتامالارىنىڭ كوشىرمەلەرى جەرگىلىكتى جۇمىسپەن قامتۋ ورگاندارىنا جىبەرىلەدى.
باعدارلامانىڭ ىقتيمال قاتىسۋشىلارىن انىقتاۋ مەن ءوتىنىش يەسىن باعدارلاماعا قوسۋ جونىندە شەشىم اۋداندىق (قالالىق) دەڭگەيدە قابىلداناتىن بولادى.
باعدارلامانىڭ ءاربىر قاتىسۋشىسىمەن جۇمىسقا ورنالاسۋدى قوسا العاندا, ءوزارا مىندەتتەمەلەر تۋرالى شارت بولىپ تابىلاتىن الەۋمەتتىك كەلىسىم-شارت جاسالادى.
ەگەر باعدارلاماعا قاتىسۋشى كاسىپتىك وقۋدى اياقتاعاننان كەيىن جۇمىسقا ورنالاسا الماسا, وعان باعدارلامانىڭ ەكىنشى نەمەسە ءۇشىنشى باعىتتارىنا قاتىسۋ ۇسىنىلادى.
ەكىنشى باعىتتىڭ ماقساتى – جەكە ءىسىن ۇيىمداستىرۋ ارقىلى ازاماتتاردىڭ ەكونوميكالىق بەلسەندىلىگىن ارتتىرۋ بولىپ تابىلادى.
جەكە ءىسىن ۇيىمداستىرۋدى قالايتىن جانە وعان ءمۇمكىندىگى بار ازاماتتار باعدارلامانىڭ قاتىسۋشىلارى بولا الادى. سونىڭ ىشىندە جەكە ءىسىن اۋىلدا ۇيىمداستىرۋدى قالايتىندار نەگىزگى نازارعا الىنادى, ياعني ولارعا باسىمدىق بەرىلەتىن بولادى.
وسى باعىت بويىنشا باعدارلاماعا قاتىسۋشىعا كونسۋلتاتسيالىق قىزمەت كورسەتۋ; كاسىپكەرلىك نەگىزدەرىن وقىتۋ; شاعىن نەسيە بەرۋ; جەتىسپەيتىن ينجەنەرلىك-كوممۋنيكاتسيالىق ينفراقۇرىلىمداردى دامىتۋ جانە جايلاستىرۋ سەكىلدى مەملەكەتتىك قولداۋ تۇرلەرى كورسەتىلەدى. ەندى وسىنىڭ ىشىندە شاعىن نەسيە بەرۋ ماسەلەسىنە كەلەيىك.
شاعىن نەسيە بەرۋ – اۋىلداعى كاسىپكەرلىكتى قولداۋدىڭ نەگىزگى تەتىگى بولىپ تابىلادى. ول قايتارىمدىلىق نەگىزىندە 3 ملن. تەڭگەگە دەيىنگى كولەمدە 5 جىلدان اسپايتىن مەرزىمگە بەرىلەدى.
ەسكەرتە كەتەتىن ءبىر جاعداي, شاعىن نەسيە تۇتىنۋشىلىق ماقساتتارعا, باسقا كرەديتتەردى وتەۋگە جانە جىلجىمايتىن تۇرعىن ءۇي الۋعا بەرىلمەيدى, تەك قانا جەكە ءىسىن ۇيىمداستىرۋ نەمەسە كەڭەيتۋ ءۇشىن بەرىلەدى. بۇل نەسيەنىڭ ءبىر ارتىقشىلىعى – ونى الۋشىعا كرەديت بويىنشا پايىزداردى تولەۋ جانە نەگىزگى قارىزدى وتەۋ بويىنشا ون سەگىز ايعا دەيىنگى مەرزىمگە جەڭىلدىكتى كەزەڭ ۇسىنىلادى. ال ونى الۋشى ءۇشىن شاعىن نەسيە بويىنشا جىلدىق ءتيىمدى پايىزدىق ستاۆكانى وڭىرلىك كوميسسيامەن كەلىسە وتىرىپ, ۋاكىلەتتى وڭىرلىك ۇيىم بەلگىلەيدى.
شاعىن نەسيە بەرۋدى جۇزەگە اسىراتىن ميكروقارجى ۇيىمدارىن ىرىكتەۋ ءىسىن جەرگىلىكتى اتقارۋشى ورگاندار ارقىلى ۋاكىلەتتى ورگان كونكۋرستىق نەگىزدە جۇرگىزەدى. ونىڭ جولدارى تومەندەگىدەي.
ەڭبەك جانە حالىقتى الەۋمەتتىك قورعاۋ مينيسترلىگى جەرگىلىكتى اتقارۋشى ورگانعا بيۋدجەتتىك كرەديت بەرەدى.
