«بارىس» قانداي جاعدايدا ءوز ويىندارىن الماتىدا وتكىزە الادى؟

قۇرلىقتىق حوككەي ليگاسى (قحل) «بارىس» كومانداسىنىڭ قانداي جاعدايدا ءوز ويىندارىن الماتى مەن استانادا وتكىزە الاتىنىن حابارلادى. بۇعان دەيىن 2017 جىلعى قىسقى ۋنيۆەرسيادا ويىندارىن ۇيىمداستىرۋ جانە وتكىزۋ ديرەكتسياسىنىڭ اپپارات باسشىسى ديدار ساعاديەۆ استانالىق كلۋبقا «استانا ارلاندارىنان» ۇلگى الىپ, ءوز ماتچتارىن تەك «بارىس-ارەنادا» عانا ەمەس «الماتى-ارەنادا» وتكىزۋى كەرەكتىگىن العا تارتقان بولاتىن, دەپ حابارلادى vesti.kz. «ۋنيۆەرسيادا كەزىندە الماتى تۇرعىندارىنىڭ دا حوككەيگە قىزىعۋشىلىقتارى جوعارى ەكەنىن بايقادىق. بىراق قحل-گە ەكى بىردەي قازاقستاندىق كلۋبتى تىركەۋ ءبىراز قارجىنى تالاپ ەتەدى. دەگەنمەن, الماتىعا دا حوككەي كەرەك. «استانا ارلاندارى» جەكپە-جەكتەرىن ەلىمىزدىڭ ءار وڭىرىندە وتكىزەتىندىگىن كورىپ, «بارىستىڭ» ويىندارىن استانا مەن الماتىدا دا وتكىزسە ەكەن دەگەن ۇسىنىسىمدى بىلدىرەمىن. قالامىزدا دا حالىقارالىق تالاپتارعا ساي مۇز ايدىنىمىز بار. سوندىقتان بارلىعىن جان-جاقتى قاراستىرىپ, وسى ءىستى قولعا الۋ كەرەك», – دەدى ديدار ساعاديەۆ. قحل-ءدىڭ ءباسپاسوز قىزمەتى ليگا ءتارتىبى بويىنشا كوماندالاردىڭ ارەنالار سانىنا شەكتەۋ قويىلمايتىنىن, بىراق بارلىق تالاپتارعا ساي بولۋى كەرەكتىگىن حابارلادى. «ءاربىر كلۋبتىڭ ءوز ماتچتارىن وتكىزەتىن ارەنالار سانىنا شەكتەۋ قويىلمايدى. باستى تالاپ – بارلىق تالاپقا ساي بولۋ. ەگەر «بارىس» كلۋبى ءوز ويىندارىن ەكى قالاداعى ارەنالاردا وتكىزۋ تۋرالى نيەت بىلدىرسە, كورەمەرمەندەردىڭ ىڭعايىنا قاراي ليگا بۇل ءوتىنىشتى قاراپ شىعۋعا دايىن», – دەلىنگەن حابارلامادا. ايتا كەتەيىك, قحل رۇقسات ەتكەن جاعدايدا «بارىس» تەك كەلەسى ماۋسىمنان باستاپ قانا وزگە ارەنادا وتكىزە الادى. قازىر ەلوردالىقتار گاگارين كۋبوگىنا قاتىسىپ جاتىر. بۇگىن استانا ۋاقىتى بويىنشا 20:00-دە ماگنيتوگورسكىدە جەرگىلىكتى «مەتاللۋرگ» كومانداسىمەن كۇش سىناسادى.