حقكو موبيلدىك توپتارى وقۋ ورىندارىن ارالايدى

بۇگىننەن باستاپ ازاماتتارعا قولايلى بولۋى ءۇشىن حالىققا قىزمەت كورسەتۋ ورتالىقتارىنىڭ موبيلدىك توپتارى ەلەكتروندىق ۇكىمەت پورتالى ارقىلى ازاماتتاردى ۋاقىتشا تىركەۋ بويىنشا قىزمەتتەردى كورسەتۋ ءۇشىن وقۋ ورىندارىن, بازارلاردى جانە ساۋدا ورتالىقتارىن ارالايتىن بولادى, دەپ جازادى قازاقپارات. «ۋاقىتشا تىركەلىپ ۇلگەرمەگەن ازاماتتار ءۇشىن حقكو-لاردىڭ موبيلدىك توپتارى جوو-لاردا جانە ساۋدا ۇيلەرىندە قىزمەت كورسەتەتىن بولادى. موبيلدىك توپتاردىڭ ينسپەكتورلارى بارلىق قالاۋشىلارعا ەلەكتروندىق تسيفرلىق قولتاڭبا جازىپ, ەلەكتروندىق ۇكىمەت پورتالىندا ۋاقىتشا تىركەۋگە ءوتىنىش راسىمدەۋگە كومەكتەسەدى. بۇنداي شارالار بارلىق وبلىس ورتالىقتارى مەن استانا جانە الماتى قالالارىندا ۇيىمداستىرىلدى», - دەدى «ازاماتتارعا ارنالعان ۇكىمەت» مەملەكەتتىك كورپوراتسياسى» كە اق فيليالى - مەملەكەتتىك قىزمەتتەردى كورسەتۋ ديرەكتسياسىنىڭ ديرەكتورى اسەمگۇل بالتاشەۆا. ونىڭ ايتۋىنشا, استانادا موبيلدىك توپتار «ارتەم», «ەۋرازيا», «ازيا پارك» ساۋدا ۇيلەرىنە, ال  الماتىدا «تيگروحاۋد», «ارىستان», «بولاشاق» جانە ت.ب. بازارلارعا شىعاتىن بولادى. موبيلدىك توپتار بارلىعى 82 نۇكتەنى, ونىڭ ىشىندە جوو-لاردى, بازارلاردى جانە مەملەكەتتىك ۇيىمداردى قامتۋدى جوسپارلاپ وتىر. ەستەرىڭىزگە سالا كەتسەك, ازاماتتاردى ۋاقىتشا تىركەۋ قىزمەتىن ەلەكتروندىق ۇكىمەت پورتالى ارقىلى ونلاين جۇزەگە اسىرۋعا بولادى. قىزمەت «ازاماتتىق, ميگراتسيا جانە يمميگراتسيا» تاراۋىندا قولجەتىمدى.