جەرگىلىكتى اتقارۋشى ورگان شاعىن نەسيە بەرۋدى ۇيىمداستىرۋ جونىندەگى ۋاكىلەتتى وڭىرلىك ۇيىمدى ءوزى ايقىندايدى.
ۋاكىلەتتى وڭىرلىك ۇيىم ميكروقارجى ۇيىمدارىنا كرەديت بەرۋدىڭ بەلگىلەنگەن ەرەجەسىنە سايكەس باعدارلاماعا قاتىسا الاتىن ميكروقارجى ۇيىمدارىن ىرىكتەۋ بويىنشا اشىق كونكۋرس وتكىزەدى.
ۋاكىلەتتى وڭىرلىك ۇيىم مەن ميكروقارجى ۇيىمدارى اراسىندا كرەديت بەرۋ تۋرالى كەلىسىم-شارت جاسالادى.
سونان كەيىن بارىپ باعدارلامانىڭ ەكىنشى باعىتىنا قوسىلعان ادامدار جەرگىلىكتى جۇمىسپەن قامتۋ ورگانىنىڭ جولداۋى بويىنشا شاعىن نەسيە الۋ تۋرالى باعدارلاماعا قاتىسۋشى ميكروقارجى ۇيىمىنا ءوتىنىش بىلدىرەدى.
ميكروقارجى ۇيىمى جوباعا باعالاۋ جۇرگىزەدى جانە قارجىلاندىرۋ مۇمكىندىگى (نەمەسە مۇمكىن ەمەس ەكەنى) تۋرالى شەشىم قابىلدايدى.
وڭ باعا العان جوبالار بويىنشا قارجىلاندىرۋ وسى باعدارلامادا كوزدەلگەن شارتتارعا, سونداي-اق ۇكىمەت بەكىتكەن ميكروقارجى ۇيىمدارىنا كرەديت بەرۋ ەرەجەسىنە سايكەس جۇزەگە اسىرىلادى.
ال اۋىلداعى كاسىپكەرلىك نىساندارى مەن سۋبەكتىلەرى قولدانىپ جۇرگەن ينفراقۇرىلىمدارىنا (ياعني, تەلەفون جانە ەلەكتر جۇيەلەرىنىڭ قۇبىرلارى, جىلۋ جانە سۋمەن جابدىقتاۋ) قوسىمشا ينجەنەرلىك-كوممۋنيكاتسيالىق ينفراقۇرىلىمدار جۇرگىزۋ قاجەت بولعان جاعدايدا, بۇل شىعىستاردى ەگەر ول نىساندار ەلدى مەكەندى سالۋ جوسپارىنا سايكەس بولسا, مەملەكەت وزىنە الا الادى.
ونىڭ قۇنى بيزنەس جوبانىڭ قۇنىنان اسپاۋى كەرەك.
ەگەر جۇمىس ىزدەۋشىنىڭ جوعارىداعى ەكى باعىتقا قوسىلۋعا مۇمكىندىگى بولماعان جاعدايدا وعان باعدارلامانىڭ ءۇشىنشى باعىتى ۇسىنىلادى. بۇل باعىت جۇمىس ىزدەۋشىنى ەكونوميكالىق الەۋەتى تومەن ەلدى مەكەندەردەن ەكونوميكالىق ءوسۋ ورتالىقتارىنا ءوز ەركىمەن كوشۋىنە جاردەمدەسۋ ماقساتىن كوزدەيدى. كوشىرۋ ءبىر اۋداننىڭ ىشىندە نەمەسە ءبىر وبلىس ىشىندە ء(بىر اۋداننان ەكىنشى ءبىر اۋدانعا) جۇرگىزىلۋى مۇمكىن. بۇل باعىتقا قاتىسۋدىڭ باسىم قۇقىعى كوبىنەسە اۋىل جاستارىنا بەرىلەتىن بولادى.
قونىس اۋدارۋعا قاتىسۋشىلار ءۇشىن, شامامەن العاندا, تومەندەگىدەي ولشەمدەر بەلگىلەنەدى.
قاتىسۋشى ءوز بەتىنشە جۇمىسپەن اينالىسۋشى نەمەسە جۇمىسسىز نەمەسە ەڭبەككە جارامدى, بىراق تابىسى از (ايلىق جيىنتىق تابىسى بىرگە تۇراتىن وتباسى مۇشەلەرىنىڭ ارقايسىسىنا شاققاندا ەڭ تومەن كۇنكورىس دەڭگەيىنەن اسپايتىن) ادام بولۋى جانە ەكونوميكالىق الەۋەتى تومەن ەلدى مەكەندەردە تۇرۋى ءتيىس.
