باتىس قازاقستان وبلىسىنداعى سۋ تاسقىنىنا قاتىستى ورىن الىپ وتىرعان توتەنشە جاعدايعا بايلانىستى ۇكىمەتتىك كوميسسيا جۇمىسىن باستادى.
ءساۋىردىڭ 14-ءى كۇنى وبلىس اكىمدىگىندە وتكەن كوميسسيا وتىرىسىنا توتەنشە جاعدايلار ءمينيسترى ۆ.بوجكو, قارجى مينيسترىنىڭ ورىنباسارى ب.شولپانقۇلوۆ, يندۋستريا جانە جاڭا تەحنولوگيالار ۆيتسە-ءمينيسترى د.تۇرعانوۆ جانە باسقا دا رەسمي ادامدار قاتىستى. جيىندا باتىس قازاقستان وبلىسى اكىمىنىڭ ورىنباسارى, وبلىستىق تاسقىنعا قارسى شتاب ءتوراعاسى تيمۋرجان ءشاكىموۆ بايانداما جاساپ, قالىپتاسقان جاعدايعا توقتادى.
بايانداماشىنىڭ ايتۋىنشا, بۇگىندە جايىق وزەنىنىڭ دەڭگەيى 694 سانتيمەترگە جەتكەن, ياعني 47 سانتيمەترگە كوتەرىلگەن. شاعان, دەركول, 1 شەجىن, بىكوۆكا, رۋبەجكا وزەن-كولدەرىندەگى سۋ دەڭگەيى شەكتى دەڭگەيگە جەتكەن. قاراوزەن دە كوتەرىلۋ ءۇستىندە. سۋ تاسقىنى ورىن العان ايماقتاردا 1135 تۇرعىن ءۇي مەن ساياجايداعى 2 مىڭنان استام تۇرعىن-جاي سۋ استىندا قالعان ءجانە زاقىمدانعان. وبلىس ورتالىعىندا جانە اۋدانداردا 5 دەنساۋلىق ساقتاۋ نىسانى, 14 ەلەكتر تاراتۋ ستانساسى سۋ قۇرساۋىندا قالعان. سۋ قۇرساۋىندا قالعان ايماقتاردان 3 مىڭنان استام ادام قاۋىپسىز جەرلەرگە كوشىرىلگەن.
كەڭەستە وبلىس اكىمى باقتىقوجا ءىزمۇحامبەتوۆ سۋ استىندا قالعان تۇرعىندار ءۇشىن قالادا كوپ قاباتتى ءۇي سالىناتىنىن, سونىمەن قاتار زەلەنوۆ اۋدانىندا جاڭا اۋىل بوي كوتەرىپ, قونىستانۋشىلارعا بەرىلەتىنىن جەتكىزدى.
توتەنشە جاعدايلار ءمينيسترى ۆ.بوجكو ءتيىستى سالا جەتەكشىلەرىنە ناقتى تاپسىرمالار بەرىپ, قاتاڭ باقىلاۋدا ۇستاۋدى تاپسىردى.
تاعى ءبىر ايتا كەتەر ءجايت, ءتوتەنشە جاعداي ورىن العالى تاسقىن سالدارىنان ءۇش ادام وبلىستىق اۋرۋحاناعا ءتۇستى. ولاردىڭ ءبىرى مي قان تامىرلارىنىڭ جەدەل بۇزىلۋى سەبەپتى ينسۋلتپەن, ەكىنشىسى قان قىسىمىنىڭ جوعارىلاۋىمەن تۇسكەن. ءۇشىنشى ادام زاتتارىن سۋدان امان الىپ قالۋ ماقساتىندا ەكىنشى قاباتقا تاسۋ كەزىندە جوعارىدان قۇلاپ, دەنە جاراقاتىمەن ءتۇستى. وبلىستىق اۋرۋحانانىڭ باس دارىگەرى ەرلان توقسانوۆتىڭ ايتۋىنشا, ناۋقاستاردىڭ جاعدايى ايتارلىقتاي مۇشكىل ەمەس. ەكى-ءۇش كۇن تۋراسىندا سۋ باسۋ قاۋپىنە بايلانىستى وبلىستىق كارديوورتالىقتىڭ بارلىق ناۋقاستارى وسى اۋرۋحاناعا ورنالاستىرىلعان ەدى. بۇل شارا الدىن-الا ۇيىمداسقان تۇردە ءساتتى جۇزەگە اسقان. باستاپقىدا اتالمىش ورتالىقتان وبلىستىق اۋرۋحاناعا بارلىعى 151 ناۋقاس كوشىرىلسە, بۇگىندە كەيبىر ناۋقاستاردىڭ جاعدايى ءتۇزەلىپ, ۇيلەرىنە قايتۋلارىنا بايلانىستى 103 ادام ەم قابىلداۋدا. ازىق ت ۇلىك, ءدارى-دارمەك جەتكىلىكتى.
كەشە وڭىردەگى وسىناۋ جاعدايعا بايلانىستى ورالدا قوعامدىق ۇيىمدار, ساياسي پارتيالار جانە ۇلتتىق-مادەني ورتالىقتار وكىلدەرىنىڭ جينالىسى ءوتتى. وندا وڭىرىمىزدە سۋ تاسقىنىنان زارداپ شەككەندەرگە كومەك بەرۋ ءۇشىن قوعامدىق شتاب قۇرىلدى.
ساكەن مۇرات ۇلى.
___________________
سۋرەتتەردى تۇسىرگەن رافحات حالەلوۆ.
