دامير رىسپاەۆ: سولتۇستىك امەريكاعا كەتۋدى جوسپارلاپ ءجۇرمىن

قۇرلىقتىق حوككەي ليگاسىندا (قحل) مەرزىمسىز جازاعا ۇشىراعان «بارىس» ويىنشىسى دامير رىسپاەۆ الداعى ۋاقىتتا سولتۇستىك امەريكاعا جول تارتۋى مۇمكىن ەكەندىگىن مالىمدەدى, دەپ حابارلادى shaiba.kz. بۇعان دەيىن قحل وكىلدەرىنىڭ ءبىرى رىسپاەۆتىڭ جازاسى ەشقاشان كەشىرىلمەيتىنىن ايتقان بولاتىن. «ءبارىڭىز بىلەتىندەي, 18 تامىز كۇنى «كۋنلۋن رەد ستارمەن» بولعان وقيعا ءۇشىن مەرزىمسىز جازاعا ۇشىرادىم. تەك جارتى جىلدان كەيىن عانا بۇل ءىستى قايتا قاراۋ كەرەك بولاتىن. بىراق ءالى ناقتى جاۋاپ بولمادى. سونداي-اق, حالىقارالىق حوككەي فەدەراتسياسى دا ديسكۆاليفيكاتسيا بەرگەنى ءۇشىن قازاقستان قۇراماسىنىڭ ساپىندا ويناي الماي ءجۇرمىن», – دەدى دامير رىسپاەۆ. «شىنىمدى ايتسام, بارىنە قول سىلتەپ, سولتۇستىك امەريكاعا كەتىپ قالۋ تۋرالى ويلادىم. بىراق كلۋبتا بۇل ماسەلە كوپ ۇزاماي, جاقسى جاعىنا قاراي شەشىلۋى ءتيىس ەكەندىگىن ايتتى. ەندىگىسىن ۋاقىت كورسەتە جاتار. ەگەر ديسكۆاليفيكاتسيام الىنبايتىن بولسا, كەتەتىنىم انىق», – دەدى حوككەيشى. سونىمەن قاتار, كەشىرىمگە يە بولىپ, بۇرىنعى جاتتىقتىرۋشىسى اندرەي نازاروۆ «نەفتەحيميككە» شاقىرار بولسا, كەتىپ قالۋى دا مۇمكىن ەكەن. «اندرەي نازاروۆتىڭ قول استىنا كەتىپ قالۋىم دا مۇمكىن. ەكەۋىمىز سكايپ ارقىلى بايلانىسىپ تۇرامىز. بىراق مەن ءۇشىن «بارىس» ءبىرىنشى ورىندا. ءىستىڭ ءبارى مەنىڭ جازا مەرزىمىم تۋرالى بولعاندىقتان, مۇنداي ۇسىنىس تۇسپەدى», – دەدى ول. سوڭعى ويىنداردا «بارىس» حوككەيشىلەرىنە ءجيى ويىن ءتارتىبى بۇزىلىپ ءجۇر. ماسەلەن, نوۆوكۋزنەتسكىنىڭ «مەتاللۋرگىمەن» وتكەن ماتچتا الەكسەي ۆاسيلچەنكو استانالىقتاردىڭ ساپىنان برەندون بوچەنسكيدىڭ باسىنان ۇرىپ قۇلاتىپ, جاراقاتتاعان بولاتىن. «بۇل ءساتتى كوردىم. ارينە, برەندون ءۇشىن ءبارى ءساتسىز اياقتالدى. بىراق الەكسەي ۆاسيلچەنكونى ءوز باسىم بىلگەندىكتەن, تەرىس ويمەن جاسادى دەپ ايتا المايمىن. بۇل ويىن كەزىندەگى جاعداي. سپورت بولعاندىقتان جاراقاتتى الدىن الا ءبىلۋ مۇمكىن ەمەس. قازىر ارىپتەسىم قاتارعا قوسىلىپ, «بارىسقا» كومەگىن تيگىزەدى دەپ ويلايمىن», – دەدى ول. «كوماندانىڭ قازىرگى جاتتىقتىرۋشىسى ەدۋارد زانكوۆەتسپەن بىرنەشە رەت سويلەستىك. ويىندار جايلى تالقىلادىق. الداعى ۋاقىتتا توبەلەسكە بەت بۇرماي, ءبارى وڭىنان بولسا, كومانداما سەپتىگىمدى تيگىزگىم كەلەدى», – دەدى 21 جاستاعى تافگايشى.