2016 جىلى قازاقستاندا ءسابي ءولىمى 11,6%-عا, ياعني 2015 جىلى 1000 ءتىرى تۋىلعان 9,6-دان 2016 جىلى 8,6-عا دەيىن تومەندەدى, دەپ حابارلادى قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ءباسپاسوز قىزمەتى.
كوپ جاعدايدا ءسابي ولىمىنە پەريناتالدىق كەزەڭنىڭ اسقىنۋى سەبەپ بولادى. سونىمەن بىرگە, 1 جاسقا دەيىنگى بالالار دامۋدىڭ ءتۋابىتتى اقاۋلارى, تىنىس الۋ جانە قان اينالىم ورگاندارىنىڭ سىرقاتتانۋى سەبەپتى دە قايتىس بولادى.
رەسپۋبليكادا كۇن سايىن 1 مىڭنان استام, جىل سايىن 400 مىڭنان اسا ءسابي دۇنيەگە كەلەدى. تۋ كورسەتكىشى سوڭعى 5 جىلدا 3%-عا ءوستى. ەلىمىزدە ءسابي ءولىمىن ازايتۋعا باعىتتالعان شارالاردىڭ ناتيجەسىندە سالماعى 500 گرامم جانە ودان اساتىن شالا تۋعان بالالار ءومىر سۇرۋگە مۇمكىندىك الدى. 5 جىلدا سالماعى 1500 گراممعا دەيىنگى ساناتتاعى بالالاردىڭ تىرشىلىككە قابىلەتتىلىگى 30%-عا ءوسىپ, 60%-عا جۋىق كورسەتكىشتى قۇراپ وتىر.
ەستەرىڭىزگە سالا كەتەيىك, دەنساۋلىق ساقتاۋ سالاسىن دامىتۋدىڭ 2016-2019 ج. ارنالعان «دەنساۋلىق» مەملەكەتتىك باعدارلاماسىن جۇزەگە اسىرۋ اياسىندا قازاقستاندا نەگىزگى الەۋمەتتىك ءمانى بار, ەلدىڭ دەموگرافيالىق احۋالىنا ايتارلىقتاي اسەرى بار 5 نەگىزگى نوزولوگيا (ميوكاردتىڭ ءجىتى ينفاركتى, ميداعى قان اينالىمىنىڭ اۋىر اۋىتقۋلارى (ينسۋلت), قاتەرلى ىسىك اۋرۋلارى, سىنىقتار, جۇكتىلىك جانە بوساندىرۋ) بويىنشا مەديتسينالىق كومەك كورسەتۋدىڭ بىرىكتىرىلگەن ۇلگىسى كەزەڭ كەزەڭىمەن ەنگىزىلىپ كەلەدى.
