قازاقستان ۆەتنامعا العاش رەت استىق جەتكىزدى

حوشيمين قالاسىنداعى تەڭىز پورتىنا ۆەتنام نارىعىنا ارنالعان قازاقستاندىق بيدايدىڭ العاشقى پارتياسى جەتتى. اتالعان پيلوتتىق جەتكىزىلىمدى «قازاقستان تەمىر جولى» اق كومپانياسىنىڭ ەنشىلەس ۇيىمى – «KTZ Express» اق «ليانيۋنگان قالاسىنداعى قىتاي-قازاقستان حالىقارالىق لوگيستيكالىق كومپانياسى» جشق-مەن بىرگە جۇزەگە اسىردى, دەپ جازادى primeminister.kz. قازاقستاننىڭ ۆەتنامداعى ەلشىلىگىمەن قازاقستاندىق استىق تيەلگەن كەمەنى تەڭىز پورتىنان قارسى الۋدىڭ سالتاناتتى ءراسىمى ۇيىمداستىرىلدى. وعان قازاقستان ەلشىسى بەكەتجان جۇماحانوۆ, Vietnam International Container Terminals (VICT) پورتىنىڭ باس ديرەكتورى گلەن كۋن ۆاي كەون, «ليانيۋنگان قالاسىنداعى قىتاي-قازاقستان حالىقارالىق لوگيستيكالىق كومپانياسى» جشق باس ديرەكتورى ليۋ بين, ۆەتنامدىق استىق ساتىپ الۋشى كومپانيالاردىڭ وكىلدەرى, سونداي-اق قازاقستان مەن ۆەتنامنىڭ بۇقارالىق اقپارات وكىلدەرى قاتىستى. ءوز سوزىندە ب. جۇماحانوۆ سوڭعى جىلى ەلشىلىك «قازاقستان تەمىر جولى» ۇك» اق كومپانياسىمەن بىرلەسىپ, مەملەكەت باسشىسىنىڭ «نۇرلى جول» جولداۋىندا العا قويعان كولىك-لوگيستيكا ينفراقۇرىلىمى مەن حالىقارالىق تاسىمالداردى دامىتۋ تۋرالى مىندەتتەرىن ىسكە اسىرۋعا بايلانىستى اۋقىمدى جۇمىستار جۇرگىزىلگەنىن ايتتى. نەگىزگى مىندەت تەك قانا اتالعان جۇكتى ۆەتنامعا دەيىن جەتكىزۋ ەمەس, سونىمەن قوسا قىتاي اۋماعى ارقىلى وڭتۇستىك-شىعىس ازياعا تاۋارلاردى جەتكىزۋ باعدارىن تەكسەرۋ بولدى. وسىلايشا قازاقستان تەك ءوزىنىڭ ونىمدەرىن عانا ەكسپورتتاپ قويماي, سونداي-اق ۆەتنامعا جانە وڭتۇستىك-شىعىس ازيانىڭ وزگە ەلدەرىنە «قازاقستان - ليانيۋنگان (قحر) - ۆەتنام» كولىك ءدالىزى ارقىلى ەۋرازيالىق ەكونوميكالىق وداققا مۇشە وزگە مەملەكەتتەردىڭ تاۋارلارىن جەتكىزە الادى. جيىندا ءسوز سويلەگەن ليانيۋنگان قالاسىنىڭ پورتىنداعى قىتاي-قازاقستان تەرمينالىنىڭ وكىلى ليۋ بين قازاقستاندىق بيداي قىتاي اۋماعى ارقىلى العاش رەت وڭتۇستىك-شىعىس ازيا نارىعىنا جەتكىزىلەتىنىن جانە بۇل قازاقستاننان قىتاي ارقىلى ازىقتىق استىقتى ەكسپورتتايتىن ترانزيتتىك ءدالىزدىڭ رەسمي اشىلۋىنىڭ بەلگىسى ەكەنىن ايتتى.