گولوۆكين الۆارەسپەن كەلىسە الماسا, تاعى ءبىر مەكسيكالىق بوكسشىمەن جۇدىرىقتاسادى

Top Rank پروموۋتەرلىك كومپانياسىنىڭ باسشىسى بوب ارۋم قاراماعىنداعى WBO نۇسقاسى بويىنشا ەكىنشى ورتا سالماقتاعى الەم چەمپيونى مەكسيكالىق حيلبەرتو راميرەستىڭ (34-0, 24 كو) ورتا سالماقتاعى WBA (Super), IBO, WBC جانە IBF بەلبەۋلەرىنىڭ يەگەرى قازاقستاندىق گەننادي گولوۆكينمەن جۇدىرىقتاسۋى مۇمكىن ەكەندىگىن مالىمدەدى. ونىڭ ايتۋىنشا, گەننادي گولوۆكين ءبىرىنشى ورتا سالماقتاعى WBO تۇجىرىمى بويىنشا الەم چەمپيونى ساۋل الۆارەسپەن (48-1-1, 34 كو) جەكپە-جەگى وتپەي قالعان جاعدايدا ۇيىمداستىرىلۋى مۇمكىن. «راميرەس ءۇشىن گەنناديمەن جۇدىرىقتاسۋ ءتيىمدى بولار ەدى. ەگەر قازاقستاندىق بوكسشى «كانەلومەن» ورتاق ىمىراعا كەلە المايتىن بولسا, ۋاقىت جوعالتپاي, وسى ءىستى جۇزەگە اسىرۋ ءۇشىن بارىمىزدى سالامىز. بۇل جونىندە ونىڭ پروموۋتەرى توم لەففلەرمەن اقىلداسىپ تا قويدىق», – دەدى BoxingScene.com باسىلىمىنا بەرگەن سۇحباتىندا. حيلبەرتو راميرەس بۇعان دەيىن بىرنەشە رەت گولوۆكينمەن كۇش سىناسقىسى كەلەتىنىن مالىمدەگەن بولاتىن. بىراق 22 ءساۋىر كۇنى كاليفورنيادا ۋكراينالىق ماكسيم بۋرساكقا قارسى ايقاستا ءوز تيتۋلىن قورعاپ قالۋى ءتيىس. ال GGG-ءدى 18 ناۋرىز كۇنى نيۋ-يوركتە امەريكالىق دەننيەل دجەيكوبسپەن جەكپە-جەگى كۇتىپ تۇر.