ەڭبەك رىنوگىنداعى ناقتى جاعدايلار ەسكەرىلە وتىرىپ, جاڭا جەردەگى جۇمىستار ۆاحتالىق ادىسپەن ۇيىمداستىرىلۋى دا مۇمكىن.
مۇنداي جاعدايدا باعدارلامانىڭ وسى باعىتىنا قوسىلۋشىعا قونىس اۋدارۋعا سۋبسيديا بەرۋ; ساتىپ الۋ ءمۇمكىندىگىمەن, ۇلگىلىك جالعا بەرىلەتىن تۇرعىن ءۇي بەرۋ; وسى باعدارلاما شەڭبەرىندە جاڭا تۇرعىلىقتى جەرىندە قايتا دايارلاۋ كۋرستارىنان ءوتۋ; جاڭا جاعدايعا پسيحولوگيالىق بەيىمدەۋ سەكىلدى مەملەكەتتىك قولداۋ تۇرلەرى ۇسىنىلاتىن بولادى.
بارلىق باعىتتار بويىنشا مەملەكەتتىك قولداۋ تۇرلەرى مەن ولاردى ۇسىنۋ ءتارتىبى قازىرگى ۋاقىتتا ەڭبەك جانە حالىقتى الەۋمەتتىك قورعاۋ مينيسترلىگى ءازىرلەپ جاتقان ەرەجەدە تولىق قامتىلادى.
جالعا بەرىلەتىن ۇلگىلىك تۇرعىن ءۇي جانە الەۋمەتتىك ينفراقۇرىلىم قۇرىلىسىمەن تىكەلەي جەرگىلىكتى اتقارۋشى ورگاندار اينالىساتىن بولادى.
وڭىرلەر اكىمدەرىنىڭ ۇسىنىستارىن ەسكەرە وتىرىپ, ەرتەرەكتە باستالعان نەمەسە بوس تۇرعان نىساندارداردى ءجوندەۋدى اياقتاۋ مۇمكىندىگى قاراستىرىلادى.
جۇمىس ىزدەۋشى جاڭا جەرگە كوشكەننەن كەيىن باعدارلامانىڭ ءبىرىنشى نەمەسە ەكىنشى باعىتتارىنا قاتىسا الادى.
باعدارلامانىڭ وسى بولىگى قازىر اۋىلداردا جۇمىسسىز جۇرگەن كوپتەگەن ادامداردىڭ قىزىعۋشىلىعىن وياتۋى مۇمكىن. وسى جاعدايدى ەسكەرە وتىرىپ, بۇل ۇدەرىستىڭ قالايشا جۇزەگە اسىرىلاتىندىعى تۋرالى بايانداي كەتەيىك.
ەگەر جۇمىس ىزدەۋشى ەكونوميكالىق الەۋەتى تومەن ەلدى مەكەندە تۇراتىن بولسا جانە ونى باعدارلامانىڭ ءبىرىنشى جانە ەكىنشى باعىتتارى شەڭبەرىندە جۇمىسپەن قامتاماسىز ەتۋ مۇمكىندىگى بولماسا, ول جەرگىلىكتى جۇمىسپەن قامتۋ ورگانىنا ەرەجەدە بەلگىلەنگەن قۇجاتتار تىزبەسىن قوسا وتىرىپ, قونىس اۋدارۋعا ءوتىنىش بەرە الادى.
جەرگىلىكتى جۇمىسپەن قامتۋ ورگانى باعدارلامانىڭ ءۇشىنشى باعىتىنا قاتىسۋعا بەرىلگەن قۇجاتتاردى ىرىكتەۋ ولشەمىنە سايكەس قارايدى, قونىس اۋدارۋدىڭ ىقتيمال جولدارىن ءوتىنىش بەرۋشىمەن كەلىسەدى جانە كوشەتىن جەرىنە بايلانىستى قۇجاتتاردى وڭىرلىك نەمەسە اۋداندىق (قالالىق) كوميسسياعا جولدايدى.
وڭىرلىك نەمەسە اۋداندىق (قالالىق) كوميسسيا ءوتىنىش بىلدىرۋشىلەردى باعدارلاماعا قاتىسۋشىلاردىڭ تىزىمىنە ەنگىزۋ تۋرالى شەشىم قابىلدايدى, نە ەنگىزۋدەن باس تارتادى جانە شەشىمدى جەرگىلىكتى جۇمىسپەن قامتۋ ورگانىنا جىبەرەدى.
قونىس اۋدارۋ ءبىر وبلىس شەگىندە, ياعني ءبىر اۋداننان باسقا اۋدانعا جۇزەگە اسىرىلاتىن جاعدايدا, اۋداندىق كوميسسيا الەۋەتتى قاتىسۋشىلاردىڭ ءتىزىمىن باعدارلاماعا قاتىسۋشىلاردىڭ جالپى تىزىمىنە قوسۋدى كەلىسۋ جانە قالىپتاستىرۋ ءۇشىن وڭىرلىك كوميسسياعا جولدايدى.
