«جاڭا سەرپىن» ورتالىعى سۇرانىسقا يە ماماندىقتار ءتىزىمىن جاريالادى

ماڭعىستاۋ وبلىسىندا 2016 جىلى «جاڭا سەرپىن» ورتالىعىنا بوس جۇمىس ورىندارى بويىنشا 365 سۇرانىس ءتۇسىپ, 306 ادام تۇراقتى جۇمىسپەن قامتىلعان. ونىڭ ىشىندە شالعاي اۋىلدا تۇراتىندار سانى - 235. بۇل تۋرالى «جاڭا سەرپىن» كوممۋنالدىق مەملەكەتتىك مەكەمەسىنىڭ ءباسپاسوز-حاتشىسى مايرا دوسنيازوۆا حابارلادى. ەكى قولعا ءبىر كۇرەك تاپقاندار «اقتاۋ تەڭىز پورتى» ارنايى ەكونوميكالىق ايماعى», جۇك تاسىمالداۋشى تەرمينالى, اسفالت-بيتۋم, قۇرىلىس ماتەريالدارى, پلاستيكالىق قۇبىرلار ءوندىرۋ, تىگىن-ديزاينەر, پەداگوگيكا, دەنساۋلىق ساقتاۋ, اباتتاندىرۋ, قۇرىلىس, قوعامدىق تاماقتاندىرۋ كاسىپورىندارىنا جۇمىسقا قابىلدانعان. ماسەلەن, «اقتاۋ تەڭىز پورتى» ارنايى ەكونوميكالىق ايماعى جانە «جاڭا سەرپىن» ورتالىعى وتكەن جىلى ىنتىماقتاستىق ورناتۋ ماقساتىندا 17 مەموراندۋمعا قول قويدى. ال وڭىردەگى مەكەمەلەردەن 300-گە جۋىق بوس جۇمىس ورىندارى ۇسىنىلعان. ونىڭ 100-دەن استام ماماندىق يەلەرى سۇرانىم بويىنشا الماتىداعى «قازاقستان جول عىلىمي-زەرتتەۋ ينستيتۋتى» اق, رەسەيدىڭ سانكت-پەتەربۋرگ قالاسىنداعى «تەڭىز كادر اگەنتتىگى» قوعامدىق شەكتەۋلى سەرىكتەستىگى جانە «ەكسپورت ينجينيرينگ» كاسىپورنى, ماسكەۋدەگى «ءبىلىم سالاسى قىزمەتكەرلەرىنىڭ بىلىكتىلىگىن ارتتىرۋ جانە قايتا دايارلاۋ» اكادەمياسىندا قايتا دايارلاۋ كۋرستارىنان وتكەن. «جاڭا سەرپىن» ورتالىعىنىڭ ديرەكتورى قايرات رىسپاەۆتىڭ ايتۋىنشا, ورتالىق ءوز كەزەگىندە حالىققا ارنالعان قىزمەتتىڭ 17 ءتۇرىن كورسەتەدى. «جاڭا سەرپىن» باعدارلاماسى تۋرالى اقتاۋ مەن جاڭاوزەن قالالارى, سونىمەن قاتار مۇنايلى اۋدانىندا 125 كاسىپورىنعا پرەزەنتاتسيا وتكىزىلىپ, 671 ادام كەڭەس الدى. ورتا مەكتەپتىڭ جوعارى سىنىپ وقۋشىلارىنا كاسىبي باعدار بەرۋ ءۇشىن وبلىستىڭ بارلىق اۋداندارىندا بولىپ, 500-گە جۋىق تۇسىنىك جۇمىستارى جۇرگىزىلدى», – دەيدى ول. وڭىردە ەڭبەك نارىعىن زەرتتەگەن «جاڭا سەرپىن» ورتالىعىنىڭ ماماندارى, اسا تاپشى جانە جوعارى سۇرانىسقا يە ماماندىقتار تىزىمىنە تالداۋ جاساعان. ناتيجەسىندە, ماڭعىستاۋ وڭىرىندە مەتالل جونۋشى, باقىلاۋ-ولشەۋ اسپاپتارى جانە اۆتوماتيكا, ساۋدا مەنەدجەرى, گەودەزياشى, بروكەر, لوگيستيكا سالاسى, اگرونوم, مال دارىگەرى, ءتىس دارىگەرى, ءىت-مامانى, ەلەكرشى, اسپازشى, دانىكەرلەۋشى, قۇبىر جوندەۋشى سالاسىنىڭ ماماندارى تاپشى. ال «جاڭا سەرپىن» ورتالىعىنا جۇمىس ىزدەپ كەلگەن 193 ادامنىڭ تۇيىندەمەلەرى ءتۇرلى كومپانيالارعا جولدانىپ, 255 تۇيىندەمە قايتا وڭدەلۋدە. گۇلايىم شىنتەمىرقىزى, «ەگەمەن قازاقستان»