وڭىرلىك كوميسسيا ازاماتتار مەن ورالمانداردى باعدارلامانىڭ اتالعان باعىتتارىنا قاتىسۋشىلار قاتارىنا قوسۋ جونىندە تۇپكىلىكتى شەشىم شىعارادى جانە ءتيىستى اقپاراتتى اۋداندىق كوميسسيالار مەن جەرگىلىكتى جۇمىسپەن قامتۋ ورگاندارىنا جىبەرەدى.
باعدارلامانى ىسكە اسىرۋدى باسقارۋ جوعارىدان تومەن باسقارۋ قۇرىلىمىنا يە بولادى, ونىڭ قۇرامىنا ۇكىمەت جانىنداعى ۆەدومستۆوارالىق كوميسسيا مەن وبلىستىق جانە اۋداندىق دەڭگەيدەگى كوميسسيالار كىرەدى.
باعدارلامانىڭ وسى بولىگىن ءتيىمدى ىسكە اسىرۋ ءۇشىن قازىرگى كۇندەرى اۋداندىق (قالالىق) دەڭگەيدە حالىقتى جۇمىسپەن قامتۋ ورتالىقتارىن قۇرۋ ماسەلەسى قاراستىرىلىپ, جوسپارلانۋ ۇستىندە.
حالىقتى جۇمىسپەن قامتۋدىڭ پەرسپەكتيۆالىق ماسەلەلەلەرى تۋرالى ازىرگە بىزگە بەلگىلى بولعان مالىمەتتەردىڭ ءبىر پاراسى وسىنداي. بالكىم الداعى ءومىر وعان ءوزىنىڭ جاڭالىقتارىن قوسار, تەك جاقسىلىق جاعى مول بولسىن دەگەن تىلەكتەمىز.
جالپى, باعدارلامانى ناقتى جۇزەگە اسىرۋ, وندا بەلگىلەنگەن باعىتتاردى ىسكە قوسۋ باستالار تۇستا بۇل جايىندا ءالى تالاي اڭگىمەلەنەتىن بولادى. كوپ ءماسەلە باعدارلاماعا قاتىساتىن حالىقتىڭ ەرىك-جىگەرىنىڭ ناتيجەسىندە شەشىمىن تاباتىندىعى ايقىن. سوندىقتان باعدارلاما ءمانىسىن ءتۇسىندىرۋ باعىتىنداعى ناسيحات ناۋقانى بەلەڭ الۋعا ءتيىس. ۇكىمەت وتىرىسىندا پرەمەر-مينيستر كارىم ءماسىموۆ وسى ماسەلەنى ەرەكشە اتاپ كورسەتىپ, ءتيىستى ورىندارعا تاپسىرمالار دا بەردى.
جۋىقتا «نۇر وتان» حدپ ورتالىق اپپاراتىنداعى ءوزىنىڭ سايلاۋالدى رەسپۋبليكالىق قوعامدىق شتابىندا سايلاۋ كۇنى جوعارى دەڭگەيدە قولداۋ بىلدىرگەنى ءۇشىن حالىققا ارناپ ايتقان جۇرەكجاردى العىس سوزىندە ەلباسى مەملەكەتتىڭ الداعى ۋاقىتتا ءاربىر وتباسىنىڭ جاعدايىن جاقسارتۋعا دەيىن جەتەتىندىگىن ايتىپ قالعان ەدى. سونىڭ جاقسى ءبىر نىشانىن ءبىز «حالىقتى جۇمىسپەن قامتۋ-2020» باعدارلاماسىنىڭ ءسوز بولىپ وتىرعان ءۇش باعىتىنان كورىپ وتىرمىز. ۇكىمەتتىڭ قازىرگى جۇرگىزىپ جاتقان جۇمىستارىنا قاراعاندا, ەكونوميكامىز دامىعان سايىن مەملەكەتتىڭ الەۋمەتتىك سالادا ۇستانعان ساياساتى دا بارعان سايىن تەرەڭدەپ, قاناتىن كەڭگە جايماق. ەلىمىزدىڭ دەنساۋلىق ساقتاۋ, ءبىلىم بەرۋ, حالىقتى الەۋمەتتىك قورعاۋ, ەڭبەكپەن قامتۋ سالالارىنا كوپ قارجىلاردىڭ ءبولىنۋى سونىڭ دالەلى. جاڭا زامان بەينەسىندەگى جاڭا قازاقستان, بارىس بەينەلى قازاقستان وسىلايشا بىرتە-بىرتە قالىپتاسىپ كەلەدى.
سۇڭعات ءالىپباي.
